Горадзуль (1923)

Горадзуль (Звонкий шар). Иньва дорись коми йӧзлӧ. Сыктывдінкар: Коми нига лэдзанін, 1923 во

Гора-ԇуԉ (Звонкий шар). Іԋваԁоріԍ Комі јӧзвӧ. Сыктывԁін кар: Комі ԋіга веԇан ін, 1923 во.

Небӧг йылісь

Горадзуль - мӧдік небӧг, кӧдӧ лэдзисӧ перем комиӧн октябся революция бӧрын. Сія медодзза поэтическӧй сборник коми пермяккезлӧн. Кынымкӧ текст миян медодзза поэттэз босьтӧмась этія небӧгӧ коми зыряналісь да лӧсьӧтӧмась иньвенса басни сьӧрті, мӧдіккесӧ гижӧмась асьныс. Лэдзӧмась нигасӧ Сыктывкарын, Коми (зыряналӧн) автономнӧй обласьтын.

Авторрез

• Гаврив Пёдор.
  • Бордтӧм варыш
  • Коми отир!
  • Сьӧлӧм доймӧ
  • Сьыланкыв (Муна, пыра…)
  • Сьыланкыв (Мыля меным томлӧ…)
  • Сьыланкыв (Эн тэ сьыв…)
  • Удмортлӧ

• Дерябин Вас.
  • Велӧтчӧм йӧзлӧ
  • Интернационал

• Казантсов Петра.
  • Коми сьыланкыв

• Нёбдінса Виттор.
  • Сьыланкыв (Унаись ме…)

• Онтон Пёдор.
  • Миков пессьӧ

• Питю Ӧньӧ.
  • Гов
  • Горттӧм кӧк
  • Ичмоньлӧн тӧждісьӧм
  • Коми велӧтчисьлӧ
  • Коми мортлӧ
  • Лён
  • Морозко
  • Мыйкӧ скаски кодь
  • Сьыланкыв (Кӧкӧ горттӧм…)
  • Тӧждісьӧм
  • Шудтӧм
  • Гажажык Комиэз олӧ!
  • Сьыланкыв (Пемыт ойӧн…)
  • Том ныввезлӧ

• Аноним
  • Коми нылӧй
  • Сьыланкыв (Уна ныввез чукӧртчисӧ…)

Эпиграффез

Мувыв коньӧррез, ӧтлаӧ чукӧртчӧ! Коми кылын коми лов.

Мувыв коԋерез, ӧтваӧ чукӧртчӧ! Комі кывын коми вов.

Тексттэз

Книга включает 28 произведений.

Интернационал

Интернационал - РСФСР-лӧн сэкся гимн. Сьыланкыв вӧлі вуджӧтӧм коми (зыряна) кыв вылӧ, а сэтісь сійӧ лӧсьӧтыштіс иньва сёрниланьӧ Дерябин Василий.

Татӧн ордчӧн сетам В.Дерябинлісь текст ӧнія орфографияӧн да оригинал молодцовицаӧн.

Интернационал Сувт чеччы ёрдӧм дорӧм отир! Сувт тшыглӧ кулісь, горзісь йӧз! Пым виртӧ пизьӧт, пальӧт ойбыр *, Мед сьӧлӧм ӧзйӧ биӧн моз. Быд сэрпсӧ * мувлісь дзикӧдз гӧрам, Лёк вужсӧ нетшкам, ась оз пет; Ми долыт олӧм вились дорам: Кин вӧлі тшыг ась лоас пӧт. Ӧні лэбтісис миян Мувыв медбӧрья кось * Сувт, уджалісь йӧз пиян, Мый медбур аслыт босьт! Оз сетлы сарыс личыт олӧм, Оз киссьы енсянь немын тор, Ас вынӧн босьтны быдӧн колӧ Быд тільсись-пессись миян дор. Ась * лэдзчӧ горшись чорыт гӧрӧд, Ась му пыр мунас мустӧм * тор; Сэрпсӧ мувлісь пиньӧвт, пӧрӧт, Заптӧм выннат шудтӧ * дор! Ӧні лэбтісис миян Мувыв медбӧрья кось. Сувт уджалісь йӧз пиян Мый медбур аслыт босьт! Мый муыс лэбтӧ - быдӧс миян. Быд уджсӧ вермӧ вына сой *. Дыш йӧзсӧ-горшсӧ пӧдтам биӧн Кӧда оз уджав ась оз сёй. Оз зэв дыр карзы кырныш чукӧр Ми регыт * иньдам оланін. Бур асыв чавкйӧ кыа * югӧр, Гӧрд мича шонді сетас вын. Ӧні лэбтісис миян Мувыв медбӧрья кось. Сувт уджалісь йӧз пиян, Мый медбур аслыт босьт! Лӧсьӧтіс зырянскӧйись В. Дерябин.

Іԋԏернатсіонал Сувт четчы јорԁӧм ԁорӧм оԏір! Сувт щыгвӧ кувіԍ, горзіԍ јӧз! Пым віртӧ піԅӧԁ, паԉӧԁ ојбыр *, Меԁ ԍӧвӧм ӧзјӧ біӧн моз. Быԁ серпсӧ * муввіԍ ԇікӧԇ гӧрам, Ԉок вужсӧ ԋещкам аԍ оз пет; Мі ԁовыԁ овӧм віԉіԍ ԁорам: Кін вӧві щыг аԍ воас пӧт. Ӧні вептіԍіс міјан Мувыв меԁбӧрја коԍ * Сувт, уҗавіԍ јӧз піјан, Мыј меԁ бур асвыт боԍт! Оз ԍетвы сарыс ԉічыԁ овӧм, Оз кіԍԍы јенԍаԋ ԋемын тор, Ас вынӧн боԍтны быԁӧн ковӧ Быԁ тіԉԍіԍ песԍіԍ міјан ԁор. Аԍ * ветчӧ горшіԍ чорыԁ гӧрӧԁ, Аԍ му пыр мунас мустӧм * тор; Серпсӧ муввіԍ піԋӧвт, пӧрӧԁ, Заптӧм выннат шуԁтӧ * ԁор! Ӧні вептіԍіс міјан Мувыв меԁ бӧрја коԍ. Сувт уҗавіԍ јӧз піјан Мыј меԁ бур асвыт боԍт! Мыј муыс вептӧ быԁӧс міјан. Быԁ уҗсӧ вермӧ вына сој *. Ԁыш јӧзсӧ-горшсӧ пӧԁтам біӧн Кӧԁа оз уҗав аԍ оз ԍој. Оз зев ԁыр карзы кырныш чукӧр Мі регыԁ * іԋԁам ован ін. Бур асыв чавкјӧ кыа * југӧр, Гӧрԁ міча шонԁі ԍетас вын. Ӧні вептіԍіс міјан Мувыв меԁ бӧрја коԍ. Сувт уҗавіԍ јӧз піјан, Мыј меԁ бур асвыт боԍт! Вӧԍӧтіс зырјанскӧјіԍ В. Ԃерјабін.

Гажажык Комиэз олӧ!

(Зырянскӧйӧ вӧсьӧтӧма Иньвадорись Коми кыввӧ)

Гажажык Комиэз овӧ!

Шогавны, бӧрдны оз ков;

Кувӧмись некор эд повӧ –

Некор оз кув миян вов!

Вов миян кусны оз вермы,

Вовысвӧ оз вок кувӧм…

Вовья морт некор оз йӧрмы,

Мортысвӧ он тупкы ӧм.

Уна ми адздзывим шоггез –

Жалейтісь некин эз вӧв…

Вунӧтам сійӧ бур воннэз,

Шогсӧ мед нӧбӧтас тӧв!..

Некор шотчисьӧм ег тӧдӧ –

Кошшим ми век кынӧмпӧт.

Сьмевжыка Комиэз ветвӧ,

Миянӧс адздзасӧ мед.

Помдам ми сьмевжыка овны,

Миянвӧ шог – абу шог;

Дугдам ми лёккезвись повны –

Лёккесвӧ асьным ми лёк.

Гажажык Комиэз овӧ,

Кычӧ высинныт эз быр;

Миянвӧ гажыс и ковӧ –

Ась гаж-ован воас пыр.

Коми мортвӧ

Коми отир, тырмас узьны,

Порсьмоз нятьын боккез пӧжны.

Четчӧ, сувтам кок йывӧ,

Да чукӧртчам ӧтваӧ!

Ӧта-мӧдвӧ киэз сетам,

Кытш паськытджыкӧ ми керам,

Сувтам муввӧ веськыта,

Тальтчам кокӧн чорыта!

Кині кӧркӧ миян одзын

Овӧм эстӧн Коми муввын,

Пемыт вӧрсӧ ректӧма,

Вовсӧ ассис пуктӧма?

Миян айез, миян геддэз —

Миян бытшӧм Коми Морттэз!!

Нія эстӧн овӧмась,

Kӧзяиннас выдьдисьӧмась.

Ӧй, Миков, тэ дугды бӧрдны,

Бӧрдӧмӧн некин оз вермы

Ассис овансӧ кокньӧтны –

Ковӧ мыйкӧ мӧд нёдж керны…

Вок-ко вутштше ӧтваӧ,

Китӧ мыччы миянвӧ;

Ӧні кывзы — юрат варт,

Да эн шу, што кинкӧ враг...

Асват грекын мыжа тэ —

Тӧда эдӧ тэнӧ ме!

Одз тэ мӧдін йӧзӧ петны —

Коми мортісь рочӧ пӧрны,

Весь пышшавин сы дырна,

Кывтӧ чегин сы бурна.

Тэ думайтін — мыйвӧ-пӧ

Рочыт пӧдтас комисӧ!

А сія адздзан кычӧ пӧрис —

Коми кыввас нига петіс;

Адздзан, кыдзи том и пӧрись

Оз и кольтчы миян сьӧрись.

Мыйкӧ сэтӧн видно эм.

Мый тэ керан керны нем!..

Кывзы, Миков, пӧртчы мортӧ,

Вок-ко, вутштше, асват гортӧ,

Роч вадорас эн кежӧт,

Коми мортсӧ эн вунӧт.

Мунам вутштше ӧти туйӧт.

Керам ӧтваса ми кыйӧт —

Нятись комисӧ петкӧтам,

Бур олан сывӧ вайӧтам.

Питю-Ӧньӧ

Уд мортвӧ

Бур Уд мортӧй,

Отік вуджись

Кӧркӧ муввын

Тэкӧт чужим;

Орсны, сьывны,

Бурсӧ шуны

Ӧтік кывӧн

Мийӧ кужим.

Ӧтік гортын

Саридз сайын,

Дыр ми тэкӧт

Гажа овим;

Асьсиным нимсӧ

Сія муввын

Мийӧ йӧзвӧ

Тӧдны колим.

Саридз сайсянь

Ой вадорӧ

Ӧтік туйӧн

Кӧркӧ мунім;

Ӧтік дозйись,

Гажа-дырйи

Тэкӧт, вонӧ,

Сёйим-ювим.

Но, тыдавӧ,

Сьӧкыт туйнас

Выныс миян

Невна бырис,

Тӧдтӧм йӧзыс

Ой вадорӧ

Сэк миянӧс

Вӧгӧн иньдіс.

Пемыт вӧррес,

Паськыт нюррес

Дзебны кужисӧ

Миянӧс.

Ӧдьдьӧн сьӧкыта

Виль муввас

Миян аркмӧма

Ованыс!

Пемыт вӧрас

Ӧта-мӧдӧс

Мийӧ, вонӧ,

Тэкӧт ӧштім:

Кӧда татӧн,

Кӧда сэтчин

Пемыт вӧрпытшкас

Янсӧтчим.

Кыв вунӧтсис,

Вир сорвасис,

Увтыр мӧдӧрӧ

Пиньӧвтчис.

Ӧтік отир

Сякӧй нимӧн

Пондіс муввын

Асьсӧ шуны:

Кӧда – коми,

Кӧда – Уд,

Кӧда – Мари,

Кӧда – Чуд.

Сэки воктіс

Ыджыт пыжйӧн

Миян муввӧ

Рытсянь роч,

Воктіс, вермис,

Уна вийис –

Йӧзыс колис

Мувын шоч.

Перво Новгород

Ыжмитіс –

Ӧктіс сія

Сякӧй тор,

А сы бӧрын

Москва дорис

Кыдз некин эшшӧ

Эз дор.

Ован воис

Зубыт, сьӧкыт…

Кӧр норасян –

Роч серавис

Пыр миянвӧ,

Кыдзи чудвӧ

Сякӧй лёк-вирыс

Мытчавис!

Нужда кӧстіс,

Страм тӧждӧтіс –

Пондім тшыкны тэкӧт,

Вонӧ.

Вӧгӧн сьӧвзим,

Асьнымӧс чужйим.

Мӧдім рочӧ

Чожа воны,

Кыв вунӧтім,

Паськӧм вежим –

Рочыс эз пет –

Токон ӧшим.

Муса вонӧ,

Ми бӧбасим –

Пӧртчӧм-понда

Донӧн вештім!..

Рочыс рочӧн

Эд и чужӧ,

Оз вӧсьӧтчы

Нимсӧ вежны,

А ми-пиннэз –

Пиннэз чужам,

А тэрмасям

Рочӧ кежны.

Рочӧ кежам,

Ним ми вежам,

А бур миянвӧ

Оз-на во.

Ми вунӧтім,

Мый роч тӧдӧ –

Рочыс кывын-пӧ –

Роч вов.

Кӧр ми пондам

Этӧ тӧдны,

Сэки дугдам

Рочӧ пырны;

Сэк ми асьнымӧс

Ог сетӧ

Сьмеквын видзны,

Дзель моз шырны.

Сэк нуждаись

Чожа петам,

Сэк ог пондӧ

Тшыгйӧн кувны.

Сэк миянӧс

Мортӧ пуктас

Сякӧй отир

Паськыт муввын.

Тӧдны асьтӧ

Эшшӧ етша.

Ӧті кывнас

Ывӧ он мун –

Этӧн гажсӧ

Он судз, вонӧ,

Оз мичаммы

Миян веж му.

Ковӧ, вонӧ,

Ӧтваасьны,

Бур овансӧ

Чожа керны.

Ӧті дозйись

Сёйны-юны,

Ӧтік гӧрӧн

Мусӧ гӧрны,

Мед-бы мийӧ

Вермим муввын

Вились тэкӧт

Бура овны,

Мед некин

Миянӧс эз высь

Кувтӧдз жмитны,

Кӧртӧн дорны.

Тэ, уд морт,

А ме коми

Ӧта-мӧдвӧ

Киэз сетам.

Югыд туйвӧ

Пемыд вӧрись

Асьсиным отир

Ми петкӧтам.

Гаврив-Пёдор.

Тӧждісьӧм

Дзульзян кайӧн – ыбшарӧн

Томся кадӧ вебзис.

Пемыт нёштӧм кымӧрӧн

Пӧрись кадӧ воктіс.

Сьӧвӧм шогӧн кӧвьявис,

Вынӧс яйсим сӧскис.

Вира чужӧм чукравис,

Морос-сьпина кӧстіс.

Одздза томся думаӧс

Тшын-бусӧн сайӧвтіс,

Небыт, югыт сьӧвӧмӧс

Сімӧм кӧртӧ пӧртіс.

Ой-вун ӧні куйва ме —

Ог вермы ветвӧтны,

А вед вӧви визыв ме —

Выввам ва эз ӧшшы.

Кутча я уджавны,

Понда я гуляйтны —

Каждӧйӧс дивита,

Быдӧнӧс янӧта:

А то муна ӧтӧрӧт —

Юрӧс вывӧ вепта

Байита я нывкакӧт

Сьӧвӧм сывысь косьта!..

Мый-нӧ ӧні восьӧма,

Мыля вынӧ бырӧ?..

Видно, пӧрись воктӧма,

Кувны чожа ковӧ! —

«Кувны ковӧ» — ме-тай шуи,

А мый-нӧ сэтісь бурыс!..

Асвам векын тіли, тіли —

Эг кер керку юрӧс.

Поди шувас кин:

Пӧ ювис быдӧс асьсис бурсӧ.

Сійӧн-пӧ и колис кертӧг

Керку юрсӧ!..

Не челядь, не сійӧн,

Эг ме кужвы юны;

Пыр и пыр ме песси,

Сё мӧді вептісьны.

Токӧ уджӧ весьӧн

Менам пыр чувавис —

Лёк-вирыс, нуждаыс

Сививвам пукавис.

Питю Ӧньӧ

Миков песьсьӧ

Одзжык йӧзся Миков четчӧ,

Сёрӧн гортас ыбвись ветчӧ –

Вебны мӧдӧ пашняӧн,

Ован керны гажаӧн.

Гор-пинясӧ мед бура

Йӧзся одз вӧсьӧтӧма,

Буанкосӧ вердӧма,

Кӧдзысок чукӧртӧма;

Кольтчӧ токо петышны,

Кӧдзысоксӧ койышны,

Да мый тэ пондан кернытӧ:

Муыс етша кӧдзнытӧ!..

А сэтӧн гусьӧн, нёштӧма

Воктӧ пӧрись асныра

Кисӧ-коксӧ кӧртавӧ,

Морӧс, сьпина ыжмитӧ,

Сьӧд юрсисӧ чочкомтӧ.

Веськыт кияс бедь сетӧ.

Мый-нӧ ӧні нуждаыс,

Кытшӧм врагвӧ пашняыс,

Кольтчӧ токо куйвыны,

Да жагвыв кувӧм витчисьны!

Онтон Пёдор.

Коми сьыванкыв

Ови ме – тӧждіси пыр,

Бур овансӧ эг адздзыв;

Гажа вуннэс эз вӧвӧ,

Мича ойес эз оввӧ.

Шонді петас – коквын ме,

И кымӧссим ва ветчӧ;

И уджаван сідз вунтыр –

Асвыт места он адздзыв.

Гортӧ воктан – инь видӧ –

Весь овисьӧн пыр шуӧ,

Челядёккес горзӧны –

Сёйны-юны корӧны…

Ок тэ менам не ован,

Кӧр тэ ме дынысь мунан?..

Мун-жӧ чожжык умӧльвун,

Коль менӧ кымӧра ой!!...

Тӧда эд – тэ ме дынісь

Кыдз гӧглян тарӧвтчыштан,

И суседдэс ме-йывись

Дугдасӧ серавны сэк,

Инька дугдас витчыны,

Зонэз, ныввез горзыны…

Гажа письня керкуись

Оз понды петаввыны.

Казантсов Петра

Бордтӧм варыш

Ок, кӧбы верми ме

Йӧзсӧ саймӧтны,

Ок, кӧбы кужи ме

Сійӧ четчӧтны!

Ок, кӧбы шонді-моз

Асвам ме басьниӧн

Йӧзысвись сьӧвӧмсӧ

Кужи сывӧтны –

Сэк бы ме чепӧсьси,

Ёнджыка горӧті,

Быдваись ӧтваӧ

Йӧзсӧ грудиті;

Шапкаӧс чапки-бы,

Сувті вывӧджык,

Синӧн, кыдз югӧрӧн,

Йӧзвӧ видзӧті.

И сэк-бы висьтави ме,

Мыля сідз сьӧкыт,

Зубыт да курыт

Йӧзысвӧ овны!..

Сэк-бы вевӧті ме

Асвам бур сьӧвӧмӧн

Кыдз ковӧ дугдыны

Лёк йӧзвись повны!

Гаврив-Пёдор.

Коми нывӧй

(Вӧсьӧтӧма зыранскӧйӧ)

Коми нывӧй, мича нывӧй,

Эн тэ сэттшӧм норӧн сьыв,

Мед ми том йӧз эгӧ кывӧ

Тэнчит нора сьыванкыв!

Мый тэ ӧні инӧ бӧрдан,

Гажӧтчыны ковӧ кӧр,

Кӧр тэ воан жӧниксайын,

Бӧрдны воас сэк некӧр.

Ештан эшшӧ пӧрисьмыны –

Норӧн сьывны письнятӧ,

Горвыв сёрдас пыр пукавны –

Кисьны асьсит синватӧ.

Так сьыв-жӧ, сьыв-жӧ, коми нывӧй,

Кычӧдз том кадыт эз быр;

Сьыв-жӧ, гажӧт коми йӧзсӧ –

Гажыс ковӧ сывӧ пыр!

ñ

Том ныввезвӧ

(Вӧсьӧтӧма зыранскӧйӧ)

Гӧгрӧс чужеммез,

Вира чужеммез,

Басӧк каджоккез,

Чожа серӧммез,

Бытшӧм ныввезӧй! (2 ись)

Ӧтпыр оватӧ,

Чожа быратӧ,

Кыдз-тай ыб дзаричез *

Чожа косьматӧ,

Арӧн кисьсятӧ. (2 ись)

Сьывӧ, гажӧтчӧ

Гажа том кадас,

Кужӧ овнытӧ

Чветитӧм пораас.

Шогвӧ эд сетчӧ! (2 ись)

Пемыт думаэз

Юрись вашӧтӧ,

Умӧль овансӧ

Бокӧ вештыштӧ

Гажа письняӧн. (2 ись)

Гӧгрӧс чужеммез,

Вира чужеммез,

Гора говоссэз,

Басӧк каджоккез,

Кужӧ овнытӧ! (2 ись)

Ичмоньвӧн тӧждісьӧм

Мыля жӧ менӧ ті,

Айиньӧй-маминьӧй,

Рӧдимӧй воніньӧй,

Сёйӧмӧн сёйитӧ —

Жӧниквӧ сетітӧ

Пӧрисьыс сайӧ? (2 ись)

Асваным увтырын

Ме я умӧль вӧви,

Ме я не чож вӧви

Видзвын и ыббывын,

Сякӧй уджаванын,

Ыджыт туйын?.. (2 ись)

Так мыля-нӧ менӧ ті

Этчӧдздзис воштітӧ,

Сёйӧмӧн сёйитӧ,

Юрӧс урсавитӧ —

Жӧниквӧ сетітӧ

Пӧрисьыс сайӧ?.. (2 ись)

Питю-Ӧньӧ

Горттӧм кӧк

Эшшӧ тӧн менам эта пораӧ

Ӧдьдьӧн личкасис шогӧн сьӧвӧмӧ;

Эшшӧ тӧн рытсянь витчися эстӧн

Асьсим модзокӧс да сердешнӧйӧс.

Шонді рас сайсянь вонӧ петӧ ни,

Менам модзокӧ некӧ воктӧ ни!..

Муна сы дынӧ паныт котӧрта,

Морос бердас ме сывӧ ыжмитча,

Басӧк чужӧмсӧ кута окава,

Вӧлись сы бӧрсянь босьта висьтава.

Ок тэ сердешнӧй менам другиньӧй,

Батюшкоиньӧй, сьӧвӧмшӧриньӧй,

Менӧ гортын-эд тэтӧг сёйисӧ —

Мӧді морт сайӧ рытнас ювисӧ.

Ашын ки кутны бӧра воктасӧ,

А кресенняас венеч пуктасӧ!

Токо айӧвӧ тӧн ме висьтави

Мыся ог ме веж другӧс страмысвӧ,

Мыся сьӧвӧмам вутштше пурт мӧртӧ,

Нето пельпонвись менчим юр босьтӧ –

Токо Ванюкӧт эдӧ янсӧтӧ,

Нечулимысвӧ менӧ эд сетӧ!..

Айӧ пондіс сэк вӧгӧн витчыны,

Мамӧ горвыввын норӧн горзыны:

«Мыйвӧ тэнӧ-пӧ инӧ быдтімӧ,

«Удім-вердімӧ, мортӧ воштімӧ,

«Кӧр тэ он кывзы айвись-мамвись кыв –

«Тэ-пӧ кытшӧм-нӧ сэки нывӧ ныв?!

«Босьт-пӧ конувтат ӧтік нинкӧм гоз

«Да мун шатвасьны Шатун Павадь-моз!»

Сэки понді ме норӧн горзыны,

Айӧ-мамӧвӧ причот пуктыны:

Мыйвӧ мыся тэ менӧ, маминьӧй,

Кӧркӧ чужтӧмыт – йӧзат ведзӧмыт,

Мыля юрвам тэ абу тальтчӧмыт!?

Вӧви вутше-бы муын сісьмыны,

Чем-бы кыввесӧ энӧ кывзыны!..

Эшшӧ ёнджыка айӧ ракӧстіс;

Воктіс, тальыштіс, юрӧс кватитіс;

Пондіс кыскавны менӧ чикисьӧт,

Тальны, чужьявны чочком моросӧс.

Сэсься ыбӧссӧ паськыта осьтіс,

Ворота сайӧ менӧ тойыштіс.

«Мун-пӧ, вакрамеш тэ, лешаквӧн ныв,

«Мед ме тэнчит эг и сьлед адздзыв!»

Ачыс пырис да мыйкӧ бракнитіс,

Вӧгӧн иньысвӧ мыйкӧ горӧтіс...

Ворота саяс дыр ме сувави,

Кытчӧ мунны-бы, пыр ме думайті.

Петі ыбвывӧ, пукси межаввӧ,

Понді видзӧтны асыв вадорӧ.

Ӧті местаас ой быт пукави –

Тэнчит воктӧмтӧ пыр ме витчиси.

Ок, ӧті морт оз тӧд менчим овӧмӧс,

Некин оз бурӧт менчим сьӧвӧмӧс.

Токӧ ӧтнат тэ, менам сердешнӧй,

Менӧ бурӧтан, менӧ гажӧтан.

Питю-Ӧньӧ

Сьыванкыв

Мыля меным томвӧ,

Инӧ сідзи сьӧкыт,

Мыля вын кусінтчӧ,

Мыля муввын дзескыт?...

Мыля юрын дума

Кырныш-моз пукавӧ,

Вем пыдӧсӧс менчим

Ой и вун кокавӧ?..

Мыля вирӧ биӧн

Вывтыр менчим сотӧ,

Косьтӧ паськыт морос,

Сьӧвӧмӧс лямӧтӧ?

Неважын-тай эшшӧ

Пыр ме йӧкті-сьыви,

Том челядьыс шӧрын

Тӧв сьӧрын вӧтвиси,

А ӧні меным томвӧ

Мый-нӧ сэттшӧм воис —

Сы одза шог кутіс,

Вовйӧн менӧ сёйис!

Гаврив-Педор.

Сьӧвӧм доймӧ

Мыля тэ, сьӧвӧм, сыбура дойман,

Он ведз гажӧтчыны дыр?

Кывзы кыдз орсӧ сэтчин том челядь –

Сьывӧ да шутнявӧ пыр.

Тырмас тӧждісьны – том кадыс мунӧ,

Мунӧ и оз берт некӧр.

Пым вир сайкавас, вывтырыт важмас,

Шог сьӧкыт кутас и он ни сэк вӧр.

Дугды-жӧ висьны, ӧзйыны биӧн,

Шонді-моз югьяв ывӧ,

Видзӧт-жӧ мунда том ныввес миян,

Нійӧ тэрмасьны любитны ковӧ!

Гаврив-Педор

Шудтӧм

(Часьсьӧтӧм)

Медбӧрья югӧрнас шондіыс орсӧ,

Керку ӧшыннесӧ гӧрд бийӧн ӧзтӧ.

Кӧдзыт ой вадорсянь пондіс вайӧтны;

Сук ру ва вевдӧрсянь вывваньӧ вебны.

Кыз пужӧн быдтор ӧтӧрас катьтисьӧ,

Воно кинвӧнкӧ и печка вонтісьӧ.

Тшыныс трубасис тшакыльлезӧн петӧ,

Керку юр вевдӧрас кымӧрӧ пӧрӧ.

Пемдіс ни. Шы не тӧв. Гӧгӧр дзик узьӧ.

Токо картаввысянь пон увтӧм кывӧ,

Да чудыс кымӧснас сьтенаэз люкавӧ.

Нёбоыс омӧн кӧдзувӧн вевтисьӧма,

Кыдзи кин доннэзӧн сійӧ серӧтӧма!

Югьявӧ кӧдзув да орсӧ быд нёджӧн:

То ӧтваӧ воас, то паськавас вожӧн,

То нёбоӧт ывӧ ньӧв ёсьӧн тюйнитас,

Пемытсӧ бийӧн янсӧтас да ӧшас...

Ас мознас нёбоыс овӧ-гажӧтчӧ,

Оз видзӧт немвӧ, мый сы увтын керсьӧ!

Ок кытшӧм басӧк эд быдторсӧ керӧмыс,

Ок кытшӧм довыт ӧтӧрысвӧн овӧмыс!..

Сы-сьӧрті ровно и йӧзысвӧ ковӧ-бы

Бура да бытшӧма, довыта овны.

А сія не сідз тайӧ мыйкӧ пыр петӧ –

Вынаыс вынтӧмсӧ сёйӧ да пӧдтӧ!

Сэтчин вон – ыб дорын керку тыдавӧ,

Биыс ӧшынас кӧдзув-моз-жӧ орсӧ:

Югнитас, кусыштас, – бӧрана вебас,

Ӧшын тыр югытсӧ кисьтас да ӧшас…

Веськыта керкуас паськыт вабичвын

Инька пукавӧ да печкӧ печканвын.

Важмыт мыгӧрнас, векнит чужӧмнас

Зэв натьтӧ бытшӧм эд вӧвӧма томнас,

А ӧні ованыс кык кусінь кӧстӧма,

Чужӧмсӧ кельдӧтӧма, высинсӧ косьтӧма.

– Летыштас кудельсӧ, сартассӧ пешас,

Сывсӧ нюжӧтас да шовк чуньнас керас.

Аслас синваэз кыдз шоррез котӧртӧны,

Одзас пидзӧспонас сюв сорнас кисьсьӧны.

– Джодж шӧрас пасьсезвын зоночка куйвӧ,

Мамыс чужӧмвӧ гусеник видзӧтвӧ.

Тӧдӧ-бы, мивӧйыт – мыйись мам бӧрдӧ,

Мыля синваэсӧ сыбурна кисьтӧ;

А шы сетны оз ыысьт – бытьте кыдз повӧ.

Ӧдьдьӧн ни жаль сылӧ мамуыс воис,

Четчис да нёжыник дынас сибӧтчис:

– «Маму, а маму, мыйись тэ бӧрдан?

«Мыйись-нӧ пыр тэ синваэтӧ кисьтан?

«Чӧв, маму, дугды – на синнэтӧ чышкы!

«Ӧні вот зонытвись кыввесӧ кывзы:

«Адздза ме, маму, кытшӧм тэныт сьӧкыт,

«Адздза кытшӧм тэнат сьӧвӧмвӧ зубыт!

«Но вот, чожа ачым ме ыджыт ни воа,

«Айӧвись тэнӧ ме ас дынам босьта!..

«Сэки тэ дугдан и вӧззэз новйӧтны,

«Сэки тэ дугдан и уджӧ петавны!»

Ёнджыка одздзася мамыс герйӧвтіс,

Зонкасӧ окыштіс, киэзвас босьтіс…

– «Ок кӧбы кыввет да ен пельльӧ пырасӧ,

«Менам синваэзӧ сы дынӧдз воктасӧ!..»

Сэсся эз ешты и ӧтік кыв шуны –

Пондіс картаввысянь ёркӧтчӧм кывны.

– «Чӧв, кага, айыт, чу, некӧ ни воктіс:

«Кывин ыбӧссӧ кыдз дзирвысис осьтіс!?

«Мун чожжык комас пыдӧжык дзепсись

«Да мый-бы эз вӧв эстӧн – эн и мытчись!»

Ачыс котрасьны джодж-пӧв кузя пондіс,

Мый матын куйвӧ – пыдӧджыка дзебис,

Бура жӧниквись ӧбичейсӧ тӧдӧ –

Кодувьяс сӧтӧ – мый киувтас шедӧ!..

Увись посӧдзпонас кывӧ рякӧстіс,

Керку ыбӧссӧ мый вермис летыштіс…

Пырис да иньысвӧ перво и дӧвгис:

– «Страм жуг, паршивӧй, тэ сідзи стречайтан?

«Мый бекӧр-синнэтӧ одзам бывӧтан?!

«Он адздзы, умӧль-морт, кин гортӧ воктіс?..»

Наокмаш иньысвӧ ныр кузяс сӧтіс.

Нырись и ӧмись сук-вир чепӧсьсис,

Чужӧмсӧ гывьявис, моросвас гыдіс.

Эз эдӧ инькаыт местасис вӧрзьы,

Эз эдӧ сы одзись некычӧ пышшы!..

Кӧзяиныс одзын кыдз дорӧм сувавӧ,

Молитва кытшӧмкӧ гусеникӧн выдьдьӧ.

Мӧдысвӧн синнэсис би пондіс четчыны;

Уськӧтчис иньысвӧ сякӧй нёж вартвыны…

Перво-жӧ юр кузяс раз мӧд и сӧтіс,

Джоджас тарӧвтіс да юрсиӧт кутіс;

Пондіс чужьявны, нинкӧммезнас тальны,

Юрсиӧт джодж кузя пондіс кыскавны.

Кыскавис, кыскавис – сы бӧрын дугдіс –

Виднӧ эд ёна-кодь вартвӧмнас мыдзис.

А иньыс синва сорӧн одзас кевмисьӧ, –

Коквас юрбитӧ, пидзӧсвас кыскасьӧ:

«Батюшко менам, мый тэныт воис?

«Мый тэныт инь жугыт умӧльсӧ керис?

«Мыля-нӧ, соков, тэ сідз менӧ вартван?

«Виян-кӧ – ӧтнат-эд, беднӧй, сэк колян!..

«Кин тэнчит зонтӧ сэк йӧзас петкӧтас?

«Кин сьӧкыт уджас тэнӧ сэк вежас?»

– «А-а! Дак тэ сайын югытыс, лёк вир, думайтан,

«Этатштшӧм кыввезӧн менӧ повзьӧтван!..

«Вия, паршывӧйӧс, ки-кок-тӧ чега,

«Томӧс да басӧкӧс вӧлисьтен босьта.»

Четчӧвтіс, юрсиӧт бӧра кватитіс,

Нырӧмсӧ лязіс да ӧтӧрӧ чапкис.

Кӧмтӧг, дубастӧг бедняжкаыт куйвӧ,

Оз вермы вӧрзьыны, кысьсьыны туйвӧ.

Куйвӧ посӧдзпонын дзик кыдзи кувӧм,

Сьӧд-вир кокольлезӧн вым сорнас кынмӧм;

Ружтӧ небурика; ёна и сьӧкыт...

Ӧтпӧвсӧн куйвыны куш вымвас кӧдзыт...

Ӧстаткися садьсӧ кыдз вермис чукӧртіс,

Четчис – ляшмасьӧмӧн, суседӧ пырис;

Пондіс вӧлисьтен синваэсӧ кисьны,

Асвыс кувӧмсӧ енысвись корны.

– Ок тэ, инькаиньӧй, небыт сьӧвӧминьӧй,

Сьӧкыт овансӧ быт век нӧбӧтісиньӧй.

Муввас тэ чужин – невестаӧдз быдмин,

Быдмин – жӧниксайӧ йӧз пытшкӧ мунін;

Овин и ован пыр тшын-бусӧн пӧдан,

Нять пытшкын шоггезӧн мыватӧ ӧштан,

Сьӧкыт работаись он и петаввы,

А синувтсит вӧзыс тай оз и быраввы!..

– Воктас я кӧркӧ бур асывыс тэныт,

Чапкас я шондіыс югӧрсӧ паныт,

Вӧтвас я лёк вунсӧ, ваяс я бурсӧ,

Шонтас я сьӧвӧмтӧ, содтас я вынтӧ?!

Питю-Ӧньӧ

Гов

Не гуна, не карта,

Керкуыс пӧвиньтчӧм.

Коккес кушмӧмась швач,

Поньток жугыс кисьсьӧм.

Олӧ да гажӧтчӧ –

Шогсӧ ӧтпыр оз тӧд.

Мый бы сыкӧт эз вӧв,

Юр некӧр оз ӧшӧт.

Куим вун кӧр оз сёй –

Некинвӧ оз висьтась,

Сусед ӧшын увтын

Кинкӧ моз оз кыскась.

Кӧр сійӧ ни ӧдьдьӧн

Шогыс кутас сьӧкыт,

Кӧр мӧдіккес шӧрын

Залиш воас дзескыт –

Ветчас сэки видзвӧ

Раз-мӧд сьвис шутьньӧвтас,

Водас бадьдез увтӧ,

Сьывны письня пондас.

Куйвӧ порой вунтыр

Письня ассис сьывӧ –

Умӧль овӧм ёрдӧ,

Бур овансӧ ошкӧ.

Питю-Ӧньӧ

ñ

Сьыванкыв

(Важся прогвазӧн)

Пемыт ойӧн да арся кадын,

Ок менӧ кӧркӧ мамӧ чужтӧма; (2 ись)

Сизим арӧн да шӧрттӧм дӧра

Ок паськыт муввас панны тшӧктӧма. (2 ись)

Муна ветча да Вӧзъясинмӧ,

Ок Иньвадорсӧ дыр ме видзӧта; (2 ись)

Кыска пиись да чочкӧм чышьян,

Ок макнита да сьвис ме шутьньӧвта. (2 ись)

Сэки воктас да бытшӧм нывӧ –

Ок Ӧнисьсяӧ Ыджыт-Шуваись. (2 ись)

Воктас бокам да пуксяс матӧ

Ок шогӧс пондас пӧльтны сьӧвӧмвись. (2 ись)

Босьта кийӧ да ме гармоньня,

Ок, пики-вики ӧтпыр керышта, (2 ись)

А сыбӧрын да бокӧ чапка,

Ок Ӧнисьсяӧс размӧд окышта; (2 ись)

Эшшӧ ӧтпыр да зубытжыка

Ок Веркиньваввам бӧрам видзӧта. (2 ись)

Кырас дорас да ыджыт извӧ

Ок босьта сувта-тальтча чорыта; (2 ись)

Ачым киэз да вывӧ вепта,

Ой шапка чапка, ваас четчӧвта. (2 ись)

Иньва ваыс да менӧ босьтас,

Ок кувӧм шойӧс менчым ньывыштас, (2 ись)

Сэки овӧм да менам ештас,

Ой Ӧнисьвӧн сьӧвӧмыс потас (1 ись).

Питю-Ӧньӧ

Сьыванкыв

Эн тэ сьыв (да) эн шутьняв сідз,

(да) басӧк кайиньӧй,

Эн тэ орсжӧ асват борддэзӧн

(да) менам син одзын!

Сёйӧ сёйӧмӧн (да) менӧ ой и вун

(да) асвам айиньӧй,

Оз ведз сьывны (да) оз ведз йӧктыны

(да) мивӧй друг одзын.

Мӧдӧ потны (да) менам сьӧвӧмӧ

(да) чочкӧм морӧсын,

Мӧдӧ вебны (да) сія кокнит пӧткаӧн

(да) пемыт вӧр сайӧ.

Ок, мыля-жӧ (да) ме не кайӧн шогми –

(да) учӧт ыбшарӧн?

Сэк-бы арнас ме (да) татісь вебзьышта

(да) саридз сайӧ.

Гаврив-Пёдор

Лён

Меным айӧ кӧдзис лён,

Бур да бытшӧм быдмис лён,

Ак тэ дивӧ быдмис лён. (2 ись)

Лёнӧс асьсим ме весӧті —

Лёк турунсӧ вуджнас леті,

Ак тэ дивӧ вуджнас леті. (2 ись)

Да вевавис лён пытшкас

Йӧгись Ваню Пронь быдтас,

Ак тэ дивӧ Пронь быдтас, (2 ись)

Лёнӧс менчим быдӧс талис,

Сьӧд мусиннас бергӧтіс,

Ак тэ дивӧ бергӧтіс. (2 ись)

Висьтави бы айӧвӧ,

Да жаль меным Ванюӧ.

Ак тэ дивӧ Ванюӧ.

Пета тавун ой шӧрӧн

Да вапкися сьӧд шальӧн,

Ак тэ дивӧ сьӧд шальӧн. (2 ись)

Ванюӧс ме витчися,

Голя бердас кутчися,

Ак тэ дивӧ кутчися. (2 ись)

Размӧд сійӧ окышта.

Сьӧвӧм асьсим бурмӧта

Ак тэ дивӧ бурмӧта. (2 ись)

Розосвосӧ витчисям,

А сы бӧрын гӧтрасям.

Ак тэ дивӧ гӧтрасям. (2 ись)

Питю-Ӧньӧ

Морозко

(Учӧт челядьвӧ)

Бедьдьӧн дзурликасьӧ,

Ведзӧ кӧдзыд ру,

Быдӧнкӧт тышкасьӧ,

Ӧктӧ шоныт ру.

Юрси вӧгӧн ведзӧм,

Тошыс кок увтӧдзис пыр,

Выввас дзульлез гӧгӧр ӧшвӧм,

Воктас керку одзӧ,

Бедьнас сӧтас квотш,

Муввӧт ачыс кыскӧ.

Вымкодь чочком тош.

Кычӧ бедьнас сӧтас, –

Сэтчӧ воас шель,

Кыті тошсӧ кыскас –

Сэтчӧ оз коль жель.

Кӧдзыт русӧ ведзас –

Катьтяс пужӧн кер,

Ӧшыннэз серӧтас –

Мый некин оз кер.

Сывись быдӧн повӧ:

Морт и сякӧй зьвир,

И кыдз шедан – ковӧ

Дзебны пасьӧ ныр.

Питю-Ӧньӧ.

Мыйкӧ скаски-кодь

Иньвадорсянь вӧр шӧрӧ

Чуклясьӧмӧн туй мунӧ;

Пуэс сійӧ жмитӧмась,

Бытьте гагӧ пӧртӧмась.

Ывӧ, ывӧ сія сідз

Мунӧ, кычӧдз оз вок видз,

А сы бӧрын кежӧтӧ

Югыт визыв шор дорӧ.

Сэтӧн эта шор дорын,

Рас-дор паськыт кушинын

Юртӧм керку сувавӧ,

Асьсис боксӧ мытчавӧ.

Карта стоббес пӧрӧмась,

Воротаэс кисьсьӧмась.

Ӧшынӧ сьтёкво туйӧ

Брушина пелитӧмась.

Посӧдзыс ветчисьӧма.

Угӧв потшӧн пыкӧма —

Ывисянь кӧ дзар керан —

Бытьте пӧрись морт адзан.

Бытьте бедьвас нырыштӧм,

Юрсӧ ассис ӧшӧтӧм,

Пӧрись вывсис думайтӧ —

Кольны овансӧ мӧдӧ.

— Ком угӧв ӧшын весьтӧ,

Векнит канава дорӧ

Ыджыт льӧмпу быдмӧма,

Керку юрсӧ вевтьтьӧма.

Вывись уввес косьмӧмась,

Увисьсес чегвасьӧмась,

Важ лиссэс кельдӧтӧмась,

Кокувтас усявӧмась.

Важся эта льӧмпуыс!..

Оз и тӧд кӧзяиныс

Кин сійӧ пуксьӧтӧма —

Вердӧма, зорӧтӧма.

Оз тӧд рас-дор кушиныс,

Оз тӧд дажже керкуыс,

Кысянь сійӧ воӧма —

Сы пасьта паськавӧма.

Тӧдӧ ӧтнас токо шор,

Кӧда дзольгӧ кырас дор

(Чорыт изсӧ гыжьявӧ,

Ва пыдӧссӧ паськӧтӧ).

Частӧ порой ой шӧрӧн,

Кӧр узьӧтӧ бур онӧн,

Сія пукӧт сёрнитӧ —

Важ овӧмсӧ висьтасьӧ.

— «Важын, важын эстӧн вот

Кӧркӧ овӧм-пӧ морт,

Сьӧд мичорӧн шусьӧма,

Кӧйинӧн нимтісьӧма.

Воктӧм сія ывисянь,

Паськыт Кама-ва сайсянь

Сэтчин овӧм розбойӧн,

Висьтасьӧма тӧдісьӧн.

Тӧдвӧм быдьтӧ шуч:

Кужвӧм керны мортісь руч.

Кама-васӧ прудитвӧм,

Кымӧрресӧ пыквыввӧм.

Питю-Ӧньӧ

Коми вевӧтчисьвӧ

Ован вӧван бур мортіньӧй –

Коми ввӧтчисиньӧй!

Сьӧвӧмсянь тэныт ыста ёр,

Мед бытшӧм воас сякӧй тор;

Высиныт мед оз кусіньтчы,

Сьӧвӧмыт ась оз джугыльтчы!..

– Уль вӧр шӧрись – деревняись

Уджавись пемыт вӧр пытшкись

Тэ воктін таччӧ шковаӧ,

Ёнмӧтны асьсит мывкыдтӧ,

Вевӧтчыны, гажӧтчыны

Да тӧдісь мортӧ пӧртчыны.

Чувавас во, чувавас кык

Тэ воан сэки кыдз мӧдік –

Пыдӧджык пондан видзӧтны,

Унаджык пондан адздзыны.

Быд ованвӧн сьӧд гыжувтыс

Лёк йӧзвӧн сякӧй падежыс

Тыдавны пондас син одзын,

Кыдз майся рытӧн ва дорын.

Сэк кык туй одзат водасӧ –

Кыкнанныс корны пондасӧ,

Мед мунін-бы ӧтіквӧттис,

Мед мунін-бы мӧдіквӧттис.

Ӧт туйыс волькыт чветтэза

А мӧдыс нятя, жельнӧга…

Ӧт туйвӧт озыр * морт ветвӧ,

(Мӧдіквись кӧда вир ювӧ),

А нятя туйвӧт куш мунӧ –

(Мӧдіквӧ кӧда бур керӧ).

Думайттӧг тэ эн кинитчы,

Мед сы бӧрын эн каитчы –

Што мунсьӧм-пӧ не сэті-тай –

Эг адздзы муввын асвым рай.

Эн вунӧт асьсит чужӧмтӧ,

Уль вӧр ковасис петӧмтӧ,

Сьӧд мыррез шӧрын быдмӧмтӧ!

Эн вунӧт, што деревняын

Бус пытшкын да нять пытшкын

Тэнад воннэз колисӧ,

Тэкӧт-жӧ кӧда быдмисӧ.

Тшын-бус шӧрас да нять пытшкас.

Баксявӧм чорыт нянь дорас

Кыдз тшаккез вӧрын рушмӧны,

Кыдз гуттэз нія кувӧны…

Вот эм-кӧ тэнат мываыт

Да пизьӧ гыркат пым вирыт –

Мун веськыта куш туй-кузя,

Эн кеж мӧдікваас чветавас –

Эд чветтэз нія каемась

Уджавись отир шойезвӧ

Нія чорыт выэзвӧ (коскаэзвӧ)!..

Так коми морт, вевӧтчись морт,

Эн вунӧт-жӧ тэ асьсит горт!..

И ёнмӧм, бурмӧм мывкыдтӧ,

И асьсит довыт овантӧ –

Быдӧс сет асват воннэзвӧ,

Кайӧт нійӧ тэ керӧсвӧ,

Мед дугдасӧ ни пӧднытӧ,

Мед дугдасӧ ни кувнытӧ!

Питю-Ӧньӧ

Сьыванкыв

(Зырянскӧй вӧсьӧтӧма)

Уна нывез чукӧртчисӧ, (2 ись)

Зон, зон мича нывез,

Зон, зон коми ныввез,

Чукӧртчисӧ. (2 ись)

Иньва дорӧ котӧртісӧ, (2 ись)

Зон, зон мича ныввез сідз одз...

Паськӧмсӧ чӧвтависӧ, (2 ись)

Зон, зон с.одз…

Бадь куссэз увтӧ пуктависӧ, (2 ись)

Зон, зон с.одз…

Асьныс ваӧ четчависӧ, (2 ись)

Зон, зон с.одз…

Дыр ваас тульӧтчисӧ, (2 ись)

Зон, зон с.одз…

Василиса кынмавӧма, (2 ись)

Зон, зон с.одз…

ñ

Коми отир!

Коми отир, асват муввын

Бура овны тэ он куж, –

Нятьын чужан, нятьын быдман,

Пыр нӧбӧтан сьӧкыт удж.

Век уджавны весись песьсян,

Нянь оз тырмы – тшыгйӧн куван,

Кольтчан овны – кувтӧдз дойман,

«Шогыс енсянь» токо шуан.

Ован-горзан – ачыт тӧдан,

Кӧр норасян – роч серавӧ,

Тэввӧ чуньӧн кыдзи чудвӧ,

Сякӧй лёквир пыр мытчавӧ.

Нужда кӧстӧ, страм тӧждӧтӧ…

Зубыт, сьӧкыт тэныт овны!..

Вӧгӧн сьӧвзин асьтӧ чужйин –

Мӧдін рочӧ чожа пӧрны!..

Кыв вунӧтін, паськӧм вежин –

Рочас эн во – асьтӧ ӧштін.

Коми отир, тэ бӧбасин,

Пӧртчӧм-понда донӧн вештін!..

Рочыс рочӧн-эд и чужӧ,

Оз вӧсьӧтчы нимсӧ вежны,

Тэ-жӧ коми – коми чужан,

А тэрмасян рочӧ кежны!..

Рочӧ кежан, нимтӧ вежан,

А бурыс тэныт оз-на во;

Тэ вунӧтін мый роч тӧдӧ:

«Рочыс кывын-пӧ – роч вов!»

Кӧр тэ пондан этӧ тӧдны,

Сэки дугдан рочӧ пырны,

Сэки дугдас тэнӧ кувтӧдз

Сякӧй лёквир дзельмоз шырны.

Сэк нуждаись чожа петан.

Сэк он понды тшыгйӧн кувны,

Сэки мортӧ тэнӧ пуктас

Сякӧй лёквир паськыт муввын.

Гаврив-Пёдор

Сьыванкыв

(Зырянскӧйӧ вӧсьӧтӧма)

Унаись ме сьывывви,

Йӧзсянь атьте кывывви –

Пӧлянӧн-моз пиксася,

Йӧз сьӧвӧмӧ кытсася

Коми сьыванкывйӧн (2-ись).

Менам сэттшӧм ованмог –

Оввӧ гажа, оввӧ шог!

Гажыс-дырйи орсышта,

Гажыс бырас шогсьышта

Коми сьыванкывйӧн (2-ись)

Вот-эд менам овӧмӧ –

Гажа муввас дзользьӧмӧ;

Пӧрисьма кӧр – ваньтышта,

Ован жальӧн казьтышта –

Коми сьыванкывйӧн (2-ись).

Менам сьывӧм оз-на быр –

Кувтӧдз кута сьывны пыр;

Коми йӧзсӧ гажӧта,

Шогсӧ сывись вашӧта

Коми сьыванкывйӧн (2-ись).

Кӧр ме сьыва – осьсьӧ юр,

Пыр ме сьыва мый мед бур;

Лёка овӧм нетшкышта,

Бура овӧм ошкышта

Коми сьыванкывйӧн (2-ись).

Кывзӧ бур йӧз сьывӧмсӧ –

Быдӧс миян овӧмсӧ,

Овӧ пыр бур сьӧвӧмӧн,

Ован кольвӧ сьывӧмӧн

Коми сьыванкывйӧн (2-ись).

Нёбдінса Виттор.

(Зырян).

Сьыванкыв

Муна, пыра пемыт вӧрӧ,

Пожум йывас кайышта,

Кудымкарвань, Иньвадорас,

Сьӧвӧм шогсӧ иньдышта.

Сэтчин овӧ менам другӧ,

Сьӧд синкыма Ванюӧ;

Сія менӧ-тай вунӧтіс,

Пышшис син одзись ывӧ.

Весь витчиси пемыт рытӧдз,

Эз вок менам другиньӧй;

Сія оз тӧд кыдзи висьӧ

Менам, томвӧн, сьӧвӧмӧй.

Ме я сійӧ эг любитвы,

Бур сьӧвӧмсянь эг окав,

Сьӧкыт дума, лёк тӧждісьӧм

Тӧввӧ ведзны эг отсав?

Мӧдвӧ менӧ Ваню вежис,

Сьмеквӧ, страмвӧ кольӧма…

Видно енсянь меным, томвӧ,

Овны шудтӧг пуктӧма.

Мыйвӧ овны муввын ӧні,

Кӧр вунӧтіс другиньӧй…

Муна уся пемыт тыас –

Менӧ босьтас ваиньӧй.

Ась гажӧтчӧ мӧдкӧт Ваню,

Оз тӧд кувтӧдз тӧждісьӧм,

Ме-же, беднӧй, пыдын ваас

Асвым адздза дзепсисьӧм.

Гаврив-Пёдор

Сьыванкыв

(Важся прогвазӧн)

Кӧкӧ горттӧм сера, басӧк кӧкиньӧй

Парма яг шӧрын;

Норӧн бӧрдӧ чочкӧм юра нывиньӧй

Югыт шор дорын: –

«Чожа ид шепьясяс паськыт ыб шӧрын,

Пӧдтас кӧквись горш —

«Петырвун сибӧтчас, чожа сы бӧрын,

Нуас менчим горт.

«Тӧдтӧм йӧз пытшкӧ да пемыт вӧр шӧрӧ

Гортсим иньдасӧ.

«Чужӧй нянь дорӧ да нелюбӧй сайӧ

Менӧ сетасӧ.

«Ог ме понды сэки югыт шор дорас

Эстӧн пукавны,

«Небыт турунвас да чочком кыдзувтас

Другӧс витчысьны!»

Питю-Ӧньӧ

Вевӧтчӧм йӧзвӧ

Коми муын чужим,

Миянісь морт аркмис

Роч ковасын быдмим, –

Коми мортыс вуніс.

Мунны ковӧ гортӧ,

Пемыд йӧз саймӧтны:

Дыр сія-ни бӧрдӧ,

Сир-нятьсис петкӧдны.

Уна мийӧ тӧдам,

Синыс миян осьсис.

Мый вевӧтім – сетам –

Юраным мый босьтім.

Ӧні йӧзыс саймӧ,

Югыд сія корӧ.

Нига-гижӧд вайны

Регыд нывӧ ковӧ.

Мийӧ татӧн овам,

Гортнымӧс вунӧтім,

Гортӧ мунны повам

Пемыд йӧз саймӧтны.

Кыдзи ог ми мунӧ –

Ёрдас Коми муыс;

Сійӧ бур йӧз тӧдӧ,

«Кӧчӧн» быдыс шуас!

Вась. Дерябин.

ПЫТШКӦС:

Вас. Дерябин. Иньтернатсіонал

[Питю Ӧньӧ]. Гажажык Комиэз овӧ!

Питю Ӧньӧ. Коми мортвӧ

Гаврив Пёдор. Уд мортвӧ

Питю Ӧньӧ. Тӧждісьӧм

Онтон Пёдор. Миков песьсьӧ

Казантсов Петра. Коми сьыванкыв

Гаврив Пёдор. Бордтӧм варыш

Коми нывӧй

[Питю Ӧньӧ]. Том ныввезвӧ

Питю Ӧньӧ. Ичмоньвӧн тӧждісьӧм

Питю Ӧньӧ. Горттӧм кӧк

Гаврив Пёдор. Сьыванкыв (Мыля меным томвӧ…)

Гаврив Пёдор. Сьӧвӧм доймӧ

Питю Ӧньӧ. Шудтӧм

Питю Ӧньӧ. Гов

[Питю Ӧньӧ]. Сьыванкыв (Пемыт ойӧн…)

Гаврив Пёдор. Сьыванкыв (Эн тэ сьыв…)

Питю Ӧньӧ. Лён

Питю Ӧньӧ. Морозко

Питю Ӧньӧ. Мыйкӧ скаски-кодь

Питю Ӧньӧ. Коми вевӧтчисьвӧ

Сьыванкыв (Уна ныввез чукӧртчисӧ…)

Гаврив Пёдор. Коми отир!

Нёбдінса Виттор. Сьыванкыв (Унаись ме сьывывви…)

Гаврив Пёдор. Сьыванкыв (Муна, пыра…)

Питю Ӧньӧ. Сьыванкыв (Кӧкӧ горттӧм…)

Вас. Дерябин. Вевӧтчӧм йӧзвӧ

Примечания к текстам

• Ойбыр – сунавись – сонливость.

• Сэрпсӧ – пежсӧ.

• Кось – тышкасьӧм – война

• Ась – мед.

• Мустӧм – нелюбой.

• Шудтӧ – чесьсьӧ.

• Сой – ки сой.

• Регыд – перыта – скоро.

• Кыа – заря.

• Дзаричез — чветокез

• Озыр – богат.