Пос

Щедринскӧй геройяслысь этш петкӧдлісны 70-ӧд вояс заводитчигӧн Прилузскӧй районса веськӧдлысьяс. Найӧ милиция отсӧгӧн вӧтлісны районсьыс Луз бердса сиктъясын Сӧвет власть лӧсьӧдысьясысь ӧтиӧс, 1918 восянь партияса член Т. Т. Сердитовӧс. Ленинградын олысь пӧрысь коммунист воліс Комиӧ, чужан сиктас — Чернышӧ, а сідзжӧ Абъячойӧ, мед висьтавлыны В. И. Ленинӧс кыкысь аддзылӧм да сылысь выступлениеяссӧ кывзӧм йылысь. Но партияса ветеран вылӧ КПСС райкомса веськӧдлысьяс лӧгасисны сыысь, мый Тимофей Тихонович критикуйтіс найӧс коми кыв дзескӧдӧмысь, школаясын сійӧс велӧдӧм дзикӧдз дугӧдӧмысь, школаас челядьлы комиӧн весиг сёрнитны запретитӧмысь. Абъячойса шовинистъяс вӧчисны ассьыныс мисьтӧм противоправнӧй делӧсӧ республикаса сановникъяслӧн бласлӧвитӧм серти. Найӧ сэсся аддзисны кутшӧмкӧ Ивановӧс, коді ньӧти яндысьтӧг нимтіс Т. Т. Сердитов ёртӧс националистӧн, кӧть эськӧ сылӧн гижӧдас КПСС Программаысь да партия съездъяслӧн материалъясысь босьтӧм цитатаяс кындзи нинӧм эз и вӧв. Та бӧрын Т. Т. Сердитовӧс вӧтлісны и Сыктывкарысь. Тимофей Тихонович сэки меным гижис, мый сійӧ шыӧдчас партия XXІV съездлӧн президиумӧ да мӧдӧдас сэтчӧ и партийнӧй билетсӧ. Ме ӧлӧді таысь сійӧс. А съездлы шыӧдчӧмсӧ сійӧ ыстіс. Гӧгӧрвоана, мый Л. И. Брежнев да М. А. Суслов кадӧ Сердитов ёртлы некутшӧм воча кыв воны эз вермы. Тайӧ ӧні бура тӧдса. Но медся шемӧсмӧданаыс тані сійӧ, мый татшӧм произволсӧ котыртысьяс и ӧнӧдз веськӧдлісны да велӧдісны миянӧс, а ӧткымынъяс велӧдӧны и талун, зэв гора сёрнитӧны перестройка, демократия да гласность йылысь, кӧть эськӧ перестройкаыд да гласностьыд налы сэтшӧм жӧ колана, кыдзи горшад сир пинь.