Коми лун нимъяс

Коми локализация дырйи колӧ пасйыны лун нимъяс. Вӧзъям ӧнія кадӧ параллельнӧя вӧдитчыны коми да рочӧвӧй лун нимъясӧн. Приоритет дерт сетны коми вужъя кывъяслы.

Ӧнія вариант

Ӧні коми кывйын вӧдитчӧны сораса системаӧн. Кык лун нимыс чиг коми, мукӧдсӧ роч кывйысь босьтӧма.

1. выльлун. Роч вар.: понедельник
2. воторник. Орф. вар. вовторник, торник, вторник
3. серӧда. Орф. вар. : середа, среда
4. четверг. Орф. вар.: четверк, четьверк, чекверк, тшекверк
5. пекнича. Орф. вар: петнича
6. субӧта. Офр. вар.: суббота
7. вежалун. Роч вар.: вӧскресенньӧ

Вежонлысь воддза да бӧръя лун нимсӧ рочмӧдан кадӧ гижлісны ӧтарӧ роч терминъясӧн дай ӧні йӧз пӧвстын рочсӧ тӧдӧныджык.

Альтернативнӧй системаяс

Унаысь видлывлісны комиӧдны лун нимъястӧ. Кыкыс кӧ нин эм, мыйла нӧ пӧ мукӧдсӧ рочӧн кольны. Эм некымын вариант да уна торъя вӧзйӧмыс. Татчӧ вайӧдам кыкӧс.

Елфимов Сергейлӧн вариант (1994)

Вариант вӧлі вынсьӧдӧма термина-орфография комиссияӧн, да лэдзӧма Миннац бюллетеньын.

1. выльлун
2. мӧдлун > мӧдӧдлун
3. шӧрлун
4. нёльӧдлун
5. витӧдлун
6. помлун
7. вежалун

Медыджыд майшӧгыс тані - мӧдлун. Диалектъясын сійӧ лоӧ аскомысь вежӧртаса. Сійӧн сёрӧнджык вӧлі вӧзйӧма мӧдӧдлун форма.

Кык кыв: нёльӧдлун да витӧдлун - кылӧны веськыда кыдз нёльӧд лун да витӧд лун, конкрет вежӧртасаӧсь да озджык лӧсявны.

2014ʼ вося ӧтуввез пыр юасигӧн вӧзйӧм выль нимъяс вӧсна пасйысисны сымда йӧз (скобкаясын - роч эквивалент дор сетӧм гӧлӧсыс, = пас бӧрын - рейтинг):

• нёльӧдлун +37 (-40) = -3
• витӧдлун +1 (-17) = -18
• помлун +3 (-33) = -30
• мӧдлун, мӧдӧдлун +27+15 (-107) = -65

"Чудскӧй" вариант

Вариантсӧ вӧзйыліс Ӧньӧ Лав 1990ʼ восяӧ.

1. выльлун
2. мӧдік > мӧділун
3. шӧрлун
4. чудьлун
5. перналун
6. пывсянлун ли, енлун ли
7. вежалун ли, ловзянлун ли, ловлун ли

Тані 3ʼ, 4ʼ да 5ʼ-ын воддза шыпасъяс тӧд вылӧ уськӧдӧны велассьӧм нин роч эквивалентъяс.

2014ʼ вося ӧтуввез пыр юасигӧн вӧзйӧм выль нимъяс вӧсна пасйысисны сымда йӧз (скобкаясын - роч эквивалент дор сетӧм гӧлӧсыс, = пас бӧрын - рейтинг):

• чудьлун +33 (-40) = -7
• пывсянлун +19 (-33) = -12
• перналун +5 (-17) = -14
• мӧдік, мӧділун +6+9 (-107) = -92

Компромисс вариант

Компромисс вариантын коми лун нимъясын содӧ ӧти чиг коми ним - шӧрлун , а четьверксӧ гижӧны коми шуанног серти.

1. выльлун
2. воторник
3. шӧрлун
4. четьверк
5. пекнича
6. субӧта
7. вежалун

Пасйӧдъяс

• Шӧрлун - ас кежысь гӧгӧрвоана коми мортлы и оз чужты негатив; шӧрлун дор вӧліны ставӧн, коді вӧзйыліс комиӧндны вежон нимъяссӧ.
• Четьверк - коми шуанног серти гижӧма рочысь босьтӧм став мукӧд луннимсӧ да гижам кӧ четверг роч гижанногӧн, торкам ӧтувъя принцип.

Лун нимъяс дженьдӧдӧм

Компромисс вариант серти

Гижам кык медводдза шума шы (согласнӧй).

1. вл - выльлун
2. вт - воторник
3. шр - шӧрлун < ср - серӧда
4. чт - четьверк
5. пк - пекнича
6. сб - субӧта
7. вж - вежалун

Чудскӧй вариант серти

Гижам кык медводдза шума шы (согласнӧй).

1. вл - выльлун
2. мд - мӧділун
3. шр - шӧрлун
4. чд - чудьлун
5. пр - перналун
6. пв - пывсянлун
7. вж - вежалун

Елфимов Сергей серти

1,2,3,4,6 - гижам кыкнан вужлӧн медводдза шыпас. 5,7 - гижам кык медводдза шума шы (согласнӧй).

1. вл - выльлун
2. мл - мӧдлун
3. шл - шӧрлун
4. нл - нёльӧдлун
5. вт - витӧдлун
6. пл - помлун
7. вж - вежалун

Тані вӧзйӧмын кык падмӧд:

1. Абу ӧтласа принцип
2. Витӧд лун индан вт рочман комияс век кутасны соравны воторникӧн.

Вӧзъяна

Вӧдитчыны компьютер интерфейсын компромисс вариантӧн.