Пос

Первой юкон ДРУГЪЯС

1

Дзоляник шорсянь заводитӧ Эжва ассьыс кузь туйсӧ. Дзор козъяс улӧ, нитшка вутшъяс бокӧ дзебсясьӧмӧн сійӧ лӧня, ёна чукльӧдлӧмӧн писькӧдчӧ сук парма пыр войвывсянь лунвылӧ. Уна нимтӧм и нима ёльяс чукӧртігмоз вочасӧн ёнмӧ, веськӧдлӧ пельпомъяссӧ, паськалӧ. И со сійӧ вильыш, визув детинка моз чеччалӧ нин изъяс вывті, чукыльясас кодйӧ джуджыд джумъяс — жар дырйи ком черилы любӧ — олан местаяс. Сэсся вабергачьясын гартчӧмӧн, джуджыд керӧсъяс пӧлӧн кузь косьтъяс вывті гажаа сяльӧдчӧмӧн мынтӧдчӧ пармалӧн крепыд сывъясысь, петӧ паськыд восьса эрдъяс вылӧ. Крута веськӧдчӧ асыввылӧ да джуджыд парма чуркъяс гӧгӧр сё верста кытшов вӧчӧм бӧрын шӧрыштӧ Коми му ӧтар помсянь мӧдар помӧдзыс. Вӧль, Помӧс, Тымсер, Мылва, Висер... оз нин сӧмын зумыш ёльяс, а посни и гырысь юяс сетӧны Эжвалы вынъяссӧ, и сійӧ вежӧ воддза сямсӧ. Чӧскыд веж туруна паськыд видзьяс пӧлӧн кылӧдӧ ассьыс васӧ оз нин кокни руа челядь моз ышмӧмӧн да сяльӧдчӧмӧн, а тэрмасьтӧг, посни гыяснас кельыдвиж да еджыд лыа кӧсаяс меліа нюлігтырйи. Тані сэсся оз нин быд гачтӧм детинка Эжва йылад моз ю вомӧныд изтӧ шыбит. Медся удал бурлак-зонмыс оз вермы судзӧдны изнад мӧдар берегсӧ кӧть сэсся вӧнь, кӧть тасма помысь. Чери да пӧтка кыйысь коми йӧз нэмъяссӧ юяс пӧлӧн овмӧдчавлӧмаӧсь. Бур места Эжва йывсьыс бӧрйылӧмаӧсь и Вочашор грездлы подув пуктысьяс. Эжва шуйгаладор берег пӧлӧныс да вель ыджыд шор ӧтар-мӧдар бокас тшупсьывлӧмаӧсь, дзик вӧр бердас. А мӧдлапӧв вӧрсьыс, Кывтыдпом весьтӧ, Эжваас шор жӧ петӧ, Вочашорӧн шуӧны. Тулыс-тӧвсӧ сійӧ шорсьыс пӧльяс ӧнӧдз на вель уна сир да