Пос

Кӧр да сылӧн ёртыс. Окота лоис томиник кӧрлы шӧйтыштны паськыд светӧд, выль местаяс видзӧдлыны. — Ог кут ме тэнӧ,— шуис сылы кӧр батьыс,— но сӧмын тӧд: оз ло кокни тэныд, йӧз муын уна шог аддзылан... — Нинӧм... Ме муна ог ӧтнам, а ёрткӧд. Сійӧ некор и некӧн менӧ оз эновт ӧтнамӧс. — Тайӧ бур, мый тэнад шань друг эм. Висьтав мыйкӧ сы йылысь. — Ӧтчыд ми мунім векни трӧпаӧд. Туйсӧ миянлы потшис ыджыд из, кытшовтны оз позь. Сэки менам ёртӧй мыджсис пельпомъяснас да изсӧ йӧткыштіс бокӧ. — Тэнад другыд ён,— ошкыштіс пӧрысь кӧр.— Но век жӧ ме повны кута тэ вӧсна. — А вот кывзы ещӧ сы йылысь,— шуис томиник кӧр. — Ми гуляйтім сыкӧд юсянь неылын, и миянлы окота лои юыштны. Но юанін дорас мунігӧн менам другӧй кыліс лёк зверлысь дуксӧ. «Тані ӧпаснӧ!» — шӧпнитіс сійӧ меным, и тӧв ныр моз лэбыштім сэтысь. — Тэнад другыд вежӧра, сюсь. Но ме кута повны тэ вӧсна, кытчӧдз гортӧ бӧр он лок,— ышловзис пӧрысь кӧр. — А сэсся ми шойччим эрд вылын. Аддзам: кӧин вӧтчӧ ыж бӧрся, вот-вот суӧдас сійӧс. Менам ёртӧй эз вермы сідз пукавны. Сійӧ уськӧдчис кӧинлы воча да сідз зургис сылы сюръяснас, мый муртса сійӧ кусьыс эз пет. — Тайӧ медся бурыс, мый тэ вермин висьтавны сы йылысь, — нимкодь лои пӧрысь кӧрлы.— Тэнад другыд авъя. Ӧні тэ вӧсна, пиук, ме ог пов.