Талун. 2017-08-08

Юрган телеканаллӧн выльторъяс: 2017ʼ моз т. 8ʼ лунся «Талун» уджтас.

Текст

Видза оланныд! Кыдзи и пыр тайӧ здукъясӧ ті видзӧданныд «Талун» программа. Студияын Анастасия Тюрнина и выпускын со мый медшӧрыс:

• Велӧдчан во кежлӧ дасьӧсь. [4]. Регионса веськӧдлысь ветліс Мылдін районса кык велӧдчанінӧ.
• Томан сайын олӧм. [5]. Общественникъяс туялісны тыр арлыдтӧмаяслысь СИЗО-ын олӧм.
• Дыр виччысяна сувтланін.

— Тані, шуам, ставыс лючки-бур. Локтін, мынтӧдін, вӧрзьӧдін, гижӧдчин, мунін.

Сыктывкарын бара на лоас пыж станция.

ГЕРОЙӦС КАЗЬТЫЛӦМ

Талун Алексей Алексеевӧс казьтылан лун. ФСБ-са подполковник кувсис 21 во сайын Чечняын. 2000-ӧд воын управленньӧ дорын Сыктывкарын Россияса геройлы сувтӧдісны памятник. Сійӧ кадсянь быд во август 8-ӧд лунӧ сы дорӧ воӧны уджъёрт да матыссаяс. Найӧ казьтылӧны геройӧс пыдди пуктӧмӧн. Сійӧ, командировка кадръяс юкӧнӧн веськӧдлысь, вӧзйысис мунны ачыс. Сэні юрнуӧдіс Грознӧйса общежиттьӧ оборонаӧн. Боечьяс кык лун тышкасисны стрӧйба вӧсна. Алексеев кыкысь ранитчыліс, а сэсся олӧмсӧ орӧдіс снайперлӧн пуля. Сэки сылы вӧлі 42 арӧс.

Николай Панюков (Комиын ФСБ управленньӧын ветеранъяс сӧветӧн веськӧдлысь):

— Мам да гӧтыръяс шыӧдчылісны подразделенньӧӧ. Полісны асланыс матыссаяс вӧсна. И сійӧ шуис ачыс мунны, мед видзӧдлыны, кыдзи сэні, мед сэсся вермис висьтавны збыльвывсасӧ.

Алексеевлӧн чужанінын Ухтаын сылӧн подвиг йылысь тӧдӧны быд школаын. А кӧні сійӧ велӧдчис, сувтӧдӧма памятник. 10 во кымын нин кымын Ухтаын котыртлӧны Алексеевӧс казьтылан военно-патриотическӧй лагер.

ТОМАН САЙЫН

Общественникъяс прӧверкаӧн ветлӧдлісны 1-ӧд номера СИЗО-ӧ, сійӧ Сыктывкар дорын. Донъялісны следствийӧ улын тыр арлыдтӧмаяслысь камераяс. Татшӧмыс сэні 4 морт. Найӧ виччысьӧны дурмӧдчантор вузалӧм, гусясьӧм да мӧд мортӧс ёна дойдалӧмысь мыждӧм. Константин Куратов висьталас водзӧ.

Тыр арлыдтӧмаяс следственнӧй изоляторын олӧны торъя юкӧнын, медым эз аддзысьлыны верстьӧ мыж вӧчысьяскӧд. Талун камераясын 4 зон. Нывкаяс веськавлӧны зэв гежӧда. Кӧть арлыдыс абу на уна, кодсюрӧ тані абу нин медводдзаысь. Со тайӧ 16 арӧса зонлӧн эм нин условнӧй срок. Ёрд бӧрын збыль йӧртасны сутуга сайӧ. Спортсмен-вольник дас сизимысь ырскӧма дӧзмӧдысьӧс пуртӧн.

[11]

Ёртъяскӧд гуляйтӧм да гажӧдчӧм пыдди — погона йӧзлӧн дӧзьӧр улын урчитан пӧрадок серти олӧм, сьӧкыд ӧдзӧс да некымын томан сайын. Камераясын кык судта крӧватьяс, пызан, вӧлӧга вылӧ шкап, юан ва, югзьӧдӧм, радио да телевизор, пызанвывса ворсанторъяс, эмӧсь и лыддьысянінысь небӧгъяс. Вердӧны куимысь луннас. Ӧтчыдысь вежоннас — душ да выль вольпась. Ставыс нормаяс серти.

Эдуард Бушуев (Республикаса общественно-наблюдательнӧй комиссияӧн юрнуӧдысь):

— Ме аслам опыт серти верма ӧткодявны, кыдзи видзӧны тыр арлыдтӧмаясӧс, аньясӧс да мужичӧйясӧс. Челядь да аньяс СИЗО-ын, дерт, олӧны тӧдчымӧн бурджыка. Тайӧ вермас петкӧдчыны быттьӧкӧ кутшӧмкӧ абу тӧдчанаторъясын, но збыльвылӧ, тані пукалысьяслы зэв коланаторъясӧн. Шуам, гуляйтан йӧръясын эм тренажёр, эм позянлун ворсыштны. Верстьӧяслӧн татшӧмыс абу. Челядьӧс видзӧны небыдджыка.

Медводдза номера СИЗО общественникъяс шуӧны мыж вештан системаын медбур учрежденньӧӧн. Тані и мыж вӧчысьясӧс видзӧны колананогӧн, и став объект тыр-бурӧсь. Эм и психологлӧн кабинет, воспитайтӧм удж жыр. Тыр арлыдтӧмаясӧс петкӧдлӧны гуляйтны торъя йӧрӧ. Сэні позьӧ песыштны лысьӧм. Тані тшӧтш челядь и водзӧ велӧдчӧны. Тайӧ классын эм став коланаторйыс. Колян во тані босьтісны тӧдӧмлунъяс 25 морт.

Светлана Варгатюк (мыж вештан службаын мыждӧмаяскӧд уджалан юкӧнӧн веськӧдлысь):

— Велӧдчан заняттьӧяс котыртам стрӧглун коллялан ног серти. Расписанньӧ серти волӧны республикаса велӧдан шӧринысь педагогъяс. Найӧ уджалӧны медводдза да кызь витӧд колонияясын. И волӧны следственнӧй изоляторъясӧ велӧдны тыр арлыдтӧмаясӧс.

Видзӧдлісны общественникъяс пусянін да бурдӧдчанін. Некод эз норась тані видзӧм вылӧ.

Любовь Максимова (мыж вештан служба бердын общественнӧй сӧветӧн веськӧдлысь):

— Тыр арлыдтӧмаяслы оз ков пукавны камераясын. Татшӧмыс эськӧ оз вермы лоны. Ми сёрнитім быдӧнкӧд. Торйӧн гӧгӧрвоим, мый найӧ ӧд абу лёк йӧз. Налӧн вӧліны мӧвпъяс, водзӧ вылӧ позянлунъяс, но со конйыштчӧмаӧсь, вӧчӧмаӧсь мыйкӧ лёктор. Ми кутам лача, мый накӧд сёрнияс бӧрын сэсся оз нин кутчысьны торкавны оланпасъяс. Мӧвпъясныс налӧн бурӧсь, кӧсйӧны ставсӧ вӧчны, медым петны татысь да позьӧ овны бур оласногӧн. Ми чайтам, ёна отсалӧ бергӧдны мӧвпъяссӧ бурланьӧ татчӧс психологическӧй службаыс. Ставныс гӧгӧрвоӧны бать-мам водзаныс кывкутӧмнысӧ, кодлӧн найӧ эмӧсь.

Став тыр арлыдтӧмалы сетӧны аддзысьлыны бать-мам да рӧдвужкӧд. Ӧтилӧн некод абу. Сійӧ Александр Католиков нима челядь керкалӧн быдтас. Мамыс кувсьӧма, кор зонкалы абу на вӧлӧма и арӧсыс, а батьыс вошӧма. Общественникъяс кӧсйысисны отсавны аддзыны кӧть ылі рӧдвужсӧ.

Константин Куратов, Олег Жуковский, «Юрган» телеканал, Сыктывкар.

«МОТО» ОПЕРАЦИЯ

«Мото» операция дырйи пӧрадок бӧрся видзӧдысьяс эрдӧдісны 50 сайӧ торкалӧм. А куимӧн кык кӧлесаа кӧрт вӧв вылӧ пуксисны код юрӧн да водительскӧй удостоверенньӧтӧг. Таысь налы транспорт сувтӧдісны штраф-стоянка вылӧ.

Наталья Быкадорова (Сыктывкарса ГИБДД-ын пропаганда юкӧнын инспектор):

— Колӧ пасйыны, профилактика удж отсалӧ. Аддзан: мототранспортӧн ветлӧны шлемӧн, пасьталӧны торъя костюмъяс, та кындзи ветлӧны ГИБДД-ӧн оланпас серти гижӧдӧм транспортӧн.

Госавтоинспекция казьтылӧ, мотоцикл кутысьяслы аскӧдыс колӧ пыр новлӧдлыны «А» категория удостоверенньӧ. А скутер да мопед вылын ветлысьяслы колӧ петкӧдлыны инспекторлы «М» либӧ мӧд категория удостоверенньӧ. Сійӧ кӧ оз ло, техникалӧн водительӧс виччысьӧ 15 сюрс мында штрап.

ӦЗЫН КОРСИГМОЗ

Сыктывкарын бара лоас пыж станция. Перестройка кадӧ сійӧ сулаліс Пушкин нима уличын. Бӧрынджык станциясӧ вештісны Изкарӧ, но сэні сійӧ меститчис эз дыр кад. Ӧні ичӧт пыж кутысьяслы колӧ кольны транспорт Эжваӧ. Вавывса олӧм йылысь висьталас Сергей Туркин.

Вячеслав Данилов аслас пыжкӧд янсӧдчӧ сӧмын сэки, кор юыс йизяс. Семьякӧд шойччӧм, чери кыйӧм... Эжваса олысь шуӧ: таӧн олӧ челядьдырсянь. Талун муніс ёкышла, юркарсянь 300 километр ылнаӧ. Водз асылын черисӧ вайис нин гортӧ. Ӧні позьӧ неуна и шойччыны. Радейтана моторкаӧн Вячеслав Васильевич вӧдитчӧ матӧ 30 во нин. И тайӧ кадколастсьыс джынсӧ пыжыс сулалӧ тайӧ местаын 32-ӧд номер улын. Транспортыс станция вылын кӧ, сідзкӧ позьӧ не тӧждысьны.

Вячеслав Данилов (чери кыйысь):

— Тані, шуам, ставыс лючки-бур. Локтін — мынтӧдін, вӧрзьӧдін, гижӧдчин, мунін. Бара локтін — сувтӧдін, мунін. Ставыс! Майшасьны оз ков. Тані некод нинӧм оз босьт. Локтан — куйлӧ сійӧ жӧ местаын.

Тані сулалӧны ёнджыка ичӧт суднояс. Моторкаяс кындзи, эмӧсь и пӧльтан пыжъяс. Могмӧсысь, дерт, колӧ вештысьны, но кыдз шуӧны пыж кутысьяс, эм мыйысь мынтыны. Быдса во кежлӧ мынтысин, да вӧдитчы, кор ковмас.

Василий Шаглеев (чери кыйысь):

— Кӧть менам пыжыс и пӧльтан, но меным кивывджык видзны сійӧс тані. Сійӧс колӧ пыр гартны, пӧльтны, а тані прӧстӧ сулалӧ. Тулыснас пӧльтін, а арнас бара гартін.

А нӧшта ва вылӧ быд петысьлы быть колӧ гижны рапортын, кытчӧ сійӧ мунӧ. Лоас кӧ неминуча: пыжыс кӧ бергӧдчис либӧ вошис, мукӧддырйи весиг бензиныс мунігас бырлӧ, и пыр быд нелючкитор регыдъя кадӧ разьӧны.

Александр Соловьёв (стӧрӧж):

— Шуам, Зеленечӧ кодкӧ мунӧ, гижӧдчӧ, пропуск пасйӧ да журкнитӧ. Ставыс ӧд вермӧ лоны. Сійӧс корсьны кӧ ковмас, медым тӧдны, кӧні сійӧ. Миян дежурнӧй судно (со гӧрдыс) эм. Сы вылын мунам да ваям чери кыйысьӧс бӧр.

Талун пыжъясыс 80-ӧд вояс серти, дерт, этшаджык. Но ичӧт суднояс кутысьяслӧн лыдыс бара содӧ. Комиын весиг воссис гидроциклъяс радейтысьяслӧн клуб. Ставсӧ кӧ артавны, сӧмын Сыктывкарын чукӧрмас матӧ сюрс ичӧт пыж. Юркарса ӧзын тупкӧм бӧрын, унаӧс на пиысь позьӧ вӧлі сувтӧдны сӧмын Эжваса станция вылын.

Артемий Черных («ВОСВОД»-лӧн коми юкӧнӧн веськӧдлысьӧс вежысь):

— Миян дорӧ шыӧдчис водзмӧстчысь котыр. Йӧзыс кӧсйисны вӧчны пыж станция, пыж сувтланін. Ми мунім воча. Гижлім шыӧдчӧм, медым сетісны мусӧ мӧдлапӧвсянь неылын. Администрация вичмӧдіс тайӧ инсӧ 20 во кежлӧ. Кутам вӧчны ставсӧ, мый колӧ йӧзлы.

Пыжъясӧн ӧні юркарса вӧдитчысьяс овмӧдчисны мӧдлапӧлын. Налы вичмис ыджыд юкӧн. Матӧ 5 сюрс квадрата километр. Пырӧдчыны йӧзкостса стрӧитчӧмӧ позяс ставныслы. Тайӧ сетӧ позянлун быд мортлы лӧсьӧдны аслас пыж улӧ места. Буретш, кор стрӧитан аслыд ас киӧн, пыр артмӧ бурджыка. Содтам, мый уджтасыс абу коммерческӧй, вештысьны ковмас сӧмын биысь. План серти выль объектыс лоас дась локтан воын нин. Пыжӧн ветлысьясӧс майшӧдлӧ сӧмын сійӧ, мый жар гожӧмнас найӧ оз вермыны воны Эжвасянь Сыктывкарӧ. Ю пыдӧссӧ ӧні зэв гежӧда джудждӧдлӧны. Сы вӧсна весиг ичӧт пыж вылын позьӧ веськавны ляпкыдінӧ.

Сергей Туркин, Таисия Жакова, Дмитрий Ведерников, Павел Фетисов, «Юрган» телеканал, Эжва район.

ТУЙВЫВСА СЕРПАС

Ӧтуввезйын йӧзӧдісны Вӧркутаса туйлысь фотография, и ӧні туй вӧчысьяслысь удж пинялӧны олысьяс. Снимок вылын гӧгӧрвотӧм пас. Ӧтлаасисны орласьӧм, кузяла мунысь да кык пӧвста визьяс. Та йылысь ёна гижисны ӧтуввезйын. Но сёрӧнджык гӧгӧрвоӧдісны: тайӧ пӧ туялӧм могысь вӧчӧма. Тӧв бӧрын кытӧнкӧ коліс видлыны краситан машиналысь уджаланног.

Александр Кузь (Вӧркутаса туй управленньӧӧн веськӧдлысь):

— Та могысь колӧ кисьтны колана мында краска. Машина петӧ, да водитель видзӧдӧ, кыдзи компьютер уджалӧ. Сэсся туялӧ, кыдзи киссьӧ краска. Туй вылын уджавны оз позь. Колӧ шыбитӧм туй кост. Ми сійӧс со бӧрйим.

Нӧшта специалист висьталіс, мый туйыс некытчӧ оз нуӧд, сійӧс шыбитӧма, но зэв бур, та вӧсна некымын во нин чипан видзан фабрика сайын нуӧдӧны уджъяс.

☼ ☼ ☼

А реклама бӧрын тӧдмаланныд Сергей Гапликовлӧн Печӧра-Ылыдзса йӧра видзанінӧ ветлӧм йылысь да Сыктывкарын кыптӧм зык йылысь. Кольччӧй миянкӧд.

ЙӦРАЯСӦС ВИДЗӦДЛІСНЫ

Сергей Гапликов ветліс Печӧра-Ылыдзса йӧра видзанінӧ, пыравліс пемӧсъяс дорӧ да музейӧ. 68 воӧн тані быдтісны 600 сайӧ нёль кокаӧс. Водзын фермаын ёнджыка туялісны кӧръяслысь оласног. А ӧні тайӧ туристъяслӧн воланін. Кыдзи примитісны гӧсьтъясӧс, та йылысь Татьяна Супрядкина.

Вӧрса олысьяс важӧн нин лоины гортсаӧн. Фермаын уджалысьяс вегелитӧны найӧс челядьӧс моз. Та вӧсна йӧраяс морт дорысь оз вешйывны. Дерт, эмӧсь сэтшӧмъяс, кодъяс радейтӧны шӧйтны вӧрын, кыдзи Жанна энь йӧра моз. Гуляйтас, кымын кӧсйӧ, а сэсся бергӧдчӧ гортас. Ӧні фермаын олӧ 14 йӧра, а видзӧдӧны на бӧрся 7 уджалысь.

[7]

Светлана Лызлова йӧраяскӧд уже 40 во нин. Талун вӧзйӧ ставныслы налысь йӧв. Сійӧ пӧ ёна лӧсялӧ мортлы, зэв гос, неуна шома, медводдзаысь видлігӧн быттьӧ абу и чӧскыд, но сы мында буртор сетӧ дзоньвидзалунлы.

Светлана Лызлова (йӧра видзан фермаын уджалысь):

— Ме кужа аддзыны кыв йӧраяскӧд и таысь нимкодь аслым. Пемӧсъяс кывзысьӧны бура.

2 во сайын тані стрӧитісны шойччан керкаяс. Прӧст найӧ некор оз овлыны. Сӧмын колян во татчӧ волісны 2 сюрс сайӧ турист. Ӧні тані стрӧитӧны визит-центр. Сэні меститчасны шойччан жыръяс, музей, пывсян, конференц-зал. Мытшӧдыс ӧти — фермаыс федеральнӧй эмбурын, та вӧсна Республика сьӧмӧн отсавны оз вермы. Но позьӧ корсьны некымын туйвизь, медым пырӧдчыны кутшӧмкӧ уджтасӧ.

Леонид Симакин (Печӧра-Ылыдзса заповедникӧн веськӧдлысьлысь удж вӧчысь):

— Ӧти уджтас дасьтам, туризм сӧвмӧдӧм могысь, кӧръясӧс велӧдам додьяс кыскавны. Коркӧ тайӧс вӧчлім нин, сэсся вуніс ставыс. Ӧні бӧр ловзьӧдам, медым тӧвнас туристъясӧс голльӧдлыны.

Ю сайын гӧсьтъясӧс виччысьӧ музей. Сэні петкӧдлӧма заповедникын став олысьӧс. Регыд нин донъявны тайӧс вермасны нӧшта унджык морт. Визит-центр восьтӧм бӧрын тані лӧсьӧдасны вертолёт улӧ площадка да ю кузя сплавляйтчан шӧрин. А нӧшта заповедник гӧгӧр мӧвпалӧны лӧсьӧдны браконьеръясысь видзтысян зона.

Татьяна Супрядкина, Любовь Филиппова, Олег Юшков, «Юрган» телеканал, Мылдін район.

ЙӦЗӦС ВУДЖӦДӦМ

Йӧзӧс важ оланінысь вуджӧдан программалӧн коймӧд тшупӧд сертиыс Сыктывкарын 4 керкаысь сдайтӧма сӧмын кыкӧс. Мукӧдыс дасьӧсь 87- 99 прӧчент вылӧ. Сэтчӧ вуджӧдасны 86 семья. Но ӧти стрӧйбаын, пӧдрадчик серти, оз тырмы техника да сьӧм, а сигӧртны уджъяс колӧ сентябр ӧтиӧд лунӧдз. А нёльӧд тшупӧдын мэрия шуис ньӧбны патераяссӧ стрӧитчысьяслысь, а вӧзйӧмыс Сыктывкарын уна.

Валерий Козлов (Сыктывкарса мэр):

— Талун Сыктывкарын вузавлӧны уна патера, вӧзйӧмыс тырмымӧн. Став 44 патераыс муниципалитетлӧн нин. Йӧз тӧдмасьӧны патераяскӧд. Быд оланін аслыспӧлӧс. Ыдждаыс быдӧнлы колана и.

Патераясын вӧчӧма нин пытшкӧсыс, куим оланін эмбуралӧма вермытӧмаяслы. Сэні эм торъя пыранін, ӧдзӧсъяс паськыдӧсь, йиркыс джуджыд.

ОРЧЧӦН УДЖАЛЫСЬЯС

Сыктывкарын кыптіс зык, код вӧсна вермас сюравны карса транспортӧн ветлысьяслы. Помкаыс — ӧти фирмалӧн автозаправкаӧ пыранін. Лоӧмторлы паныд сувтӧ терроризмысь видзтысян оланпаслы. Висьталас Анастасия Михайлова.

Неважӧн на тайӧ туйыс эз вӧв, а Сыктывкарса йӧзӧс новлӧдлысь овмӧслӧн мутасъяс вӧлі ставнас гӧгӧртӧмаӧсь бетон потшӧсӧн. Сы сайӧ веськавны вӧлі позьӧ сӧмын пропускӧн АТП-лӧн ворота пыр. А ӧні автобусъяс дорӧ пырны вермас быд окотитысь. Тайӧ лунъясӧ потшӧс юкӧн разисны, медым вӧчны мӧд туй.

Юрий Маклаков («Комиавтотранс» овмӧслӧн шӧр инженер):

— Стрӧитчан уджъяс вӧлі вӧчӧны сёр рытын да войын, а туй восьтісны вежалунӧ.

Йӧзӧс новлӧдлысь овмӧслӧн веськӧдлысьяс тӧдмалісны: выль туй восьтіс «Нефтепродуктсервис» котыр. Вӧчис аслас заправочнӧй станция дорӧ Сыктыв шоссесянь веськыд пыранін. «Комиавтотранс» бокын АЗС лэптісны 2011-ӧд воын на. Карӧн веськӧдлысьяслӧн тшӧктӧм серти. Ломтасӧн тані могмӧдісны быдсяма овмӧсъяс. Налӧн машинаяс мытшӧдтӧг вӧлі пырӧны АТП-лӧн ворота пыр. Орчча уджалысьяслӧн та серти вӧлі сёрнитчӧм юнь 30-ӧд лунӧдз. Водзӧ нюжӧдны сійӧс ломтасӧн заправка кутысьяс эз окотитны.

Наталья Гайдеек («Комиавтотранс» овмӧсӧн веськӧдлысьлысь удж вӧчысь):

— «Нефтепродуктсервис» петкӧдлысь серти, йӧзӧс новлӧдысь овмӧс уджйӧзалӧма ломтасӧн могмӧдысьяслы 2 млн. шайт, а мынтысьны оз тэрмась. Нӧшта орччӧн уджалысьяс пӧ эз нин ӧтчыдысь вӧзйыны вузавны заправка зэв ичӧт донысь.

«Нефтепродуктсервис»-ын шуӧны, ми пӧ босьтім туй вӧчӧм вылӧ лэдзӧм, оланпас эгӧ торкӧй. А орчча уджалысьяс пӧ майшасьӧны оз асьнысӧ видзӧм йылысь, а пинясьӧны мӧд помкаяс понда.

Александр Пиягин («Нефтепродуктсервис» овмӧс петкӧдлысь):

— Найӧ кӧсйӧны кутны асланыс киясын заправочнӧй станцияӧн вӧдитчысьясӧс, медым татшӧм ногӧн ӧлӧдны да тшӧктыны кывзысьны найӧс, «Нефтепродуктсервис» овмӧсӧн веськӧдлысьясӧс, да медым найӧ кырымалісны вӧзъяна сёрнитчӧмъяс.

Тайӧ вензян лоӧмтор ӧні кутасны видлавны погонаяс. Кыкнан овмӧсыс гижисны полицияӧ шыӧдчӧмъяс. А юркарса администрация абу на и тӧдлӧма, мый тайӧ котыръяс юкӧны муниципалитетлысь му. Чинаяс волісны татчӧ да сувтӧдісны стрӧитчан удж, кытчӧдз вензьысьяс оз пуксьыны пызан сайӧ да оз сёрнитчыны бурӧн.

Анастасия Михайлова, Наталья Литкевич, Иван Богомолов, Олег Юшков, «Юрган» телеканал, Сыктывкар.

ТОМ МЕЗДЫСЬЯС

МЧС-ӧн веськӧдлысьяс чолӧмаласны 5-ӧд классын велӧдчысь Никита Киселевӧс, коді босьтіс «Таланты и поклонники» ставроссияса конкурсын мӧд места. Сійӧ сиӧма тыр арлыдтӧмаясӧн Чужан му радейтӧм да мездысьяслысь удж нимӧдӧмлы. Странаса 24 регионысь том йӧз петкӧдчисны 4 номинацияын. Сыктывкарысь зон лыддис Любовь Терентьевалысь кывбур, коді сиӧма МЧС, Госпожнадзор да ас кӧсйӧм серти ставроссияса кусӧдчысьяслӧн обществолӧн юбилейлы.

Никита Киселёв («Таланты и поклонники» ставроссияса конкурсын приз босьтысь):

[11]

Мездысьяслысь удж пыдди пуктысьлы сетісны козинъяс: туристлысь эмбур, турник да аттьӧалана письмӧяс.

Никита Киселёв («Таланты и поклонники» ставроссияса конкурсын приз босьтысь):

— Менӧ батьӧ велӧдіс. Тренируйтчим асыв, лун и рыт. И со радӧсь, мый вермим.

Сергей Киселёв (Никиталӧн бать, Комиын МЧС управленньӧын кадръяс юкӧнӧн веськӧдлысьӧс вежысь):

— Финалыс 4 час муніс. 120 петкӧдчысь вӧлі. Ставӧн енбиаӧсь, ставныслы тайӧ местаыс зэв дона.

Александр Князев (Комиын МЧС управленньӧӧн веськӧдлысь):

— Никита пырӧдчӧ миян быд конкурсӧ: и ветеранъясӧс чолӧмалӧ, и Победа лун дырйи петкӧдчӧ, и медводдзаяс лыдын вермӧ новлыны оранжевӧй берет.

Никиталӧн эм нин аслас форма, но йитны ассьыс олӧм МЧС-кӧд оз на кӧсйы, мӧвпалӧ лоны архитекторӧн.

☼ ☼ ☼

Коді эз удит видзӧдны миянлысь выпуск, вермас вӧчны тайӧс Юрган.рф сайтын или Ростелекомлӧн IP-телевиденньӧ отсӧгӧн. И та вылын миян ставыс. Аттьӧ, мый видзӧдінныд миянӧс. Став бурсӧ.

Пасйӧд

Текстуйтӧма 2017-12-21. Донса Инна.