Мартынов Валерий Иванович
Мартынов Валерий Иванович чужис 1933-ӧд вося йирым медводдза лунӧ Киров обласьтса Кырчанскӧй районса Ильинск сиктын. 1948-ӧд воӧ помаліс Ыбса шӧр школаын сизимӧд класс, 1951-ӧд воӧ эзысь медальӧн помаліс 12-ӧд номера Сыктывкарса шӧр школа. 1955-ӧд воӧ помаліс Коми канму педагогика институтса шӧр школаын роч кыв да литература велӧдысьясӧс дасьтан юкӧн. 1955-1958-ӧд воясӧ служитіс сӧвет армияын, Германияын. Демобилизация бӧрын пырис уджавны литературнӧй уджалысьӧн сӧмын на котыртӧм «Молодёжь Севера» газетӧ. 1958-1966-ӧд воясӧ велӧдіс роч кыв да литература 2-ӧд номера Интаса шӧр школаын. 1964-1966-ӧд воясӧ велӧдіс роч кывйӧ Дрезденын да Потсдамын немеч велӧдысьясӧс. 1966-1967-ӧд воясӧ уджаліс Коми пединститутса литература кафедраын. В.И. Мартыновлӧн кывбуръяс петавлісны «Перекличка» (1966), «Люди третьего фронта» (1969), «Инта весенняя» (1972) ӧтув кывбур чукӧръясын. 1967-ӧд воӧ вуджис младшӧй научнӧй сотрудникӧн СССР-са наука академиялӧн Коми филиалӧ кыв да литература юкӧнӧ. 1970-ӧд воӧ пырис «Литература народов СССР» специальносьт серти аспирантураӧ. 1973-ӧд воӧ Роч литература институтын (Ленинградын) дорйис филология кандидатлысь диссертация. 1971-1988-ӧд воясӧ вӧлі Кыв, литература да история институтын фольклор да литература секторӧн веськӧдлысьӧн. 1992-ӧд воӧ В.И. Мартынов уджалiс Республикаса народнӧй образованиеса уджалысьяслы переподготовка да квалификация кыпӧдан институтӧ филология кафедраса доцентӧн. 1998-ӧд восянь уджалic тайӧ институтас профессор должносьтын. Куліс 2015 вося косму тӧлысь 18-ӧд лунӧ. Гуалӧма Вылыс Човса шойнаын.
Небӧгъяс
- Перымса Стефансянь миян нэмӧдз : коми литературалысь тӧрытъя да талунъя лист бокъяс восьтігӧн. Сыктывкар : Коми книжнӧй издательство, 1997. 144 лб.
Гижӧдъяс
- Русская классика и коми литература, 1973;
- Роль русских писателей в формировании литературы коми, М., 1974;
- Развитие коми филологической науки, 1975 (Соавтор - Г. Бараксанов);
- Национальная литературная традиция в творчестве современных коми писателей, 1985;
- Становление коми литературы. Идейно-эстетический аспект, М., 1988;
- Коми литературоведческий словарь-справочник, 1993;
- Теория коми литературы, 1995;
- Биармия литератураын да важ гижӧдъясын, 1996;
Ӧшмӧс
- Мартынов В.И. Литераторы земли Коми. - Библиографический словарь-справочник. - Сыктывкар: издательство "Эском", 2000. - С. 108.
