Талун. 2017-11-22

Юрган телеканаллӧн выльторъяс: 2017ʼ вӧльгым 22ʼ лунся «Талун» уджтас.

Текст

Бур рыт! Тіянкӧд «Талун» программа. Студияын Константин Куратов.

И со мый йылысь ми талун юӧртам:

• Сессия водзвылын. Федеральнӧй бюджетысь ми виччысям нёль миллиард шайт, но вермас лоны, сьӧмсӧ содтасны. Аски депутатъяс примитасны локтан во вылӧ бюджет.

• Ловлун ловзьӧдӧм. Талун дасьтысьӧны, медым тайӧ предметсӧ вермисны нуӧдны став классын. Сыктывкарын «Рӧштвоса лыддьӧмъяс» дырйи сёрнитасны челядьӧс выльнога велӧдӧм йылысь.

• Турунвиж Эжва. Кык теплица костын вичмӧдім му. Тані и мунӧ теплотрасса да быдмӧгъяслы шоныдджык лоӧ. Эжва районӧ вайисны аслыспӧлӧс бадьлысь кыксё саженеч, найӧс кутасны пуктыны оржыяс пыдди.

Сыктывкарысь Ухтаӧ

Сыктывкарысь Ухтаӧ юркар вуджӧдӧм кузя референдум — тайӧ абу веськӧдлысьяслӧн шуӧм, а регионын олысьяслӧн видзӧдлас. Тайӧ йӧзлӧн ас кӧсйӧмысь мӧвп эрдӧдӧм. Веськӧдлысьяслы коли сӧмын кывзыны олысьясӧс. Татшӧм мӧвпъясӧн юксисны Каналан сӧветса депутатъяс юркар вуджӧдӧм серти водзмӧстчӧм йылысь, тайӧ юалӧм лоас сессия дырйи медшӧрӧн. Йӧзӧн бӧрйӧмаяс пасйисны: вӧзйӧмсӧ туялісны нин оланпасъяс боксянь, позьӧ–ӧ татшӧм вуджӧдӧм видлавны да лӧсялӧ–ӧ татшӧм позянлуныс регионса оланпасъяслы.

Василий Смалий — Госсӧветын вӧр–ва озырлунъяс, вӧр-ваӧн вӧдитчӧм да экология комитетӧн веськӧдлысь:

— Юалӧмыс зэв аслыспӧлӧс. А депутатъяслы колӧ мыджсьыны сӧмын олысьяслӧн бӧрйӧм вылӧ. Кутам-ӧ вӧдитчыны тайӧ позянлунӧн, тӧдмалам аски сессия дырйи. Оланпасъяслы лӧсялӧм серти тайӧ юалӧм туялісны да ошкисны.

[15]

Нина Нестерова — Госсӧветын оланпас гижӧм да меставывса асвеськӧдлӧм кузя комитетӧн веськӧдлысь:

— Медшӧрыс — документъясӧ видлалісны, лӧсялӧ-ӧ сійӧ миян оланпасъяслы. Да, лӧсялӧ, нинӧм оз торкав, а сідзкӧ, ӧні миян ӧти мог — видлавны тайӧ постановленньӧсӧ сессия вылын.

[15]

Ӧттшӧтш парламентса комитетъясын веськӧдлысьяс пасйисны медшӧр вензьӧмъяс ӧні пуӧны татшӧм позянлун гӧгӧр. Юркар вуджӧдӧм йылысь, кӧть та йылысь сёрнитны пӧ водз на. Тані пӧ зэв тӧдчана буретш референдум нуӧдӧм да позянлуныс йӧзлы юӧртны асланыс видзӧдлас йылысь да, гашкӧ, пуктыны чут тайӧ нюжалан юалӧмын. Пасъям, административнӧй шӧрин Ухтаӧ вуджӧдӧм йылысь юалӧм медводдзаысь кыпӧдлісны колян нэмса нелямынӧд воясын, кор дасьтісны СССР-са Совнаркомлысь индӧд. Сэки татшӧм вӧзйӧм гӧгӧрвоӧдісны сыӧн, мый тайӧ промышленносьт да география серти Комилӧн шӧрыс. Но айму вӧсна Ыджыд тыш пансьӧм понда та йылысь вунӧдісны.

Сессия водзвылын

Аски Каналан сӧветса депутатъяс примитасны локтан во кежлӧ бюджет. Йӧзӧн бӧрйӧмаяс водзвыв видлалісны став госпрограмма чукӧртчылӧмъяс дырйи. Вынсьӧдісны медшӧр нырвизьяс. Бюджет пӧ лоас дефицитаӧн. Оз тырмы миллиард нёльсё миллион шайт. Но колян кадколаст серти тайӧ лыдпасыс медводдзаысь чиніс. Таво сессия вылын комитет чукӧртчылігӧн депутатъяс выль пӧв видзӧдлісны юалӧмъяс. Татьяна Супрядкина медшӧръяс йывсьыс.

Бюджетлӧн шӧр нырвизьыс оз вежсьы, коляс социальнӧйӧн. Чукӧртӧм сьӧмысь сизимдас процентыс мунас йӧзлы отсӧг сетан юкӧнлы. Дерт, рӧскодыс унджык нажӧткаысь. Оз тырмы миллиард нёльсё миллион шайт.

Степан Чураков — Госсӧветын бюджет комитетӧн веськӧдлысь:

— Федеральнӧй бюджетысь ми виччысям нёль миллиард шайт, но вермас лоны, сьӧмсӧ содтасны, ӧд федеральнӧй бюджет эз на видлавны, а вермасны вынсьӧдны мӧд лыдпасъяс.

Во помӧдзыс депутатъяслы колӧ вынсьӧдны бать-мам дорйӧм кузя челядьӧс оланпассӧ вежсьӧмъяс. Оланінӧн могмӧдӧм вӧсна кывкутӧ Республика. Тайӧ федеральнӧй закон серти. Но миян та вӧсна кывкутӧны местнӧй властьяс, а регион сьӧмӧн отсалӧ сӧмын. И со тайӧ оланпасыс, коді гӧгӧрвоӧдчӧ наяслысь кывкутӧм, таво помасьӧ.

Наталья Паншина — Госсӧветын социальнӧй политика комитетӧн веськӧдлысь:

— Законлӧн ӧткымын пункт помалӧны ассьыс удж. На серти вӧлі гӧгӧрвоӧдӧм, мый колӧ вӧчны местаясвывса чинаяслы бать-мам челядьӧс оланінӧн могмӧдӧм серти. Ӧд налы кокньыдджык венны тайӧ юалӧмсӧ вӧлі. Позьӧ ньӧбны жыръяс, либӧ овтӧм стрӧйбаяс вуджӧдны олан статусӧ. Дерт, Республикалысь сьӧмсӧ юклывлім.

[22]

Венны тайӧ мытшӧдсӧ кутасны ӧтув вынъясӧн жӧ. Ӧтпыръя могмӧдны ставсӧ жыръясӧн позянлуныс, дерт, абу. Чередын сюрс кӧкъямыссё сайӧ морт. Колӧ пӧшти кык миллиард шайт. Бюджетъяслы тайӧ сьӧмыс судзӧдтӧм, а воысь-во льготникъяслӧн лыдыс сӧмын содӧ.

Татьяна Супрядкина, Дмитрий Ведерников, «Юрган» телеканал.

Чорыд неминуча

Опера да балет театрлӧн сьылысь Ольга Сосновская веськаліс туйвывса чорыд аварияӧ. Неминуча вӧвлӧма ноябр 11-ӧд лунӧн Киров обласьтын. Ичӧт автомобильын сыкӧд ӧттшӧтш вӧлісны и Борис Калашников — тенор да Денис Кочетков — оркестрлӧн ударник. Артистъяс локтісны Ижкарысь гастрольяс вылысь, налӧн машина воча зурасис лесовозкӧд. Вӧр новлӧдлысь машина водитель мунӧма вина юӧм бӧрын. Мужичӧйяс доймалісны эз ёна. А со Сосновскаялӧн чегӧма сюрса лыыс. Кӧть ставӧн вӧлісны домасьӧмаӧсь тасмаясӧн. Та бӧрын сьылысь нӧшта на мунӧма нёльсё километра сыктывкарса травмпунктӧдз пукалӧмӧн, та понда дзоньвидзалуныс нӧшта на лёкмис. Доймӧмысла пӧ вӧлі весиг сьӧкыд лолавны. Ӧні опера да балет театрын, кӧні Сосновская ворсӧ некымын спектакльын, пыртісны репертуарӧ вежсьӧмъяс. Тӧдса, мый республикаса бурдӧдчанінын Ольга Сосновскаялы лоӧ куйлыны дыр, та дырйи оз лэдзны чеччыны. Тшӧтш ассьыс юбилейсӧ пасйыны лоӧ больнича койка вылын. Декабр дас сизимӧд лунӧ Республикаса народнӧй артисткалы тырӧ ветымын вит арӧс.

Ловлун ловзьӧдӧм

Кыдзи быдтыны челядьӧс эштӧдысь да бур мывкыда йӧзӧн да велӧдны радейтны айму? Татшӧм юалӧмъяс лоисны медшӧр темаясӧн «Рӧштвоса лыддьӧмъяс» дырйи. Сыктывкарӧ конференция вылӧ локтісны вичко, велӧдан учрежденньӧяс петкӧдлысьяс, бать-мам, туялысьяс, общественникъяс — кыксё сайӧ морт уджалӧны ӧкмыс нырвизь серти. Медбӧрын бӧръясны делегация пырысьясӧс, коді мунас Москваӧ странаса «Рӧштвоса лыддьӧмъяс» вылӧ. Елена Коновалы водзӧ кыв.

Кыдзи талунъя челядьӧс велӧдны бурторйӧ? Тайӧс талун вӧчны зэв сьӧкыд, ӧд ныв-зон босьтӧны пример интернетысь. Та вӧсна тайӧ уджсӧ колӧ нуӧдны ӧтув семьялы, школалы, вичколы. Ӧні православйӧ велӧдны окотитӧны нёль-витӧд классъясын велӧдчысьяс, сӧмын коймӧд пайыс. Но регыд котӧртасны Россияса йӧзлӧн религия, культура курсъяс. Сійӧ лоӧ быть велӧдны.

Филипп — Свято-Казанскӧй вичкоын настоятель:

— Талун дасьтысьӧны, медым тайӧ предметсӧ вермисны нуӧдны став классын. Тайӧ правильнӧ. Сэки челядь кутасны зумыда сулавны кок вылын. Налӧн лоас вужйыс, кутасны радейтны айму. Тайӧ Россиялы зэв тӧдчана.

[17]

Вероника Мишарина дас вит во велӧдӧ челядьӧс. Сійӧ вермис бур мывкыдӧ велӧдан уджъяс серти республикаса конкурсын. Котӧртіс интернетын челядьлы православнӧй энциклопедия сайт. Сэні йӧзӧдӧ мультфильмъяс, висьтъяс, гажъяслӧн история да вежаяслӧн олӧм йылысь гижӧдъяс.

Вероника Мишарина — история да обществознанньӧ велӧдысь, Кӧрткерӧс районса Каляты:

— Менам медшӧр удж — абу сӧмын интернетын сайт. Медтӧдчанаыс, мый ме велӧда челядьӧс бурторйӧ. Му туялӧм — тшӧтш менам удж. Ичӧт чужан му радейтны — тайӧ тшӧтш бурторйӧ велӧдӧм.

[15]

Татшӧм велӧдчӧм муніс Вӧркутаса епархия пасьта. Медшӧрыс — тӧдӧмлун сетны Арктикаса олысьяслы. Вужвойтыр орӧма цивилизация культура эскӧмысь. Во сайын на кӧр видзысьяслӧн челядь велӧдчисны сӧмын нёльӧд классӧдз. Талун найӧ босьтӧны шӧр образованньӧ. Вӧркутаса епархиялӧн водзӧ мог, медым пельшӧр да начальнӧй классъяс велӧдысь вӧлісны чумъясын.

Рафаил Беловолов — Вӧркутаса епархияын секретар:

— Кӧр видзысьяс пӧвстын зэв этшаӧсь образованнӧйӧсь. На пиын эм нелямын кык арӧса мужичӧй, коді вермас лоны вежа айӧн. Но сійӧ грамота оз тӧд, тайӧ кызь ӧтиӧд нэмын.

[13]

Москваысь гӧсьт кыпӧдіс врачлӧн нравственнӧй культура йылысь юалӧм. Тані висьысьлы отсӧг пыдди тшӧкыда шуӧны: медицина — абу могмӧс.

Ирина Силуянова — «Человек и медицина» ассоциацияын президент, филология наука доктор:

— Висьысь дорӧ бурлун, жалитӧм, тайӧ донаторъясӧ Гиппократ на пасйыліс. Сійӧ эз ошкыв абортъяс.

[12]

Ловлун ловзьӧдӧм — тайӧ национальнӧй безопасносьт,— пасйис Питирим архиепископ да казьтыштіс, кор православнӧй меддонаторъяс вунӧдӧм вайӧдліс ыджыд войнаӧдз.

Елена Кононова, Ольга Коняева, Олег Жуковскӧй, «Юрган» телеканал, Сыктывкар.

Ӧтувъя вынъясӧн

Вежысь Степан нима вичко бердын звӧннича лэптӧм вермас сувтны тулысӧдз. Оз тырмы сьӧм. Талун кежлӧ кыпӧдісны медводдза судтасӧ на. Но оз тырмы квайт машина кирпич. Быд фургон сулалӧ ӧкмысдас сюрс шайт. Абуӧсь шайтъяс и лэптысьяслы мынтысьӧм вылӧ. Сыктывкарса епархия корӧ водзӧ удж нуӧдӧм вылӧ отсӧг.

Питирим (Волочков) — Сыктывкар да коми-зыряналӧн архиепископ:

— Зэв ыджыд удж нин вӧчӧма. Ӧти воӧн та мында лэптісны. Ме эг чайт, мый татшӧм кывкутӧмӧн босьтчасны уджӧ ас вылӧ зільысьяс да лэптысьяс. Зэв уна кирпич пасъялӧны асланыс нимъясӧн. Кирпич сулалӧ ветымын шайт. Йӧз гижӧны ассьыныс да рӧдвужыслысь нимъяс кирпичьяс вылын, а ми кевмысям на вӧсна.

[35]

Епархияын мӧвпалӧны эштӧдны кирпич тэчас удж таво помӧдз. Тані сэсся лоас ыджыд зал. Мӧд судтаас лоас вӧскреснӧй школа. Звӧннича меститчас коймӧд да нёльӧд судтаясын.

Видзтысям туй вылын

Туй вылын видзчысьӧмлы сиӧм ветлысь лаборатория ӧні эм Республикаын. Торъя автомобиль лоас выль шӧринлы подулӧн. Сійӧ кутас ӧлӧдны туй вылын челядьлысь доймалӧм. Пасъям, тайӧ уджтас мӧвпыштысьяслы зэв ӧдйӧ удайтчис пӧртны сійӧс олӧмӧ. Отсалісны Республикаса правительство, автостраховщикъяслӧн союз да федерацияса экспертнӧй шӧрин.

Безопасносьт лабораторияын пассажиръяс сӧмын манекенъяс. Ӧтиыс петкӧдлӧ, кыдзи вӧдитчыны челядь креслӧӧн, мӧдіс — кыдзи сетны медводз отсӧг авария дырйи. Россия пасьтала татшӧмыс ветлан шӧриныс дас ӧти, Комилы мойвиис жӧ. Проектсӧ олӧмӧ пӧртісны регыдъя кадын.

Сергей Гапликов — Коми республикаса юралысь [40]

Страхуйтан котыр петкӧдлысьяс пасйӧны: правительствокӧд восьса сёрни отсаліс пӧртны олӧмӧ тайӧ проект. Та кындзи миян водительяс абуӧсь странаса сьӧд списокын.

Евгений Уфимцев — Россияса автостраховщикъяс котырӧн веськӧдлысь:

— Тіян республика бур рейтингын. Водительяс ёна оз торкавны правилӧяс. И ті нӧшта сідз шусяна турунвиж кытшын.

[15]

Федеральнӧй экспертъяс лӧсьӧдісны торъя велӧдан уджтас. Тані нёль юкӧн: том ветлысьяслы, аскиа водительяслы, велӧдысьяслы, бать-мамлы. Ставыс сы ради, медым чинтыны туй вылын неминучаяс.

Андрей Перловас — республикаса ГИБДД-ӧн веськӧдлысь:

— Лабораторияыс зэв колана. Водзті пропаганда нуӧдлім важ ног, мый ки улын эм, кутшӧм оборудованньӧ да литература. А ӧні со выль ставыс.

[15]

Пропаганда удж нуӧдӧны том автоинспекторъяс. Налӧн отрадъяс выйим став республика пасьтала.

Татьяна Селиванова, Екатерина Глазкова — том инспекторъяс, Емдін район:

— Ми велӧдам правилӧяс. Юксям аслам тӧдӧмлунъясӧн, медым туй вылын лоны зэв сюсьӧн. Да кужны, ковмас кӧ, сетны отсӧг.

[10]

Выль шӧринын велӧдчыны позяс нёль сюрс школьниклы. Во помӧдз лаборатория ветлас уна районӧ. Педагогъяскӧд ӧттшӧтш кутасны уджавны и автоинспекторъяс.

Оржы пыдди — войвыв бадь

Эжва районса уличаяслӧн чужӧмбаныс верас ёна вежсьыны локтан восянь. Гӧнӧн дӧзмӧдысь оржыяс вӧчасӧн кӧсйӧны вежны бур сорта бадь вылӧ. Аллергияӧн нёрпалысьясӧс найӧ оз кутны майшӧдлыны да оз кынмыны весиг медся кӧдзыд тӧлын. Татшӧм уджтас мӧвпыштіс Перымысь эколог. Коркӧ ань овлӧма Комиын да ӧнӧдз кутӧ йитӧд рӧдвужыскӧд. Дон босьттӧг сійӧ сетіс некымын сё быдсяма пулӧн вужйӧдӧм быдмӧг. Мӧвп воис сьӧлӧм вылас и районса веськӧдлысьяслы. Бадь кутасны быдтыны коймӧд номера школа-интернатын да сыктывкарса целлюлозно-бумажнӧй техникумын. Выль турунвиж эксперимент йылысь Светлана Некрасовалӧн репортаж.

Кӧкъямыс град, кӧкъямыс сикас. Талун став вужйыс му пиынӧсь. Виччысьӧны тулыс. Ӧні найӧ сӧмын ичӧтикъяс. Экология велӧдан шӧрин коймӧд номера школа-интернатын уджалӧ кызь во. Эмӧсь и теплица, пемӧсъяс. Челядь асьныс пуктӧны быдтасъяс да видзӧдӧны на бӧрся. Кор вӧзйисны быдтыны бадь вожъяс Эжвалы, пыр жӧ кӧсйысисны.

Елена Тереньева — Эжваса 3-ӧд номера школа-интернатӧн веськӧдлысьӧс вежысь:

— Кык теплица костын вичмӧдім му. Тані и мунӧ теплотрасса да быдмӧгъяслы шоныдджык лоӧ. Челядькӧд ӧттшӧтш дасьтім му, петім гуранъяс, сетчӧ пуктім вожъяс да унджыка тыртім, медым оз кынмыны. Тӧвсӧ, чайта, бура вуджас и бӧрас вуджӧдам вылі инӧ.

[16]

Апрельын аскиа бадьяс пуктасны ыджыдджык градъяс вылӧ, на улӧ местасӧ бӧрйисны нин. Кык-куим во мысти, кор вужъясыс ёнмасны, и на бӧрся оз нин ковмы сэсся видзӧдны, пуяссӧ пуктасны карся уличаяс вылӧ нин. Садитны Эжваын бадьяс вӧзйис Надежда Баглей. Эжваын чужлӧм эколог-волонтёр олӧ Перымын, но аслас чужанін йылысь оз вунӧд. Буретш сійӧ вӧзйис районса администрациялы вожъяс. Чинаяс радпырысь босьтісны.

Надежда Баглей — волонтёр-эколог:

— Сыктывкар менам чужанін и, дерт, ме тӧда сэтысь став пуяс. И кор ме локті Перымӧ, аддзи, мый тані быдмӧны мӧд сикас пуяс, мичаджыкъяс. И ме тӧдмалі, мый тайӧ пу сикасъясыс торйӧн рӧдмӧдісны войвылын быдтӧм улысь. Видзӧдан, быттьӧ лунвывса бадь, а збыльвылас некутшӧм кӧдзыдъясысь оз повны. [18]

Тайӧ, шуам, шар кодь да эзысь бадьяс. Найӧ оз ков пилитыштавны. Ортсыс налӧн да ыдждаыс и сідз колана. Нӧшта на вылӧ абу аллергия, кыдзи, шуам, оржы вылӧ. А бадьлӧн ӧти сикас позяс заптыны киподтуя йӧзлы да кыны кыз да ён увъясысь кутшӧмкӧ дозмукъяс.

Алексей Калинин — Эжва районса администрацияӧн веськӧдлысь:

— Перым и збыльысь мукӧд каръясысь ёна торъялӧ. Сэні колис оржыяслӧн сӧмын коймӧд пайыс. Найӧс бырӧдісны, а сійӧ местаяс вылӧ пуктісны бадьяс. Тадзи и миян чужис мӧвпыс. Медводз вӧчам вожъяс быдтанін, а сэсся водзӧсӧн кутан садитавны бадьяс.

[15]

И збыльысь, Перымын унджык улича вылын ӧні быдмӧны бадьяслӧн некымын сикас. Найӧн нимкодясьӧны и волонтёръяс, и асьныс карса олысьяс. Миянлы, дерт, ковмас уна вын пуктыны, мед тадзи жӧ мичмӧдны Эжва. Пасъям, медводз выль бадьяс пуктасны школа да детсадъяс йӧръясын. Бӧрас нин выль сикас пуяс садитасны районса став уличаяс вылӧ.

Светлана Некрасова, Любовь Филиппова, Дмитрий Ведерников, «Юрган» телеканал.

«Универвиденньӧын» вермысь

Универвиденньӧ дырйи медбур гӧлӧсӧн лои Коми республикаса госслужба академияын велӧдчысь Диана Сенькина. Студентъяслӧн факультетъяскостса гаж сизим воӧн быдмис абу профессионалъяс костын национальнӧй шылада конкурсӧдз. Таво сьылан тышъясӧ пырӧдчылісны кызь сизим вуз петкӧдлысьяс. Вермысьӧс бӧрйисны кык тшупӧдӧн. Медводз донъялісны суддяяс, а тайӧ «Ю» канал вылын «Новая фабрика звёзд» уджтасын вокал велӧдысь Владимир Коробка, да «Пицца» котырын сьылысь Сергей Приказчиков. Мӧд турын Евровиденньӧ моз гӧлӧсъяс сетісны вузъясын котӧртӧм комиссия. Финалӧдз татшӧм ногӧн воӧдчисны дас куим морт, на лыдын и Сыктывкарысь ныв. Диана сьыліс йӧзкостса сьыланкыв йӧз муын пӧгибнитӧм казак йылысь. Ён гӧлӧс да сцена вылын театра трагедия ворсӧм вӧрзьӧдісны быдӧнӧс.

Диана Сенькина — «Универвиденньӧ–2017» конкурсын вермысь:

— Тайӧ лоис меным виччысьтӧмторӧн. Ме кӧсйи сьывны тайӧ сьыланкыв, мед быдӧн гӧгӧрвоис тайӧ шога лоӧмтор. Дерт, пыр кутан лача вермӧм вылӧ, но менам вӧліс медшӧр могыс — петкӧдлыны сцена вылын сьыланкывйысь мӧвпсӧ. И меным зэв нимкодь.

[16]

Медводдзаяс лыдын сійӧс чолӧмаліс и Сергей Гапликов. Юралысь инстаграмын гижис, мый конкурс чӧж майшасис Комиысь петкӧдчысьяс вӧсна да пасйис, мый миян республика сетіс выль талантъяслы музыкаын ыджыд олӧмӧ туй. А нӧшта Сергей Гапликов сцена вывсянь аттьӧаліс ставнысӧ, кодъяс дасьтісны культураын тайӧ яръюгыд да вежӧрлы мӧрччысь гаж.

Сергей Гапликов — Коми Республикаса юралысь

[44]

Чукӧртчысьясӧс неуна дзугыльтӧдіс юӧр, мый республикаса панӧм «Универвиденньӧ» оз ло кӧзяинӧн. Татшӧм шуӧм вӧчис том войтыр кузя федеральнӧй агентствоын. Колян восянь уджтас пырӧ «Студенческая весна» программаӧ. Такӧд юралысь эз ло сӧглас да тшӧктіс регионса велӧдан министерстволы корсьны позянлунъяс водзӧ нуӧдны «Универвиденньӧ» буретш Сыктывкарын.

Республикаса первенство

А медбӧрын спорт йылысь. Сосногорск «Метеор» спорткомплексын котӧртісны дзюдо серти республикаса первенство. Пырӧдчисны сетчӧ дас куим арӧсӧдз том спортсменъяс. Найӧ локтісны Ухта, Сыктывкар, Вӧркута, Усинск, Абъячой да Лабытнангиысь.

Владимир Васин — ордйысьӧмъяслӧн шӧр суддя

[25]

Медводдза лунлӧн кывкӧртӧдъяс серти вермис Сосногорскса команда, мӧд места Сыктывкарлӧн, коймӧдӧн Вӧркутаысь котыр. Мӧд лунӧ медальяс лыд серти серпасыс вежсис. Медводдзаясын лоисны сыктывкарсаяс, сэсся вӧркутасаяс, да Усинск петкӧдлысьяс. Став вермысьлы медшӧр сюрпризӧн лоис республикаса сборнӧйӧ веськалӧм. Локтан вося мартын медбуръяс мунасны дорйыны регионлысь ним рытыв-войвыв кытшса ордйысьӧмъяс дырйи.

☼ ☼ ☼

И тайӧ здук кежлӧ ставыс. Аттьӧ видзӧдӧмысь. Казьтыштам, коді эз удит видзӧдны миянлысь петасъяс, кокниа вермас вӧчны тайӧс юрган.рф.ру сайт вылын да Ростелеком IP-телевиденньӧ отсӧгӧн «Управление просмотром» функция пыр. Став бурсӧ.

Пасйӧд

Текстуйтӧма 2017-12-26. Гилёва Ира.