Пос

Николай Лысенко. Чужан Войвылӧй. Сыктывкар, 1993. 112 лб.

НИКОЛАЙ ЛЫСЕНКО

ЧУЖАН ВОЙВЫЛӦЙ

Сыктывкар 1993

<Ванеев А. Е. @ Заводитчӧ тасянь менам Коми му : сьыланкыв // Николай Лысенко. Чужан Войвылӧй. Сыктывкар, 1993. Лб. 12.>

ЗАВОДИТЧӦ ТАСЯНЬ МЕНАМ КОМИ МУ

Енэж ӧшӧдчӧма сьӧда-лӧза шальӧн, Сайӧдӧма шонді сукмӧм арся ру. Летӧм вурун кодь жӧ кокни кымӧр талун Шебралӧма дзоньнас войвыв Коми му.

Зумыш кыддзысь-козйысь войтасьӧ сӧдз синва, Усьӧм пиыс вӧсна тадзи бӧрдлӧ мам. Вӧрлӧн арся думыс сьӧлӧмӧдзӧй инмӧ — Восьлала ме вӧрті мӧвпалысь да рам.

И оз сьӧктӧд воськов сьӧда-лӧза енэж, Весиг синтӧм зэрлы дӧзмӧм кыв ог шу. Батьлӧн чӧс туйсяньыс заводитчӧ меным Свет вылас дзик ӧти дона Коми му, Менӧ чужтысь-быдтысь муса Коми му.

<Ванеев А. Е. @ Чужан Войвылӧй : сьыланкыв // Николай Лысенко. Чужан Войвылӧй. Сыктывкар, 1993. Лб. 17.>

ЧУЖАН ВОЙВЫЛӦЙ

Сэзь да югыд тӧвся асылыс Клёнакылӧ — кын. Кылам воськовнымӧс ассьыным — Гора дзуртӧ лым.

Припев: Тайӧс нимкодясиг видзӧдны Ме ог дӧзмы нэм. Чужан Войвылӧй зэв мича да Вывті дона мем.

Кыдзьяс вылӧ жемчуг ӧшлӧма — Висьтавны он куж: Юрсянь кок улӧдзныс прӧшвиӧн Гыӧртӧма пуж.

Припев.

Асывбыд со шӧйта-ветлӧдла, Кыпыд менам лов. Кӧдзыд эськӧ нырӧс чеплялӧ, Сӧмын ме ог пов.

Припев.

<Ванеев А. Е. @ Муса чужанін : сьыланкыв // Николай Лысенко. Чужан Войвылӧй. Сыктывкар, 1993. Лб. 24.>

МУСА ЧУЖАНІН

Торъя муса овлӧ чужаніныд, Ставыс тані югыд, сӧстӧм, бур: Сӧмын мича рӧмъяс аддзӧ синмыд, Ньӧти тёпкан кок улад оз сюр.

Припев: Медся югыд тані тувсов войыс, Шемӧсмӧдӧ вӧр-валӧн шань мич: Торъя югӧр шондіыс тан койӧ, Торъя шӧвкӧн лӧставлывлӧ видз.

Шуда мортӧн овлам чужанінын, Тані овлӧ торъя кыпыд лов. Чужанінын весиг шогыд чинӧ, Да и водзлань видзӧдны он пов.

Тані шаньӧсь весиг арся зэръяс — На вылӧ и элясьны оз позь. Чужан му не ошкыны ог вермы, Мед кӧть сэсся эскасны кӧть оз.

<Ванеев А. Е. @ Печора весьтын асыв : сьыланкыв // Николай Лысенко. Чужан Войвылӧй. Сыктывкар, 1993. Лб. 32.>

ПЕЧОРА ВЕСЬТЫН АСЫВ

Кыркӧтш чук йылӧ, крут берег дорӧ Пета асылын пальӧдны ун. Улын визувтӧ-шуньгӧ Печора, Югдӧ сы весьтын шондіа лун.

Припев: Садьмӧм каляяс кливзӧны гора, Еджыд бордныс кодь кӧсйӧм и дум, Тшӧктӧ авъяӧн лоны Печора, Видзны сьӧлӧмын кыалысь нюм.

Татшӧм асылӧ дум вылӧ усьлас Важся мойд, кӧні лэбалӧ морт. Сэки окота турилысь-юсьлысь Кӧть нин здук кежлӧ водзсавны борд.

Вӧр-ва паляліг-садьмигӧн эска, Мый шань войтырыс му вылас тыр. Мед и ме лоа на пӧвстын эськӧ, Асъя руыс моз мед жӧ ог быр.

Чужан му водзын, бур йӧзыс водзын Мед ог вӧч весиг ичӧтик мыж. Гыяс ньылыд и гыяслы воча Мед жӧ падъявтӧг писькӧдчас пыж.

<Ванеев А. Е. @ Нывъяслӧн сьыланкыв : сьыланкыв // Николай Лысенко. Чужан Войвылӧй. Сыктывкар, 1993. Лб. 38.>

НЫВЪЯСЛӦН СЬЫЛАНКЫВ

Пуксяс рыт, кӧнкӧ ышловзяс гудӧк, Юыс кывтӧ и быттьӧ оз кывт. Мӧдлапӧлӧ сэк ньӧжйӧник вуджас Мича нывъяслӧн шань сьыланкыв.

Мича нывъяслысь синъяссӧ ёрӧ Ӧмидз кыалӧн чуймӧдан мич. Налӧн син водзын паськыд Печора, Налӧн кок улын дзоридза видз.

Висьтав, рытӧй, шань нывъяслы аттьӧ, Мед жӧ шудаӧсь лоасны век. Регыд воасны налӧн салдатъяс, Гажа кӧлысьяс ворсасны сэк.

Пуксяс рыт, кӧнкӧ ышловзяс гудӧк...

<Ванеев А. Е. @ Воркута йылысь сьыланкыв : сьыланкыв // Николай Лысенко. Чужан Войвылӧй. Сыктывкар, 1993. Лб. 43.>

ВОРКУТА ЙЫЛЫСЬ СЬЫЛАНКЫВ

Тані кодзулыс енэжын сярвидзӧ, Кылӧ турӧблӧн шутьлялӧм шы, Куйлӧ тундраыс лымъеджыд саридзӧн, И быд тола сэн — ланьтӧдчӧм гы.

Кӧдзыд муӧй тэ, йирмӧга Войвылӧй, Сӧмын тулысын ловзьылан яр, Зарни югӧрӧн шондіыс койлывлӧ — Меліалӧ шахтёръяслысь кар.

Тӧвся вой тані югзьӧ Вой кыаӧн — Тані мойд сяма, чуймӧдан мич. Тан оз ланьтлыны уджалан шыясыс — Воркута быд лун садьмылӧ сідз.

Йиа саридз тан пӧлясьӧ дугдывтӧг, Чизыр тӧв воча восьлалам ми. Чужан мунымлы шоныдсӧ-югыдсӧ Мудзтӧг перйӧ шахтёръяслӧн кн.

<Ванеев А. Е. @ Мем сэтшӧм дона лымъя видз : сьыланкыв // Николай Лысенко. Чужан Войвылӧй. Сыктывкар, 1993. Лб. 48.>

МЕМ СЭТШӦМ ДОНА ЛЫМЪЯ ВИДЗ

Ме тӧдлі гожся видзлысь мич, И меным нимкодь вӧлі. Но ме эг аддзы лымлысь дзирд, Кор виддзыс шойччӧ тӧлын.

Припев: Ой, сьӧлӧмшӧр, ой, чужанін, Тэ колан медся ёна. И некор радейтчӧм оз чин — Тэ светас медся дона. Ой, сьӧлӧмшӧр, ой, чужанін!..

И лымсӧ видлӧ менам ки, Кыдз коркӧ челядь дырйи, И шаня ӧзйӧ муслун би Да пыдӧ йиджӧ-пырӧ.

Припев.

И аслам чужан мулысь мич Кыдз быттьӧ выльысь восьта. Мем сэтшӧм дона лымъя видз, Кӧть сьӧрысь сійӧс босьта.

Припев.

<Ванеев А. Е. @ Арся юсьяс : сьыланкыв // Николай Лысенко. Чужан Войвылӧй. Сыктывкар, 1993. Лб. 60.>

АРСЯ ЮСЬЯС

Ланьтӧм вӧр-валысь чужӧмсӧ Чорыда чишкаліс пуж, Сьӧктӧм енэжыс му вылӧ Муртса нин, муртса эз усь. Арся видз выв чӧв-лӧнь, Арся ыб выв и пасьтӧм, и куш, Бара лунвылӧ лэбӧны юсьяс, И кельӧбныс кузь.

Припев: Регыд-регыд нин кӧдзалас Юсьясӧн эновтӧм поз, Регыд-регыд нин пӧльыштас Турӧблӧн ыркӧдысь лов. Гортысь мунысьяс вылӧ Мем элясьны талун оз позь. Мед жӧ лэбӧны юсьяс, И шогсьыны налы оз ков.

Ме ӧд кольчча со тан, Ме ӧд нэм помӧдз лоа со тан: Кута шонтыны ыркалысь му, Дона му, Чужан му. Менам лов шыӧй пӧсь, Менам кӧсйӧмӧй югыд да шань, Мед жӧ лэбӧны юсьяс — Ме кӧритан кывъяс ог шу.

Припев.

<Ванеев А. Е. @ Тэкӧд олӧмӧс ог ёр : сьыланкыв // Николай Лысенко. Чужан Войвылӧй. Сыктывкар, 1993. Лб. 66.>

ТЭКӦД ОЛӦМӦС ОГ ЁР

Дерт, ми ог томмӧй тэкӧд пыр, Но меным нюмъёвтлывлан кор, Ме сэки югыд шудӧн тыр, И тэкӧд олӧмӧс ог ёр. И менам мелі видзӧдлас Сэк аддзӧ сӧмын мусатор. Тэ пыр мем донаджык да ас, И тэкӧд олӧмӧс ог ёр.

Припев: Эз век вӧв лун-вой шань да бур, Но ми ӧд бурдлім водз ли сёр. И кужим вылын кутны юр, И тэкӧд олӧмӧс ог ёр.

Ме овла бур и овла лёк, Сьӧд неминуча суас кор, Но тэнӧ ме ог мыжав, ог, И тэкӧд олӧмӧс ог ёр. Нёль киӧн дорам ӧти шуд, Мед олӧм сюрӧс дыр оз ор. Ме нинӧм жалитны ог кут, И тэкӧд олӧмӧс ог ёр.

Припев.

Со миян быдмисны кык ныв — Му вылас медся донатор. Ме сёысь шуа аттьӧ кыв, И тэкӧд олӧмӧс ог ёр. И нывъяснымлы вичмас мед Оз бӧрдӧм шы, а сьылӧм гор. Ме нэм чӧж эска сӧмын тэд, И тэкӧд олӧмӧс ог ёр.

Припев.

<Ванеев А. Е. @ Дас кӧкъямыс арӧс тыран лун : сьыланкыв // Николай Лысенко. Чужан Войвылӧй. Сыктывкар, 1993. Лб. 72.>

ДАС КӦКЪЯМЫС АРӦС ТЫРАН ЛУН

Тэ быдмин, быдмин, дона ныв — Ог ки пӧлӧдыд кут. Тэ олӧм шысӧ ачыд кыв Да туяв асшӧр шуд. Дзик ӧткодь сӧнъясаным вир И ӧтлас олан нэм, И торъя мелі шонді дзирд, Мый тэ со менам эм.

Припев: Мед лоас мича дзоридз кодь Кузь олӧмад быд лун. И медым тэ вылӧ оз вод Сьӧд шог да сьӧкыд дум. Мед лоас чужӧм вылад нюм, Тэ дорысь гаж оз мун. И дас кӧкъямыс тыран лун Мед нэм чӧжыд оз вун.

Ме тэнӧ пӧръявны ог лэдз — Оз мырддьы шудтӧ мӧд. И разя тэныд октӧм лэч, Мый ачыд тэ он тӧд. Мем долыд сэк, кор тэныд бур, Кор ӧзйӧ тэнад син, Кор тёпкан кок улад оз сюр Да нимкодьыд оз чин.

Припев.

<Ванеев А. Е. @ Эзысь Печора : сьыланкыв // Николай Лысенко. Чужан Войвылӧй. Сыктывкар, 1993. Лб. 79.>

ЭЗЫСЬ ПЕЧОРА

Эзысь лым талун синъясӧс ёрӧ — Вывті лышкыд яр шонділӧн дзирд. Эзысь би киньӧн сявкйысь Печора Менам сӧнъясысь ӧддзӧдӧ вир.

Припев: Ме эг аддзыв, Печораӧй, важӧн Тэнсьыд эзысьӧн вольсалӧм эрд. Томмӧм лолӧй и кыпыд, и гажа — Эзысь лызьӧн кӧть панъясьны пет.

Эзысь бисера кыдз пу и пожӧм Эзысь берегӧ ланьтӧмны чӧв: Озырлунсӧ быд чалльӧ да вожӧ Эзысь лов шынас пӧльтӧма тӧв.

Дзирда серпассӧ мулысь да валысь Кута югыда казьтывны нэм: Эзысь рӧмыд, Печораӧй, талун Весиг юрсиам кӧвъясис мем.

<Ванеев А. Е. @ Виччысьӧм : сьыланкыв // Николай Лысенко. Чужан Войвылӧй. Сыктывкар, 1993. Лб. 84.>

ВИЧЧЫСЬӦМ

Позис кывны ю дорын Уна мелі кыв. Армияӧ колльӧдіс Мусуксӧ том ныв.

Нывлысь сьӧлӧм висьӧмсӧ Висьтавны оз ков, Код нӧ муслун кусӧмысь Том дырйи оз пов?

Частӧ волӧ ныв ордӧ Сиктса почтальон. Нывлы шоныд письмӧяс Быд лун гижис зон.

Тадзи гожӧм прӧйдитіс, Колис кӧдзыд тӧв. Гажтӧмтчыны нывкалы Помкаыс эз вӧв.

Сӧмын ӧні тӧлысь чӧж Кыв ни джын эз во. Виччысигӧн кажитчӧ, Быттьӧ колис во.

Гашкӧ, зонлысь сьӧлӧмсӧ Мырддис кодкӧ мӧд. Гашкӧ, важмоз радейтӧ — Нинӧмтор он тӧд.

Кыдзи нывлы висьтавны: «Весь оз ов салдат. Корсюрӧ и письмӧтор Гижны абу кад.

Виччысь сійӧс, ныланӧй, Чӧв овны оз кут. Оз лэдз тэнӧ кияссьыс — Тэ ӧд сылӧн шуд!»

<Ванеев А. Е. @ Лӧзалысь парма : сьыланкыв // Николай Лысенко. Чужан Войвылӧй. Сыктывкар, 1993. Лб. 90.>

ЛӦЗАЛЫСЬ ПАРМА

Чизыр тӧлысь и кӧдзыдысь видзӧ, Сетӧ сынӧдлы пожӧм лыс кӧр. Сійӧ ловъя, и лышкыд, и мича — Коми му пасьта лӧзалысь вӧр.

Припев: Ӧткодь муса и тӧвнас, и арнас, Тулыс-гожӧмнас ог нин и шу. Мед жӧ юр весьтам лӧзалас парма, Лоас кок улам ас чужан му.

Сюся кывза ме вӧр-валысь сёрни, Аддза туруна-дзоридза видз. Тӧвнас турӧблӧн лымъеджыд бордъяс Коми пармалы содтӧны мич.

Чужан вӧр-ва оз овлывлы пӧдса, Коми морт сэтчӧ некор оз вош: Сылы ки пыдӧс визьяс моз тӧдса Вӧрса ёльяслӧн быд ичӧт вож.

<Ванеев А. Е. @ Мыйла тэ эн бергӧдчыв? : сьыланкыв // Николай Лысенко. Чужан Войвылӧй. Сыктывкар, 1993. Лб. 95.>

МЫЙЛА ТЭ ЭН БЕРГӦДЧЫВ?

Колин сійӧс туй бокӧ Быттьӧ ӧтка бербаӧс, Муртса кисӧ кутыштлін, Сэсся эн и бергӧдчыв.

Припев: Мӧдӧс он нин аддзы тэ Татшӧм авъя-мичаӧс. Мыйла тэ эн бергӧдчыв, Бӧрвылад эн видзӧдлы?

Чышкис вазьӧм бандзибсӧ Лӧза-гӧрда чышъяннас. Некыдзи эз гӧгӧрво Тэрмасьӧмӧн пышйӧмтӧ.

Радейтан-ӧ, мустӧмтан, Колис тӧдтӧм-висьтавтӧм. Тэнад бӧръя кывъясыд Кӧдзыд ваӧн кисьтӧм кодь.

И кор сиктӧ бергӧдчан Во-мӧд кежлӧ сёрмӧмӧн, Сылысь шудсӧ эн нин дзуг Муслун йылысь сёрниӧн.

<Ванеев А. Е. @ Гулюяс : сьыланкыв // Николай Лысенко. Чужан Войвылӧй. Сыктывкар, 1993. Лб. 99.>

ГУЛЮЯС

Кытчӧ ті вошлінныд, Кытчӧ ті бырлінныд? Ми тай эг аддзысьлӧй, Гулюяс дыр нин ӧд...

Кодкӧд эн ладмӧдчӧй Да энӧ моздысьӧй? Зэв уна вояс ті Тані эн поздысьӧй.

Гашкӧ, скӧр вой тӧвъяс Тіянӧс вӧтлісны, Гашкӧ и турӧбъяс Ловнытӧ пӧдтісны?

Мыйла ті бырлінныд, Мыйла ті вошлінныд? Талун зэв нимкодь мем, Мый ті бӧр воинныд.

Гулюяс, гулюяс, Сыктывкар весьтасын Тіянӧс аддза ме — Лэбанныд эжтаслань.

Кутшӧм ті авъяӧсь, Кутшӧм ті мичаӧсь... Гулюяс, гулюяс, Лоӧй дзоньвидзаӧсь!

Шондіа кадъясӧ И букыш лунъясӧ Тіянлы нюмдӧны Ветлысьяс-мунысьяс.

Гулюяс, гулюяс, Челядь ки пыдӧсысь Эн полӧй, кокалӧй Пӧтӧса шыдӧссӧ.

Кытчӧ ті вошлінныд, Кытчӧ ті бырлінныд? Ми тай эг аддзысьлӧй, Гулюяс, дыр нин ӧд...

Карса став войтырлы Донаӧсь лоанныд. Талун зэв нимкодь мем, Мый ті бӧр воинныд!

<Ванеев А. Е. @ Война дырйи чужӧм нывъяс : сьыланкыв // Николай Лысенко. Чужан Войвылӧй. Сыктывкар, 1993. Лб. 105.>

ВОЙНА ДЫРЙИ ЧУЖӦМ НЫВЪЯС

Кор мӧдӧдчим зонъяс салдатӧ, Ми нуим тшӧтш муслунлысь кывъяс, Мый шуисны гусьӧн да пӧся Война дырйи чужӧм шань нывъяс.

Припев: Ми регыд нин воам салдатысь И сьыламӧй выль сьыланкывъяс: Бур гӧтыръяс лоасны миян — Война дырйи чужӧм шань нывъяс.

Война кадӧ потаныс весьтын Скӧр чардалӧм-гымалӧм кывсис. Эз кокниа быдмыны найӧ — Война дырйи чужӧм шань нывъяс.

Война налысь курдӧдіс сьӧлӧм Эз вӧвлыны батьяслӧн сывйын, Эз тӧдлыны батьяслысь муслун Война дырйи чужӧм шань нывъяс.

И талун ме сьӧлӧмсянь кӧсъя, Эз тӧдлыны мед кӧдзыд кывъяс Да олӧмын йирмӧга пужъяс Война дырйи чужӧм шань нывъяс.

<Ванеев А. Е. @ Лысва : сьыланкыв // Николай Лысенко. Чужан Войвылӧй. Сыктывкар, 1993. Лб. 110.>

ЛЫСВА

Усяс кор сӧдз лысва, югыд лысва, Рытсяньыс нин тӧдӧны бур йӧз; Аски букыш кымӧр зэр оз ысты, Аски лунтыр енэж лоас лӧз.

Шонді петіг чӧсмасьыштас пыста — Лапкор вылысь юас югыд войт. Шуӧны, мый асъя сӧстӧм лысва Бурдӧдлывлӧ весиг сьӧлӧм дой.

Муса нывъяс, ворсӧй, резсьӧй, мыссьӧй — Мелі лысва ставлы содтас мич. Аддзанныд ӧд — лысва косьмӧм мысти Кымын рӧмӧн дзоридзалӧ видз.