Талун. 2017-12-01

Юрган телеканаллӧн выльторъяс: 2017ʼ ӧшым 1ʼ лунся «Талун» уджтас.

Текст

Видза оланныд! Нимкодь, мый тайӧ здукъясӧ ті видзӧданныд «Талун» программа. Студияын Анастасия Тюрина и выпускын со мый медшӧрыс:

• Велӧдам ворсӧмӧн. "Школаын кӧ заводитасны найӧ сӧвмӧдны коми кывсӧ, то найӧ вӧляникысь и заводитасны сёрнитны тайӧ кыв вылас." Юркарын чукӧртчисны челядьӧс коми кыв велӧдысьяс.
• Ӧкмысӧн Комиысь да ӧти Ямалысь. "Невестаяс бӧрдӧны верӧс сайӧ петӧм понда." Юркарын мунӧ «Райда» конкурс.
• Вӧла спорт сӧвмӧдӧм. "Йӧктыны вӧлӧс весиг позьӧ велӧдны, но кыдзи сылы ветлыны му кузя, коді небыд, васӧд?" Вевта манеж лоас.

2030-ӧд воӧдз стратегия

Россияын 2030-ӧд воӧдз вӧр комплекс сӧвмӧдӧм йылысь сёрнитісны странаса целлюлоза да кабала промышленносьтлы сиӧм войтыръяс костса коймӧд конференция пырӧдчысьяс. Венаын власьт да бизнес петкӧдлысьяс вежласисны видзӧдласъясӧн овмӧсъяс сӧвмӧм йылысь. Бӧръя сёрниӧ пырӧдчис и Коми Республикаса юралысь. Сергей Гапликов пасйис, 2020-ӧд воӧдз стратегия йылысь кабала пыртӧмсянь колис нин 10 во. Юкӧнын унатор вежсис, и рынок тшӧтш. Водзын кӧ сійӧ вӧлі страна да СНГ-ын, а талун коланлун эм Китай, Индия, Рытыв Европа да США-ын. Такӧд йитӧдын и лӧсьӧдӧма выль стратегия. Сылӧн могъяс: суйӧр сайӧ целлюлоза нуӧм, картон, стрӧитчан материал да асмогасян кабала дасьтӧм, фанера, гортса эмбур вӧчӧм. Та могысь овмӧсъясын кӧсйӧны восьтыны промышленнӧй кластеръяс. Лоас сійӧ и миян Республикаын. Казьтыштам, регионса правительство ӧні корсьӧ инвесторъясӧс Мылдін районын вӧр химия комбинат строитӧм могысь, коді оз кут тшыкӧдны вӧр-ва.

Коми кыв ме тӧда

Сыктывкарын регионса 70 воспитатель вежсьӧны тӧдӧмлунъясӧн ворсӧмъяс отсӧгӧн коми кыв велӧдӧм кузя. Нӧшта 20 велӧдысь йитчисны велӧдчӧм дорӧ онлайнын. Лекцияяс лыддьӧ Хельсинкиысь профессор Екатерина Протасова. Сійӧ дасьтіс челядьӧс кывйӧ велӧдӧм кузя уна пособие. Висьталас Елена Кононова.

— Кӧчиль вӧрті котралӧ, ӧдзӧсӧ таркӧдчӧ: тук-тук.

Семинарлысь мӧд лунсӧ эз весьшӧрӧ котыртны Выльгортса 8-ӧд садйын. Буретш тані лунтыр челядь сёйигӧн, заняттьӧяс вылын, гуляйтігӧн сёрнитӧны кык кыв вылын – роч да комиӧн. Тайӧ шусьӧ "кывйӧ пырӧдчан технология". Кор кага ичӧтсяньыс заводитӧ велӧдны чужан кыв кындзи нӧшта мӧдӧс. Талун тӧдса ??? дзолюкъяс бурджыка велалӧны сёрнитны мӧд кыв вылын ыджыдджык ныв-зон серти.

Зоя Остапова, КРИРО-ын школаводзса национальнӧй мытшӧдъяс лабораторияӧн веськӧдлысь:

— Дерт жӧ, челядьлы тайӧ кывйыс кыдзи мӧд кыв. Дерт, налы зэв интереснӧ велӧдчыны. Но и ог вермӧй шуны, мый найӧ, сідз жӧ, кыдзи роч кыв, тӧдӧны коми кыв. Но найӧ гӧгӧрвоӧны сёрнисӧ, гӧгӧрвоӧны. И, шуам, школаын кӧ заводитасны найӧ сӧвмӧдны коми кывсӧ, то найӧ вӧляникысь и заводитасны сёрнитны тайӧ кыв вылас. И артмас сідзи, мый найӧ лоӧны кык кывъя войтырӧн.

Кык кыв вылын сёрнитысь дзолюклӧн сӧвмӧ паметьыс, мывкыдлуныс. Сійӧ бурджыка сёрнитӧ, грамматика сылы кокньыдджыка сетчӧ, шуӧны специалистъяс. Кывйӧ пырӧдчан опыт миян босьтісны Финнса удж ёртъяслысь. Суомиын тайӧ технологияӧн вӧдитчӧны важӧн нин.

Екатерина Протасава, Хельсинкиса университетысь профессор, челядьӧн кык кыв велӧдӧм туялӧ уна во нин. Сійӧ ачыс ветлӧдліс школаӧ, кӧні сёрнитісны кык кыв вылын. Сылы пыр вӧлі окота тӧдны, кыдзи йӧзыс велӧдӧны уна кыв. Учёнӧй пасйӧ, мыйла колӧ тӧдны ассьыд чужан кыв, и оз гӧгӧрво, мыйла Республикаса сиктъясын мам-бать кедзовтӧны коми кывсӧ. Чайтӧны, английскӧй коланаджык.

Екатерина Протасова, педагогика наукаса доктор, Хельсинкиса университетын профессор-адъюнкт:

— Английскӧй кыв велӧдны кокни да ӧдйӧ, тайӧ абу мытшӧд. Мытшӧдыс сыын, мый сьӧкыдджык видзны кусӧмысь ассьыд чужан кыв. Тані уникальнӧй абу английскӧй кыв, а коми. Ті кӧ кутанныд сёрнитны национальнӧй культура йылысь английскӧйӧн, ті воштанныд национальнӧй культуратӧ. Ӧд культура да кыв топыда йитчӧмаӧсь. Ӧта-мӧдтӧг найӧ овны оз вермыны. Оз позь радейтны чужан му чужан кыв тӧдтӧг.

Республикаын талун 65 детсадйын коми велӧдӧны кыдзи чужан кыв. 120-ын — кыдзи канму кыв. Выльгортса 8-ӧд садикын моз программа олӧмӧ пӧртӧны нӧшта 7 учрежденньӧын. Педагогъяс пыр бурмӧдӧны ассьыныс уджсӧ. Юксьӧны ӧта-мӧдкӧд опытӧн. Ӧд быд районын эм аслыспӧлӧслун.

Надежда Беляева, Изьва районса администрацияын велӧдан управленньӧын методист:

— Миян выйим сэтшӧм особенносьт – тундраӧ ветлӧны миян, тундраӧ ветлӧны миянлы кык, дажӧ куим населённӧй пунктысь. И миян выйимӧсь челядьяс, кодъяс тожӧ тундраӧ ветлӧны. И найӧ миян тожӧ тундрасьыс вайӧны выльторъяс. И ассьыныс ёртъяснысӧ велӧдӧны. Вот сэтшӧм миян познавательнӧй мир миян садикын мунӧ.

Семинарлӧн 2 лун чӧж школаводзса велӧдан юкӧнын педагогъяс чукӧртісны уна выль тӧдӧмлун да выль ворсӧмъяс. Мый отсӧгӧн позяс кокниа да интереснӧя сӧвмӧдны дзолюклысь чужан да мӧд кывъяс велӧдны кӧсйӧм.

Елена Кононова, Антон Ворожищев. Юрган телеканал.

Личнӧй приёмъяслӧн вежон

Личнӧй приёмъяслӧн вежон подулын единороссъяслӧн регионса юкӧнын водзӧ мунӧ йӧзкӧд аддзысьлӧмъяс. Талун приём нуӧдіс Федерация Сӧветӧ пырысь Валерий Марков. Сы дорӧ шыӧдчис юркарса олысь. Аньлӧн патера важ керкаын. А важ оланінысь вуджан программа серти черӧдӧ сійӧс оз сувтӧдны. Семья оз вермы чукӧртны та могысь кабалаяс, колӧны юристъяслӧн отсӧгъяс.

Валерий Марков, Комисянь Федерация Сӧветӧ пырысь:

— Видзӧдлыны кӧ та вылӧ боксянь, кажитчӧ мый, локтӧны кӧ, шуам, вылысджык тшупӧд вылӧ, сідзкӧ найӧстӧ, навернӧ, эз гӧгӧрвоны ли мый ли. Та серти и видзӧдан сёрни вылас и аслад удж вылӧ. Да, артмывлӧ, мый йӧзыс, кодъяс асланыс могъясӧн локтӧны, асланыс дойясӧн локтӧны, оз аддзыны либӧ бур вочакыв, либӧ оз аддзыны мый найӧстӧ кӧсйӧны гӧгӧрвоны. А медым гӧгӧрвоны, сідзкӧ ӧд колӧ и олӧмтӧ бурас тӧдны, ӧти боксянь. Мӧд боксянь кӧ, колӧ оланпасъястӧ бурас тӧдны. А коймӧд боксянь кӧ, колӧ и кыдзкӧ вӧчны сідз, мед тэнад видзӧдласыд бергӧдчис налань. Мед тэ найӧстӧ гӧгӧрвоин. Сійӧ йӧзыслы колӧ.

А лунӧн водз йӧзкӧд аддзысьліс Республикаса юстиция министр Дмитрий Наумов. Шыӧдчысьяс корисны отсавны оланінын регистрируйтчыны. И нӧшта юалісны, кыдзи позьӧ веськавны йӧзкостса дружинаӧ?

2018ʼ вося бӧрйысьӧмъяс

Бӧрйысянінъяс да меставывса комиссияясын ведеонаблюденньӧа протоколъясын куаркодъяс, бюллетеньяс видлалӧм вылӧ комплексъяс. Татшӧм выльторъяс виччысьӧны регионса олысьясӧс странаса шӧр бӧрйысьӧмъяс дырйи. Мунасны найӧ март 28-ӧд лунӧ локтан воӧ. Россияса олысьяс бӧръясны президентӧс. Регионса бӧрйысян комиссия заводитіс дасьтысьны тӧдчана лун кежлӧ. Паськыдджыка Татьяна Супрядкина.

Брайль библиотекаӧ волысьяс 6-ӧд во нин пырӧдчӧны бӧрйысьӧмъяслӧн клубӧ. Найӧ сюся кывзӧны оланпасӧ вежсьӧмъяс йылысь, ӧд выборъяс дырйи синтӧм йӧзлы дасьтӧны торъя трафаретъяс, медым гӧлӧсуйтны вермисны став моз.

Галина Безносикова, Брайль нима библиотекаӧн веськӧдлысь:

— Гортас волӧны избиркомӧ пырысьяс, но унджыкӧн кӧсйӧны волыны бӧрйысян участокӧ. Та вӧсна дасьтам трафаретъяс, сеталам найӧс вермытӧм йӧзлы, медым гӧлӧсуйтісны асьныс.

Бӧрйысьӧмъяс йылысь ёна юасьӧны талун и студентъяс, кодлы тырис 18 арӧс. Найӧ медводдзаысь вермасны волыны участокъяс вылӧ.

Алла Латушка, Сыктывкарса лесопромышленнӧй техникумын история велӧдысь:

— Татшӧм том йӧз медводдзаысь мунасны бӧрйысьны. Налы колӧ тӧдны оланпасъяс, история, медым гӧгӧрвоӧмӧн сетісны гӧлӧсъяс кандидатъяс вӧсна. Та вӧсна, история велӧдысь вылын талун ыджыд мог.

Президентӧс бӧрйигӧн позяс волыны участок вылӧ, коді кивывджык мортлы. Но ковмас гижны январ помӧдз медводз заявленньӧ, мый оз кӧсйы гӧлӧсуйтны аслад оланін кузя бӧрйысян участокын.

Наталия Макарова, республикаса избиркомын аппаратӧн веськӧдлысь:

[24]

Президентӧс бӧрйигӧн оз ло досрочнӧй гӧлӧсуйтӧм и открепительнӧй удостоверенньӧясӧн оз кутны вӧдитчыны. Пыртасны уджӧ выль 20 комплекс, кодъяс кутасны обрабатывайтны бюллетеньяс.

Елена Баскакова, республикаса избиркомӧн веськӧдлысьӧс вежысь:

[26]

Бӧрйысьӧмъяс бӧрся позяс видзӧдны интернет пыр. Быд участок вылӧ ??? сувтӧдасны камераяс. Ӧні тайӧ позянлунъяс видлалӧны.

Татьяна Супрядкина, Ольга Коняева, Антон Ворожищев. Юрган телеканал.

Ас вынъясӧн

Регионса бурдӧдысьяслӧн ассоциация дась ас вылас босьтны медикъяслысь аккредитация. Тайӧ могыс котырлы вуджас мӧд во нин. Сідзкӧ, бурдӧдысьяс асьныс кутасны кывкутны асланыс уджысь. Талун регионса ассоциациялӧн аскиа лун йылысь сёрнитісны кыпыд собранньӧ дырйи. Республикаса котырлы тырис 25 во. Медикъяслысь правояс водзмӧстчысьяс дорйӧны и республика, и регионса тшупӧдын. Буретш, миян врачьяс вӧзйисны примитны «О защите медицинских работников от нападений» оланпас бала.

Анна Солдатенкова, Бурдӧдысьяслӧн республикаса ассоциацияӧн веськӧдлысь:

— Врачьяслӧн котырӧ мӧдӧдім медицина национальнӧй палатаӧ. Республикаса йӧзӧн бӧрйӧмаяс отсалісны.

Талун Коми Республикаса бурдӧдысьяслӧн ассоциацияын сюрс да джын сайӧ медик. Тайӧ регионса медикъяслӧн коймӧд пайыс.

Бур семья

Мам-батьлӧн медшӧр озырлуныс – челядь. Та йылысь эскӧдӧны Михаил Степанович да Ирина Владимировна Рогожинъяс. Миян сюжетлӧн геройяс. Казьтыштам, «Единӧй Россия» ютыр олӧмӧ пыртӧ выль проект – медбур семьяяс йылысь юӧртӧм. Со, Рогожинъяс на лыдын, быдтӧны 7 челядьӧс. Нӧшта позьӧ нин ошйысьны и 11 внукӧн.

Михаил Степанович удж вылын, Ирина Владимировна челядьыскӧд гортас. Рытнас дасьтысьӧны мунны концерт вылӧ. Сійӧс дасьтӧ Гриша пиыс. Семьяын сійӧ медыджыд, велӧдчис Искусствояс колледжын, йӧктӧ йӧзкостса танечьяс, велӧдӧ хип-хоп. Дасьтысьӧ петкӧдчӧм кежлӧ и Саша – сійӧ талун нуӧдӧ концертсӧ.

[22]

Йӧктӧ «Сигудӧк» ансамбльын и Стёпа вокыс, пыр ветлӧны Россия пасьтала гастрольясӧн. Семьяын ставныс енбиаӧсь, ачыс Ирина Владимировна радейтӧ серпасасьны.

[10]

Керкаын пӧрадок вӧсна кывкутӧны нывъяс. Местаыс абу уна. Сёйны ветлӧны черӧдӧн ӧта-мӧд бӧрся. Но Ирина мам дзик оз майшась ни оз жалит, мый коркӧ вӧчис татшӧм воськов. Уна во уджаліс социальнӧй службаын, аддзыліс ас синмӧн омӧля олысь семьяяс, кӧні челядьӧс увтыртӧны вӧлі. Ӧні, шуӧ, миян семьяын став челядьыс ӧткодьӧсь, чужӧйыс абу.

[27]

Ульяналы 6 арӧс. Дасьтысьӧ школаӧ мунны. Петкӧдлӧ ассьыс мичмӧдчанторъяс.

[20]

Талун семьялӧн ӧти мӧвп – ветлыны лунвылӧ машинаӧн. Важӧн нин пӧ сьӧлӧмсянь эг шойччылӧй.

[22]

Семьяыс радейтӧ шойччыны вӧрын. Ӧтвылысь чукӧртӧны тшак-вотӧс. Ӧтвылысь и уджалӧны град вылын. Быдтӧны быд сикас градвыв пуктас. Ставсӧ вӧчам пӧ ӧтвылысь, зыксьытӧг. И тайӧ быд семьялы пример пыдди.

Анастасия Михайлова, Любовь Филиппова, Иван Богомолов. Юрган телеканал. Сыктывдін район.

☼ ☼ ☼

Лоас-ӧ Республикаса конноспортивнӧй школаын вевта манеж? Ті тӧдмаланныд реклама бӧрын.

Вӧла спорт сӧвмӧдӧм

Республикаса конноспортивнӧй школалы вевта манеж стрӧитӧм вермасны заводитны 2019-ӧд воӧ. Та йылысь миян каналлы интервьюын юӧртіс видз-му овмӧс министр Анатолий Князев. Талун сійӧ воліс места вылӧ, кӧні мӧвпалӧны стрӧитны спортобъект. Тӧдса нин, мый регионса правительстволӧн артмис сёрнитчины медводдза 3 миллион йылысь. Мый вылӧ найӧс видзасны, водзӧ мунысь репортажын.

Конноспортивнӧй школалӧн восьса манеж вылӧ петны кӧдзыд, либӧ лым сылігӧн оз позь. Заняттьӧяс дырйи вӧвъяс вильдыны вермасны. А сідз кӧ, и рӧдтысь доймавны вермас, и ачыс вӧлыс тшӧтш.

— Тренировка миян час мунӧ. Та бӧрын вӧлӧс тупкалам вӧсни шебрасӧн, мед оз кынмы. И асьным котӧртам гортӧ.

Венны мытшӧд отсаліс эськӧ тупкӧса манеж. Позис нӧшта и сӧвмӧдны выль спорт сикасъяс. Шуам – выездка. Вӧвъясӧс позьӧ унаторйӧ велӧдны, но упражненньӧяс медым вӧчны, колӧ чорыд веркӧс.

Светлана Захарова, республикаса конноспортивнӧй школаӧн веськӧдлысь:

— Йӧктыны вӧлӧс весиг позьӧ велӧдны, но кыдзи сылы ветлыны му кузя, коді небыд, васӧд? Век конъясьӧ, вильдалӧ. А лоас манеж – дзик мӧд нога ставыс лоӧ.

И со эм помшуӧм. Спонсоръяс юкасны школалы 3 миллион шайт. Джын сьӧмыс мунас техника вылӧ. Кӧсйӧны ньӧбны трактор. Та кындзи, содтасны и вӧвъяслысь лыд.

Анатолий Князев, правительствоӧн веськӧдлысьӧс вежысь, видз-му овмӧс министр:

— Вӧвъяс дасьӧсь нин воны миян ордӧ. Бӧрйим кодӧс колӧ. Тайӧ ахалкетинечьяс, медым позис джигитовка тані сӧвмӧдны. Тайӧ выль туйвизь Республикалы. Сёрнитчим специалистъяскӧд, кодъяс велӧдны челядьӧс кутасны.

Сьӧмыс тырмас и манеж стрӧитӧм улӧ, и проектно-сметнӧй документация лӧсьӧдӧм вылӧ. Та кындзи правительство сетіс заявка Россияса президентлӧн резервнӧй фондӧ. Сэтысь виччысьӧны нӧшта 3 миллион. Стрӧитчан уджъяс мӧвпалӧны заводитны 19-ӧд воын.

Субӧтаса турӧб

Комиын лӧнь поводдя вежсяс турӧб вылӧ, а Балканскӧй полуостровысь регионӧ воысь циклон вӧсна поводдя лёкмас. Войнас нин заводитас лымъявны, костас зэрас. Кыптас ыджыд тӧв. Шондӧдас 2 градусӧдз. Вӧскресенньӧӧ поводдя бурмыштас. Лоӧ тшӧтш шоныд. Быдлаын лоӧ ноль гӧгӧр градус. Пасъям, тайӧ 10–15 градус вылӧ нормаысь.

21-ӧд нэма енбиа йӧз

Декабр 8-ӧд лунӧ Республикаса опера да балет театрын мунас «Таланты 21 века» концерт. Петкӧдчасны сэні енбиа том йӧз, найӧ, кодъясӧс тӧдӧны нин республикаын. Петасны сцена вылӧ найӧ театрлӧн симфоническӧй оркестркӧд. Ӧні мунӧны репетицияяс.

Концерт программаын видзӧдысьяслы уна виччысьтӧмтор. Том музыкантъяс дасьтісны верстьӧяслысь программа. Вокалистъяс петкӧдчасны симфоническӧй оркестркӧд ӧттшӧтш.

Искусствояс колледжысь студентка Алёна Шестакова майшасьӧ, ӧд ворсны ковмас Моцартлысь шылад.

Алёна Шестакова, Искусствояс колледжын студентка:

[21]

Кывзӧмъяс помасисны нин, мунӧны репетицияяс. Сыктывкар кындзи ассьыс талантъяс вӧзйисны Ухта да Вӧркута.

Наталья Расторгуева, Искусствояс колледжын велӧдысь:

[25]

21-ӧд нэмся талантъяс уджтасӧн веськӧдлӧ театрлӧн медшӧр дирижёр – Азат Максутов. Сійӧ дасьтӧ коймӧд программа том сьылысьяскӧд.

Азат Максутов, Опера да балет театрын медшӧр дирижёр:

[20]

Азат Максутов серти проектыс аслыссикас. Сійӧ отсалӧ пӧ восьтыны выль енбиа челядьӧс, сетны позянлун налы бӧрйыны верстьӧ олӧмын искусство туйвизь.

Алена Терентьева, Анастасия Тюрнина, Елена Красильникова, Роман Боровиков. Юрган телеканал.

Войвывса мича аньяс

«Райда» 6-ӧд конкурсӧ таво пырӧдчасны Комиысь ӧкмыс ныв да ӧти Ямалысь. Тайӧ кадӧн сӧмын ӧтчыдысь петкӧдчисны Кулӧмдінын — медводдза вермысь Яна Васильченковалӧн чужанінын. Сы бӧрын вермысьясӧн вӧліны Емдін, Изьва, Ухта да Интаысь нывъяс. Медводз жюри донъялӧ коми кыв да традицияяс тӧдӧм. Висьталас Светлана Некрасова.

Велӧдысь, студентка, велӧдчысь, методистка – талун найӧ ставныс петкӧдчисны выль ӧбразын. Сцена вылӧ петтӧдз дыр дасьтысисны, венісны ассьыс полӧм. Дерт, отсалӧны рӧдвужыс бура кутчысьны.

Анна Махотина, «Райда» конкурсӧ пырӧдчысь, Удора район:

— Ме ноябрын ролик дасьті конкурс кежлӧ. Лӧсьӧді ассьым уджтас. Велӧді кывъяс. Ӧнӧдз велӧда.

Ирина ачыс Ямалысь, но велӧдчӧ СГУ-ын. Ветліс гортас визитнӧй карточка дасьтӧм могысь. Сьывны пӧ ог кут, а театральнӧй петкӧдчӧм пӧ дась.

Ирина Терентьева:

— Ме петкӧдла, кыдзи невеста дасьтысьӧ петны верӧс сайӧ. Тайӧ зэв аслыссикас ӧбрадыс миянын сӧмын кольӧма. Невестаяс бӧрдӧны верӧс сайӧ петӧм понда.

Вермысьӧс бӧръясны куим конкурс бӧрын. Ордйысьӧм-котӧртысьяс серти медшӧрыс абу вермӧм, а финн-йӧгра войтырлысь традицияяс видзӧм-сӧвмӧдӧм.

Маргарита Низовцева, «Райда» конкурслӧн куратор:

— Кор сӧмын мӧвпыштім конкурссӧ, чайтім, лоас сӧмын ас костаным вермасьӧм. А со артмис мый, и регионъяс петкӧдчӧны, весиг суйӧр сайын тӧдӧны сы йылысь.

Аски мича нывъяслӧн лоас гала-концерт, а сідз кӧ, бара репетицияяс, майшасьӧм. Но а талунъя петкӧдчӧм бӧрын некод ёнасӧ оз нин пов.

Светлана Некрасова, Виктория Палкина, Дмитрий Ведерников. Юрган телеканал. Сыктывкар.

☼ ☼ ☼

Тайӧ вӧлі бӧръя репортаж. Коді эз вермы видзӧдны «Талун» программа, позяс вӧчны тайӧс юрган.рф сайтысь, либӧ ростелекомлӧн ай-пи телевиденньӧ отсӧгӧн. А та вылын ме тіянкӧд янсӧдча. Бура коллялӧй шойччан лунъяс!

Пасйӧд

Текстуйтӧма 2017-12-08. Кужса Сандра.