Коми календар. 2009 (2008ʼ вося небӧг)

Коми календар. 2009 / дасьтіс А. Н. Рассыхаев. Сыктывкар: ООО «Издательство «Кола», 2008. 384 лб.

Небӧг йылысь

Коми календар лӧсьӧдӧм мӧвпыс воис Ижкарын 2007-ӧд воын. Сэні вӧлі «Суоми-Россия» котырӧн дасьтӧм проектъяс гижны велӧдан сессия, кытчӧ чукӧртчылісны фин-йӧгра общественнӧй котыръясысь водзмӧстчысьяс. Велӧдчӧм бӧрас вӧлі лӧсьӧдӧма «Коми календар» удж. Йӧзӧдӧм вылӧ сьӧмсӧ вичмӧдіс «Суоми-Россия» котыр. Содтӧд тираж лэдзӧма Коми республикаса войтырсикас политика министерстволӧн сьӧм отсӧгӧн. «Коми календар. 2009 во» дасьтісны коми том войтырлӧн «МИ» котырӧ пырысьяс. Коми календар празьникъяс йылысь гижисны Кыв, литература да история институтса фольклор секторын уджалысьяс Людмила Лобанова (Л. Л.) да Ӧльӧш Рассыхаев (Ӧ. Р.). Важ коми ворсӧм да йӧктӧм подув вылын ӧнія кадся ворсӧмъяссӧ гижис Людмила Камбалова (Л. К.). Коми йӧзкостса паськӧм йылысь гижӧдсӧ дасьтіс Коми республикаса фин-йӧгра культура шӧринын уджалысь Наталья Чаланова (Н. Ч.), коми сёян дасьтанног йылысь – Юркарса коми культура шӧринӧн веськӧдлысь Валентина Самарина (В. С.) да сэні уджалысь Ольга Аверина (О. А.). Гижӧдъяссӧ редактируйтіс «Чушканзі» журналса шеф-редактор Григорий Хатанзейскӧй. Небӧгбанӧ серпассӧ лӧсьӧдіс Искусствояс колледжын велӧдчысь Роман Зварич. Гижӧдъяссӧ ӧти небӧгӧ пукталіс да тӧрӧдіс «Кола» небӧг лэдзан котырӧн веськӧдлысь Микулай Вахнин. (Водзкывйысь)

Пасйӧд

Текстыс сюрис небӧг лэдзысьяссянь.
Спеллералӧма 2013-11-30. Скӧрӧдумса Юля.