Просмотр исходного текста страницы Кыдзи ыдждӧдны куб кык пӧв

==Терминъяс==

 йӧрыш – объём
 вундӧг – отрезок
 куимпельӧса – треугольник
 визьньӧв – луч

==Важ легенда==

Тайӧ мог йывсьыс со кутшӧм легенда кольӧма. Чума дырйи Афинаын олысьяс юалӧмаӧсь Дельфойса оракуллысь, кыдзи мынны тайӧ приччасьыс. Ен тшӧктӧма налы алтарсӧ кык пӧв ыдждӧдны да вись (жертва) вайны. Алтарыс вӧлі куб кодь да, афинысаяс лӧсьӧдӧмаӧсь сэтшӧм жӧ куб да пуктӧмаӧсь алтар вылас. Сӧмын пӧрӧсыс эз быр. Сэсся найӧ Платон дорӧ шыӧдчӧмаӧсь. Сійӧ шуӧма, Ен пӧ скӧрмӧ тіян вылӧ геометрия тӧдтӧмлунсьыныд, колӧ пӧ вӧчны алтарсӧ куб мыгӧраӧн. Афинысаяс тайӧс вӧчӧмаӧсь да сӧмын сы бӧрын чумаыд бырӧма.

[[Файл:Platon.jpg|thumb|center|330px|]]

Збыльысь кӧ, тайӧ мог йывсьыс водзынджык тӧдлӧмаӧсь — сы йылысь Хиосса Гиппократ на мӧвпалӧма.

==Кыдзи нӧ позьӧ кубсӧ кык пӧв ыдждӧны?==

Кублӧн кӧ дорыс a кузьта, сылӧн йӧрышыс лоӧ ''a''<sup>3</sup>. Колӧ артмӧдны 2''a''<sup>3</sup> йӧрыша куб. Сылӧн дорыс ∛2''a'' ыджда. Сідзкӧ, сетӧма кӧ ''a'' кузьта вундӧг, колӧ артмӧдны ∛2''a'' кузьта вундӧг.

[[Файл:Cube and doubled cube.png|thumb|center|330px|]]

Позьӧ-ӧ татшӧм вундӧгсӧ циркульӧн да линейкаӧн артмӧдны? Вӧлӧмкӧ, оз. Тайӧс 1837-ӧд воын петкӧдлӧма Пьер Ванцель. (Ми гаравлім нин сылысь нимсӧ [[Пельӧс_трисектрисаяс_йылысь|пельӧс трисектриса йылысь]] гижигӧн.)

А со кутшӧм ногӧн вундӧгсӧ ∛2 пӧв ыдждӧдлӧма Исаак Ньютон. Мед сетӧма ''a'' кузьта вундӧг.

1. Линейка вылас ''G'', ''H'' чутъяс пасъям сідзи, медым ''GH'' = ''a''.

2. Артмӧдам ''a'' кузьта доръяса ''ABC'' куимпельӧса.

3. Нюжӧдам ''AB'' да ''BC'' вундӧгъяссӧ веськыд визьясӧдз.

4. ''AB'' веськыд визь вылӧ пуктам ''D'' чутсӧ сідз, медым ''B'' куйліс ''A'' да ''D'' костын, ''AB'' = ''BD''.

5. ''D'' да ''C'' чутъяс пыр веськыд визь нуӧдам.

6. Линейкасӧ пуктам сідз, медым сійӧ муніс ''A'' чут пыр, ''H'' чут куйліс ''BC'' визьньӧв вылын, а ''G'' куйліс ''A'' да ''H'' костын, ''DC'' визьньӧв вылын.

[[Файл:Doubling the cube.png|thumb|center|330px|]]

Вӧлӧмкӧ, ''AG'' = ∛2''a''.

===Подулалӧм===

Математика тӧдысьяслы индам, кыдзи тайӧс аддзыны. Шуам, ''a'' = 1. Мед ''AG'' = ''x'', ''HC'' = ''z''. Менелай теорема серти, 

 (''AG'' : ''GH'')∙(''HC'' : ''BC'')∙(''BD'' : ''DA'') = 1, 

кытысь артмас ''xz'' = 2. Сэсся ''ABH'' куимпельӧсалы косинусъяс йылысь теоремасӧ гижам. Артмӧдам: ''x''<sup>2</sup> + 2''x'' = ''z''<sup>2</sup> + ''z''. Сідзкӧ, ''z''<sup>4</sup> + ''z''<sup>3</sup> – 4''z'' – 4 = 0, кытысь ''z'' = –1 либӧ ''z'' = ∛4. Минуса лыд миянлы оз лӧсяв. Та вӧсна ''z'' = ∛4, ''x'' = ∛2.

==Пасйӧд==

==Содтӧд юӧр==
[https://lovziem.blogspot.com/2020/09/blog-post_22.html Велӧдӧм паськӧдан блогын.]

[[Category:Математика]]