Дёмин Владимир Николаевич

Дёмин Владимир Николаевич (комиӧн – Микол Володь; 1938–1999) – коми литература туялысь, критик, филология наукаясса доктор (1995), Россияса гижысь котырӧ пырысь (1997).

Олан туй

Владимир Дёмин чужис 1938 вося сора тӧлысь 28 лунӧ Сыктывкарын.

1955 воын помаліс 12-ӧд №-а сыктывкарса шӧр школа, 1960 воын — Коми канмуса педагогика институтысь история-филология факультет, кӧні босьтіс роч кыв, литература да история велӧдысьлысь специальносьт. Сэки жӧ (1960) кутіс велӧдны роч кыв да литература Усвавомса шӧр школаын.

1969 восянь уджаліс ассистентӧн Коми пединститутса литература кафедраын, 1971 восянь — СССР-са наукаяс академиялӧн Коми филиалысь кыв, литература да история институтын ичӧт наука сотрудник.

1986-сянь Велӧдысьяслысь тӧдӧмлун да сям кыпӧдан-сӧвмӧдан институтын веськӧдліс роч кыв да литература кафедраӧн. Перестройка кадö сiйö бöр воис велöдысьясöс сöвмöдан институтысь уджавны кыв, литература да история институтö, 1990 вося косму тӧлысь 16 лунсянь босьтчис веськöдлыны литература юкöнöн.

Кувсис 1999 вося сора тӧлысь 23 лунӧ Сыктывкарын операция дырйи, гуалӧма Шӧр шойна вылӧ.

Туялан удж

• 1978 воын йӧзӧдіс «Коми поэма» монография.
• 1979 воын дорйис филологияса кандидат ним вылӧ диссертация.
• 1995 вося вӧльгым тӧлысьӧ В.Н. Дёмин дорйис филологияса доктор ним вылӧ диссертациа, нимыс — «История и типология жанров коми поэзии XX века».
• 1997 восянь Россияса гижысь котырын.
• 1998 воын сылы сетӧма наука юкӧнын Коми Республикаса канму премиа.

Владимир Дёмин мукӧдыскӧд ӧтув гижис куим тома «Истории коми литературы» монография, 10-ӧд класслы коми литератураысь учебник. Гижис Палалей Кальӧ, Альберт Ванеев, Юрий Васютов, Серафим Попов, Геннадий Юшков да мукӧдлӧн гижан сям да творчество йылысь.

Небӧгъяс

• Дёмин В.Н. Коми поэма. — Сыктывкар, 1978.
• Дёмин В.Н. Знакомство с поэзией И.А. Куратова на уроках русской литературы. — Сыктывкар, 1988.
• Дёмин В.Н. На небе звезда: Введение в теорию и историю коми поэзии. — Сыктывкар: Коми кн. изд-во, 1995.
• Дёмин В.Н. История и типология жанров коми поэзии. — Сыктывкар, 1997.
• Дёмин В.Н. Рифмою крылатой свяжем мы строки... — Сыктывкар, 1999.

Наградаяс

• Наука юкӧнын Коми Республикаса канму премиа (1998)

Ӧшмӧсъяс

• Мартынов В.И. Литераторы земли Коми. - Библиографический словарь-справочник. - Сыктывкар: издательство "Эском", 2000. - 224 с.
• Дёмин Владимир Николаевич[1]