Коми юӧръяс. 2017-10-06

Коми гор ГТРК-лӧн выльторъяс: 2017ʼ йирым 6ʼ лунся «Коми юӧръяс» уджтас.

Текст

«Россия» телеканалын регионса юӧръясӧн «Вести-Коми». Студияын Татьяна Кинева. Видза оланныд.

☼ ☼ ☼

Позьӧ-ӧ овны татшӧм керкаын? Октябр шӧртуй дінын стрӧйба туяліс «Ставроссияса народнӧй фронт».

Тонна джын груша бульдозер улӧ. Комиӧ гусьӧн вайӧма Польшаса фрукты.

Сыктывкарын «Северная Олимпия» спортивнӧй школаын пансис хоккей кузя турнир. Вермысьӧс бӧръясны медуна очко серти.

☼ ☼ ☼

Потласьӧны трубаяс, киссьӧ стен да йирк, жугласьӧны посъяс, татшӧм оласногыс ӧні сыктывкарса Октябр шӧртуй дін уна патераа 61ʼ керкаын. Водзті сійӧ вӧлі общежитиеӧн. Керкаӧс пыртісны капитальнӧя дзоньталан планӧ. Сентябрын кӧсйисны босьтчыны уджъясӧ, но нинӧм эз ло вӧчӧма. Мытшӧдсӧ босьтчисны венны «Ставроссияса народнӧй фронтысь» экспертъяс. Пасйӧдъясӧн Василий Канев.

Ӧні керкаын олысьяс оз тӧдны, мыйысь ёнджыка повны: быд здукӧ вермасны потны трубаяс, пӧрас стен, вермасны ӧзйыны би проводъяс. Асланыс мытшӧдъяс йылысь олысьяс юӧртӧны общественникъяслы. Ӧд унджык семьяын олӧны ичӧт челядь.

[10]

Стенмыс потӧма мӧд подъездын. Потасыс тыдалӧ и ывласянь, и пытшкӧссяньыс. Талун кежлӧ некутшӧм торъя туялӧмъяс тані эз вӧвны. Аварияяс тані овлӧны тшӧкыда. Неважӧн стрӧйбаын медся вылыс судтаын омӧль проводка вӧсна ӧзйылӧма. А медводдза этажын ӧти нывбаба вӧйис джодж улӧ.

[18]

Вӧвлӧм общежитие ӧні шусьӧ на патераа керкаӧн, но нинӧм тані эз вежсьы. Общӧй кухня да туалет. Джын оланінсӧ асэмбуралӧма. Мӧд джынйыс муниципалитетлӧн. Ӧткымынлаын калидоръяс дзик киссянвыйын. Дзоньтасьӧмъяс весьшӧрӧ – шуӧны олысьяс. Быд пӧрйӧ васӧд стенъясысь киссьӧ ва. Галина Микушева гижис эз ӧти нин шыӧдчӧм веськӧдлан компаниялы да карса администрациялы. Бӧръя вочакыв воис ведомствояскостса комиссиясянь. Сэні гижӧма, мый коммунальщикъяс водзын пуктӧма мог бырӧдны тырмытӧмторъяс. Талун кежлӧ нинӧм эз вежсьы.

[20]

Дзоньтасьӧмъяс урчитісны сентябр 13ʼ лун кежлӧ, но нинӧм некод эз вӧч. «Народнӧй фронтса» экспертъяс видзӧдісны керкасӧ да помшуисны: стрӧйбаысь колӧ вежны став коммуникация.

[17]

Общественникъяс тӧдчӧдісны, мый керкаӧн могмӧдысь службаяс оз кутны йитӧдъяс. Та вӧсна нинӧм оз вежсьы. Матысса кадӧ «Народнӧй фронтлӧн» республикаса юкӧнын чукӧртасны став служба петкӧдлысьяс.

Василий Канев, Валентина Смирнова, Владимир Шишкунас. Вести-Коми.

☼ ☼ ☼

Сыктывкарса администрацияӧн веськӧдлысьяс да депутатъяс донъялісны карын оласног мичмӧдан уджтас серти туйяс дзоньталӧм. Таво гожӧм вӧлі пыртӧма планӧ ветымын керка йӧр, паркъяс да подӧн ветлысьяслы туйяс. Мый лои вӧчӧма. Карса олысьяс вермасны ӧні нин сетны шыӧдчӧмъяс.

Гӧрд Затон посёлокса олысьяслӧн ӧні эм выль асфальт. Подӧн ветлысьяслы выльмӧдісны витсё метра туй. Кыдзи висьталӧ посёлокса олысь Ольга Русанова, водзті тані вӧлі сибдана няйт.

[18]

Мичмӧдан планӧ колян во пыртісны ветымын кык йӧр, нӧшта юркарса кык парк, тротуаръяс да подӧн ветлысьяслы туйяс. Пӧкрӧв бульварын пансисны уджъяс август помын. Тані шуисны тэчны плиткаясӧн став эрдсӧ. Водзын тайӧс вӧлі вӧчӧма джынвыйӧ. Садитісны тані кустарникъяс да пуяс.

[34]

Юркарын, Эжва районын, бурмӧдісны Слава улич – тані тшӧтш выль асфальт.

[14]

Ставнас Эжваын дзоньталісны кызь кык керка йӧр. Кыдзи шуӧ карса сӧветӧ пырысь Алексей Панюков, таво вичмӧдісны колана мында сьӧм: 177 миллион шайт. Лои вӧчӧма унатор.

[20]

Карӧс мичмӧдан проект лоӧ пӧртӧма некымын во. Йӧзсянь виччысьӧны шыӧдчӧмъяс октябр 24ʼ лунӧдз, медым пыртны локтан вося уджтасӧ.

Татьяна Кинева, Наталья Баянушкина, Андрей Иванов. Вести-Коми.

☼ ☼ ☼

Россельхознадзорлӧн республикаса управленньӧын уджалысьяс талун бырӧдісны Польшаысь гусьӧн вайӧм грушаяс. Тонна джын фрукты найӧ аддзисны чукӧрӧн вузасян базаын. Висьалӧ Ольга Колегова.

Россельхознадзорлӧн республикаса управленньӧын уджалысьяс ректӧны автоприцеп. Ящикъясын грушаяс, 508 килограмм. Тубрасын пасйӧд серти фрукты быдтӧма Польшаын. Санкция вӧлӧга аддзисны ӧткӧн-чукӧрӧн вузалан базаын. Наӧн вузасисны ас вылӧ куим уджалысь. Дӧзьӧритысьяслӧн кывъяс серти тайӧ предпринимательясӧс кутлісны нин позьтӧг вӧлӧга иналӧмысь.

[25]

Гусьӧн вайӧм туйыс бура тӧдса: санкция вӧлӧга нуӧны Белоруссия да Казахстан пыр. Таво туялісны нёль сайӧ тонна вузӧс. Тайӧ матӧ кык пӧв унджык колян во дорысь. Комиын Россельхознадзорлӧн управленньӧын уджалысьяслӧн кывъяс серти таво ёнмӧдісны контроль. Мырддьӧм фрукты да град выв пуктас нуисны лӧп шыблаланінӧ да талялісны бульдозерӧн. Республикаын олысьяс ӧнӧдз на юасьӧны дӧзьӧритысьяслысь, мыйла оз сетны конфискуйтӧм тӧвар, шуам, челядь сад либӧ судзсьытӧма олысьяслы.

[33]

Вӧлӧга талялӧмысь колӧ мынтысьны. Федеральнӧй бюджетысь вичмӧдӧны сьӧм, медым торйӧдлісны ин лӧп шыблаланінын да кӧртымалісны бульдозер. Но регыд вермасны лоны вежсьӧмъяс. Оланпас серти таысь кутасны вештысьны найӧ, кодъяс вайисны Россияӧ санкция вӧлӧга.

Ольга Колегова, Юрий Никифоров. Вести-Коми.

☼ ☼ ☼

Вежалунӧ 8 час 45 минутын «Россия» телеканалын лоӧ «Вести-Коми» «События недели» уджтас. Петкӧдчӧм нуӧдӧ Георгий Денисов. Тӧдчана темаяс лыдын:

[22]

Сиктса челядьӧс тшӧтш колӧ бура велӧдны. Россияса Госдумаысь депутат Ольга Савостьянова регионӧ волігӧн туяліс школаясын мытшӧдъяс.

[9]

Выставкаяслӧн тӧдчанлун. Республикаса национальнӧй музейын виччысьӧны гӧсьтъясӧс да дасьтысьӧны пасйыны чужан лун.

[7]

Велӧдны да дорйыны. Россияса гражданскӧй обороналы тырис 85 во. Водзӧ вылӧ могъяс.

☼ ☼ ☼

Сыктывкарын «Северная Олимпия» спортивнӧй школаын нуӧдӧны шайбаа хоккейысь республикаса турнир. Кыдзи талун муніс ворсӧм Ухтаса «Легион» да Усинскысь «Импульс» командаяс костын, висьталӧ Сергей Туркин.

Усинскса воротаӧ «Легионлӧн» ворсысьяс сюйӧны гол матч заводитӧмсянь некымын здук мысти. Водзӧ ворсан ногыс эз вежсьы. «Импульс» куим матч бӧрын турнирнӧй таблицаын медбӧръя местаын. Быд паныдасьлӧмын найӧ ворссьӧны паныд сувтысьяслы ыджыд тшӧтӧн. Но та вылӧ видзӧдтӧг «Легионлӧн» тренеръяс ӧтарӧ ышӧдӧны асланыс быдтасъясӧс.

[9]

Ухтаса спортсменъяс сюся дӧзьӧритӧны ворсӧм. «Легионса» тренер пасйӧ, сылӧн хоккеистъяслӧн вӧлі уна позянлун, но ставыс артмис весьшӧрӧ. Сӧмын тайӧ тырмытӧмтор да Усинскса голкиперлӧн збоя ворсӧм вӧсна тшӧтыс эз ло вывті нин торъяланаӧн.

[14]

Йи вылӧ петігӧн кытчӧкӧ быттьӧ вошӧны вермыны кӧсйӧм да кыпыд лов ру. Со воча уськӧдчӧ Ухтаса форвард Максим Енишевскӧй. Но талун сылы эз мойви лоны аслас котырын медбур бомбардирӧн.

[19]

Матч помасис 12:2 тшӧтӧн. Ордйысьӧмъяс мунӧны кытш система серти. Вермысьӧн лоас медуна очко шедӧдысь. Ворсны кутасны и аски. Очкояслӧн лыдыс кӧ лоас ӧткодь, командаяс нуӧдасны нӧшта ӧти паныдасьлӧм.

Сергей Туркин, Александр Зимовкин, Андрей Иванов. Вести-Коми.

☼ ☼ ☼

Талун 19 час рытын Сыктывкарын ворсасны «Новая Генерация» да Норильскса «Никель» командаяс. Суперлига клубъяс костын Россияса чемпионаткӧд йитӧдын мини-футболысь ворсан котыръяслӧн лоас мӧд матч. Лунӧн водзджык футболистъяс петкӧдлісны яръюгыд ворсӧм. Лои сетӧма сизим виж карточка, матч вылысь ӧтдортісны Норильскса кык ворсысьӧс. Но гӧсьтъяс вермисны паныд сувтны «Генерация» вын нырччӧмлы. Ворсӧм помасис 2:2 тшӧтӧн. Голъяс сюйисны Иван Обжорин да Владислав Барсков. Талунъя ворсӧмын кыкнан командаыс кӧсйӧны вермӧны.

Кыдзи шуӧны синоптикъяс, тайӧ шойччан лунъясӧ лоӧ тӧла да зэръяса поводдя. Шондіа антициклонӧс вежис зэра циклон. Республика весьтті сійӧ вешъяс рытыввыв-лунвывсянь Карскӧй саридз дорӧ. Быдлаын зэрас. Торйӧн ёна аски. Войвыв кытш сайын зэрас вежалунӧ.

[15]

☼ ☼ ☼

Содтӧд юӧръяс лоасны 20 час 45 минутын. А ӧні миян уджтас бӧрын петас Мӧскуа.

Пасйӧд

13:36 − 5:04 (роч) − ~0:32 (заставка) = 8 минут комиӧн.