Лева Анна

Лева Анна, сійӧ жӧ Заболоцкая Анна Андреевна (нывдырйи Морозова; 1901–1963) — коми функционер да комиӧдчысь. Чужлӧма Сыктыв вожса Межадорын, Кычаншор грездын.

1914–1918ʼ воясӧ велӧдчӧма Ношульса высшӧй начальнӧй училищеын, сэсся пырӧма Сыктывдінкарса учительскӧй семинарияӧ (куим вося педагогическӧй курсъяс). Но велӧдчӧма сӧмын кык во: вуджӧдӧмаӧсь обласьтувсаса совпартшколаӧ коймӧд во вылас.

Лева Анна уджавлӧма карувса литература лэдзан юкӧдулын да (1921ʼ августсяньыс) Коми нига лэдзанінын. 1922–1924ʼ вояс кежлӧ вуджлӧма облвоенкоматӧ, но сэсся бӧр локтӧ нига лэдзанінӧ. Тані 1924–1929ʼ воясын сійӧ вӧлӧма корректорӧн, редакторлы отсасьысьӧн, кывкутысь редакторӧн. Ӧттшӧтш велӧдчӧма журналистӧ Ставсоюзса коммунистическӧй институтын. Студенталігас велӧдӧма коми кыв да литература тайӧ жӧ институтас да Станиславскӧй нима театральнӧй институтын (ГИТИС). Институт помалӧм бӧрас куим во уджалӧма ВКП(б) ЦК-лӧн Партиздатын Коми секцияса редакторӧн.

Секция тупкӧм бӧрын вуджӧма бӧр Сыктывкарӧ, 1934ʼ восянь «Вӧрлэдзысь» газет редакцияын партотделӧн веськӧдлысь, редакторӧс вежысь. 1935ʼ ноябрсянь 1936ʼ августӧдз завалӧ Коми госиздатын. Сы бӧрын век кежлӧ мунӧ Мӧскуаӧ.

1937ʼ августсянь А. Заболоцкая веськӧдлӧ «Лесная промышленность» газетын партотделӧн, кык во мысти тайӧ жӧ газетас — кывкутысь редакторӧс вежысь, сэсся «Лесная промышленность» журналлӧн редакцияӧн веськӧдлысь, сылысь уджсӧ ладмӧдысь-нуӧдысь. Бӧрынджык, тшук кувтӧдзыс, кызь кык во чӧж — СССР-са Минлеспромлӧн научно-техническӧй библиотекаса директор.

Комиӧдӧм небӧгъяс

• Ленин да нывбабаясӧс мездӧм / Ярославскӧй Е. Сыктывдінкар, 1926.
• Сӧветскӧй чӧрт : комедия / Юрьин Юр. Сыктывдінкар, 1927. (комиӧдісны Изъюров И., Морозов А., Заболоцкая А. )
• Кыдзи нюр пӧртны бур видзӧ / Гетманов Я. Я. Сыктывдінкар, 1927.
• Бурмӧдӧй видзьястӧ / Зубрилин А. А. Сыктывдінкар, 1927.
• Олӧмсям сайын дзоньвидзалун / Булышов В. П. Сыктывдінкар, 1928. (комиӧдісны Минин М. П., Заболоцкая А. А., Морозов А. В.)
• Кыдзи крестьянкалы кокньӧдны ассьыс олӧм : колхозын нывбабалӧн удж / Кравченко Е. Сыктывкар, 1930.

Содтӧд юӧр

• Беляев Г. В. «Гӧрлін» тэ ӧд быдлаын : лит. ист. гижӧд (Ӧньӧ Агни, Анна Чеусова, Мария Йоль да Лева Анна йылысь) // Войвыв кодзув. 2005. №6. Лб. 56-70.