Талун. 2017-11-20

Юрган телеканаллӧн выльторъяс: 2017ʼ вӧльгым 20ʼ лунся «Талун» уджтас.

Текст

Бур асыв! Тіянкӧд «Талун» программа. Студияын Константин Куратов.

Изшом перйӧмын дӧзьӧр

Вӧркутаын котыртасны районъяскостса прокуратура, коді кутас дӧзьӧритны изшом перъян юкӧнын оланпасъясысь кывзысьӧм. Выль торъя дӧзьӧритысь орган лӧсьӧдӧм йылысь тшӧктӧм кырымаліс Россияса генеральнӧй прокурор Юрий Чайка. Официальнӧй пресс-релизын пасйӧма, мый тайӧс вӧчӧны, медым бурмӧдны индӧм нырвизьын удж. Республикаса прокурорлы тшӧктӧма котыртны татшӧм прокуратура, могмӧдны удж вылӧ став коланаторйӧн, юкны кывкутӧм да вынсьӧдны овмӧсъяслысь чукӧр, мый кутас дӧзьӧритны выль юкӧн. Уджавны сэні кутасны республикаса прокуратураын ӧнія зільысьясысь бӧрйӧм йӧз.

Ӧтвылысь — аскиалун вӧсна

Ухтаын чукӧртчылісны социальнӧй предпринимательствоӧ пырӧдчысьяс. Конференция котыртлісны республикаса правительствоӧ да регионса социальнӧй программаяс фондлӧн ёртасьӧм подулын. Ӧтув уджалӧм йылысь сёрнитчӧм кырымавлісны августын Сергей Гапликов да фондлӧн сӧветӧн веськӧдлысь Вагит Алекперов. Да со медводдза кывкӧртӧд: нёль регионысь сё сайӧ ас вылӧ уджалысь локтісны Ухтаӧ.

Дзоньвидзалун крепмӧдӧ, вояс видзӧ. Иван-тшай йылысь Комиын олысьяс ӧні уна нин тӧдӧны. Ӧд вӧчӧны тайӧ юанторсӧ Кӧрткерӧс да Изьва районъясын. Ас вылӧ уджалысь медводдза чайсӧ видліс вӧчны гортас. А ӧні цехын уджалӧ дас морт. Продукциясӧ иналӧны интернет пыр.

Михаил Канев, предприниматель, Ижма:

— Мӧвпалам нуны тшайсӧ Европаӧ, Китайӧ. Но колӧ республика пасьтала восьтавны цехъяс, медым уджалысьясӧс унджык босьтны.

Печӧраысь Елена Редькина вайис ассьыс аканьясӧс. Пенсия вылӧ петӧм бӧрас мӧвпалӧ босьтчыны тайӧ бизнесӧ.

Елена Редькина, мастер, Печӧра:

— Ме вои татчӧ, медым гораа юӧртны ас йылысь, медым ухтасаяс тӧдмалісны ме йылысь. Кывза мукӧдӧс, кыдзи найӧ сувтісны кок вылӧ да сӧвмӧдӧны бизнес. Гашкӧ, и ачым сэсся грантла шыӧдча.

Форумӧ пырӧдчысьяс нуӧдісны мастер-классъяс. Специалистъяс юксисны бизнес нуӧдан гусяторъясӧн.

Николай Цхадая, УГТУ-лӧн ректор:

— Ухтаын тыр ӧдӧн сӧвмӧны социальнӧй проектъяс. Миян кар талун абу прӧста промышленнӧй шӧрин, но и бизнес сӧвмӧдан юкӧн.

Россияын талун сё кызь сюрс сайӧ социальнӧй предприниматель. «Медӧдйӧ найӧ паськӧдчӧны-сӧвмӧны регионъясын, кӧні отсӧгыс воӧ веськӧдлысьяссянь», — пасйӧны экспертъяс.

Юлия Жигулина, «Наше будущее» социальнӧй уджтасъяс фондын исполнительнӧй веськӧдлысь:

— Социальнӧй предпринимательство отсалӧ сӧвмӧдны регионса экономика. Ӧд тайӧ уджалан местаяс. Выль бизнес — выль туйвизь. А тіян тані сы мында киподтуя йӧз.

Гӧгрӧс пызан сайын видлалісны социальнӧй отсӧг сетан юкӧнӧ бизнес лэдзӧм. Ӧні страна пасьтала мунӧны сёрнияс, медым унджык могъяс сетны асшӧр киясӧ.

Наталья Михальченкова, правительствоӧн веськӧдлысьӧс вежысь – велӧдӧм да наука министр:

— Быд юкӧн, коді йитчӧма бюджет сьӧм дорӧ кыскӧмкӧд, колӧ видлавны пыдіа, медым не торкавны оланпас. Та вӧсна юалӧмсӧ колӧ видлавны ӧтув.

Бизнесыс, дерт, абу сьӧма, но окотитысьыс босьтчыны уджӧ — уна. Эм сэтшӧм водзмӧстчысь йӧз, кодъяс кӧсйӧны венны выль сьӧкыд туй.

Анастасия Михайлова, Таисия Жакова, Олег Костромин, «Юрган» телеканал, Ухта.

Санавиациялы отсӧг

Республикаӧ вайисны выль МИ-8. Сыӧн кутасны вӧдитчыны Ухтаын санавиациялы отсӧг котыртӧм могысь. Медводз вертолёт кутас сулавны карса аэропортын. Машина «Комиавиатранс» флотлӧн кывкутӧм да дӧзьӧр улын. БНК агентство серти, лётчикъяс да техника видзӧдысь котыр видлалісны нин техника медводз Казаньын, а сэсся лэбисны сійӧн Сыктывкарӧдз. Ортсысянь санитарнӧй винта машина торъялӧ сӧмын еджыд рӧмӧн, а со пытшкӧсыс мукӧд дорысь ёна озырджык. Ладмӧдӧма спутник пыр уджалысь навигационнӧй система, му дорӧ матысмӧм йылысь юӧртысь система да мукӧд цифрӧвӧй оборудованньӧ. Эм сы пытшкын и медицина юкӧн. Госконтракт серти Комиӧ ваясны нӧшта ӧтик татшӧм вертолёт. Катастрофаяс медицинаын зільысьяс на отсӧгӧн вермасны регыдъя кадӧн воӧдчыны быд ылі инӧдз, кӧні ковмас отсӧг, весиг орчча регионъясӧ.

Туйвывса серпас

Следственнӧй комитет видлалӧ Ухта районын артмӧм туйвывса неминуча. Сэні зурасисны Нива да газель. Субӧта рытӧ Ухта да Дальнӧй посёлок костын внедорожниклӧн квайтымын квайт арӧса водитель петіс паныда полоса вылӧ да воча зурасис микроавтобускӧд. Ачыс да квайтымын нёль арӧса пассажирыс доймаліны. Бурдӧдысьяслӧн отсӧг ковмис и газельын вит мунысьлы. На лыдын куим тыр арлыдтӧма. Но больничаӧ водтӧдны некодӧс эз ковмы. Неминуча местаӧ ачыс воліс Ухтаын следственнӧй юкӧнӧн веськӧдлысь. ГИБДД-кӧд ӧттшӧтш найӧ корсьӧны лоӧмторлысь помка. Ӧні тӧдса, мый авария здук кежлӧ туй вӧлі лымъя да абу койӧма лыаӧн.

Вичко мичмӧдӧм

Грецияса важ серъясӧн мичаммис Эжваса вичко. Из стрӧйбалысь сводъяс серпасалӧны Мӧскуа бердса мастеръяс. Унджык уджыс эштіс нин. Киподтуя йӧз тані зільӧны матӧ во нин. Кыдзи вежсис вичко пытшкын — юӧртӧ менам уджъёрт.

Во сайын на Вежа Богородича храмлӧн стенъяс вӧліны еджыд краскаӧн мавтӧмаӧсь. Талун быд бокын вежаяслӧн ӧбразъяс, Библияысь серпасъяс. Тайӧ ставыс мӧскуаса мастеръяслӧн удж.

Олег Осетров, образъяс серпасалысь:

— Уна сюжет сиӧма Ен Мамлы, ӧд крамыс сылӧн нима. Сідзжӧ уна серпасалӧм вежаяслысь чужӧмъяс. Вӧдитчӧны мастеръяс силикатнӧй краскаӧн. Сійӧ оз мын ваӧн. А серпасъяссӧ думыштіс вежа ай Владимир. Мӧвпъясыс воӧмаӧсь крамъясад ветлігӧн. А вӧлӧма вежа морт Египет, Грецияса вичкоясӧ.

Владимир (Дунайчик), Свято-Преображенскӧй приходын настоятель:

— [21]

Пуысь вичко кыпӧдлісны кызь вит во сайын, а изйысь вежа керка лэптісны став олысь отсӧгӧн. Дерт, эз кольны бокын и спонсоръяс. Ӧні кевмысьны волысьыс тані вывті уна. Ставныс донъялӧны вичколысь вежсьӧмсӧ.

Елена Чавыкина, Свято-Преображенскӧй приходын библиотекар:

— Миян крам лоис мичаджыкӧн. Быд образ — тайӧ выль олӧмӧ воськов петкӧдлӧ. Ми видзӧдам на вылӧ, а вежаяс видзӧдӧны миян вылӧ. Тайӧ миръяс костын йитӧд. Та вӧсна, кымын унджык ӧбраз, сымын нимкодьджык да кокниджык.

Ӧні серпасалӧма сӧмын некымын стен. Эскысьяс мӧвпалӧны ӧтвыв помавны став уджъяс.

Мария Уляшова, Любовь Филиппова, Олег Костромин, «Юрган» телеканал, Эжва район.

Петантуй

Вӧркута во помӧдз ньӧбас лым весалан техника чинтыштӧм донъясысь да разяс татшӧм ногӧн турӧбъяс бӧрын кар лымйысь весалӧм кузя мытшӧд. «Та йылысь сёрнитчисны «ГазпромТрансгазУхта» овмӧскӧд», — юӧртіс войвыв кытшсайса карӧн веськӧдлысь Игорь Гурьев.

«Комсомольская правда» мэр вылӧ ыстысьӧмӧн гижӧ: «Биару перйысьяс пӧ сетасны дас куим машина. Тайӧ грейдеръяс да К-700 трактор, кодӧн вӧдитчывлісны нин асьныс биару перйысьяс, но ставыс бура на уджалӧ. Татшӧм ногӧн муниципалитетъяслӧн веськӧдлысьяс мӧвпалӧны бырӧдны техника кузя мытшӧдъяс матысса во-мӧд кежлӧ, ӧд выль лым весалан машинаяс ньӧбны карса бюджетлӧн кудйын оз на тырмы сьӧм». Пасъям, татшӧм петантуй ошкис нин и юралысь. Тӧв кежлӧ дасьтысьӧм серти селектор дырйи Сергей Гапликов корис став муниципалитетӧн веськӧдлысьяслы видзӧдлыны техника, мый ковтӧг сулалӧ быдсяма овмӧсъяслӧн. Ньӧбны пӧ сійӧс позьӧ выльяс дорысь мукӧддырйи ӧкмысдас процент вылӧ донтӧмджыкысь.

#СТОПВИЧСПИД

ВИЧ-диссидентъяс — тайӧ йӧз, кодъяс оз эскыны, мый ВИЧ-инфекция збыль эм. Татшӧмъяс лыдын эмӧсь и дзоньвидза йӧз, и ВИЧ-инфекцияӧн нёрпалысьяс. Найӧ ыкшаасьӧны сыӧн, мый уна во олӧны тайӧ диагноз вылӧ видзӧдтӧг да зэв бура асьнысӧ кылӧны. Мыйӧдз тайӧ вермас вайӧдны — юӧртӧ Анастасия Тюрнина.

Иммунодефицитлӧн вирус — тайӧ вуджана висьӧм, паськалӧ сійӧ ньӧжйӧ, но виӧ мортлысь дзоньвидзалун доръян клеткаяс. Тышкасьны висьӧмкӧд оз кут артмыны, та вӧсна ВИЧ пыр вайӧдӧ уна нёрпалӧмӧдз: прӧстудасянь гепатитӧдз. Лыддьӧны, мый ВИЧ кӧвъялӧмсянь СПИД тшупӧдӧдз вермас кольны дас во.

Сергей Попов, СПИД шӧринын главнӧй врачӧс вежысь:

— ВИЧ некыдзи оз петкӧдчы. Сӧмын кор нин дыр мортыс нёрпалӧ, и сэки оз нин век позь сылы отсавны. ВИЧ тшупӧд аддзӧны, кор висьысь шыӧдчӧ медицина отсӧгла, кор эмӧсь нин дзоньвидзалунын вежсьӧмъяс. А тупкыны диагноз вылӧ син — отсавны аслыд кувны.

СПИД висьӧдӧ зэв сьӧкыда и венӧ сійӧ найӧс, коді оз примит антиретровируснӧй терапия. СПИД-а йӧзлӧн векджык абу иммунитет, и найӧ кӧвъялӧны торъя висьӧмъяс. Шуам, туберкулёз да саркома. На вӧсна и кувсьӧны. Мед тайӧ эз ло, медводз колӧ шыӧдчыны специалист дорӧ, коді индас торъя терапия. Аслыспӧлӧс бурдӧдчӧмыс оз лэдз вируслы паськавны водзӧ.

Анастасия Тюрнина, Павел Люлянмин, «Юрган» телеканал.

☼ ☼ ☼

Реклама бӧрын петкӧдлам «Универвиденньӧ» дырйи том йӧзлысь сьылӧм да боксысь Россияса кубоклысь тышъяс. Кольччӧй миянкӧд.

Гражданскӧй форум

Сыктывкарын помасис ӧкмысӧд гражданскӧй форум. Таво ыджыд чукӧртчылӧм сиисны йӧзлӧн сӧветъяслы. Талун Комиын уджалӧ республика да федеральнӧй службаяс да министерствояс бердын олысьяслӧн дас кӧкъямыс ӧтувтчӧм, нӧшта и кар-районъясӧн веськӧдлысьяс бердын кызь кык. А ӧд нёль во сайын на вӧліс сӧмын некымын чукӧр. Ӧні веськӧдлысьяс оз сӧмын кывзысьны водзмӧстчысьяслысь мӧвп да видзӧдласъяс, но и ассьыныс удж найӧ тшӧкыда котыртӧны йӧзлӧн шуӧмъяс подулын. Алёна Терентьева стӧчмӧдӧ.

— [15]

Тайӧ форумлысь уджаланногсӧ вежыштісны. Восьтісны пленарнӧй секцияӧн, кӧні быдӧн вермис юксьыны аслас мӧвпъясӧн, видзӧдласъясӧн: мый татшӧмыс общественнӧй сӧвет да кутшӧм сы водзын сулалӧ мог.

Валерий Фадеев, Россияса Общественнӧй палатаын секретар:

— [27]

Комиын сӧветъяс бура сӧвмӧдӧны. Со на лыдын Максаковкаысь котыр. Уджалӧ сӧмын во. Ӧтувтчисны дас морт, а сы мында тор нин удитісны вӧчны.

Светлана Шарканайте, Вылыс Максаковка посёлокын Общественнӧй сӧветӧ пырысь:

— Миян вӧлі мытшӧд: олім педиатртӧг. Больнича уджаліс эз тыр-бура. Ӧні со и врачыс эм, и больничаын ставыс ладмӧдӧма. Юралысь сетіс индӧд, медым профилакторийлысь стрӧйба сетісны больнича улӧ.

Общественнӧй сӧветъяслӧн могыс: лоны отсӧгӧн чинаяслы, медым найӧ ӧдйӧджык кылісны олысьяслысь мытшӧдъяс.

Сергей Точенов, Россияса Общественнӧй палатаын секретарӧс вежысь:

— Колян вежонӧ нуӧдім семинар, код вылын сёрнитім сӧветъяс йылысь, кодъяс дзикӧдз оз уджавны. Найӧс колӧ киритны. Со «Росавиация»,  «ВИМ-Авиа» котыръяс. Мыйла найӧс некод эз дорйы? Сы мында йӧз майшасьӧны, а дорйыныс некодлы. Оз ков вунӧдчыны, мый ми йӧз ради и уджалам.

Вӧркутаса вӧвлӧм мэр Игорь Шпектор вайӧдіс пример пыдди Байкал кытш. Сэні общественникъяс да чинаяс дзик абу уджалӧмаӧсь ӧтув.

Игорь Шпектор, Россияса Общественнӧй палатаын ЖКХ юкӧнӧн веськӧдлысь:

— Вӧлі веськӧдлысь, коді кутіс киас ставныссӧ. Некод эз вермы шуны нинӧм сылы паныд. Ставсӧ вӧчисны, мый вӧлі индӧма. А ӧні сэні выль губернатор. Дзик мӧд нога уджыс мунӧ.

Общественнӧй сӧветъяслӧн эм уна позянлун отсавны йӧзлы, колӧ сӧмын окотитны тайӧс вӧчны да кужӧмӧн вӧдитчыны оланпасъясӧн. Тайӧ юралысьсянь вӧзйӧм.

Сергей Гапликов, Коми республикаса юралысь.

— [40]

Форумын вӧчисны кывкӧртӧд: колӧ вынсьӧдны общественнӧй сӧветъяс кузя торъя оланпас, медым котыръяс дорӧ вӧлі ӧткодь корӧмъясыс уджаланног серти. Ӧні ставныслӧн та вылӧ аслас видзӧдлас.

Алёна Терентьева, Таисия Жакова, Павел Фетисов, «Юрган» телеканал, Сыктывкар.

Универвиденньӧ — 2017

«Универвиденьӧӧ» пырӧдчысьяслӧн лыд таво тӧдчымӧн содіс. Студентъяс костын гырысь конкурс вылӧ локтісны Россияса кӧкъямыс федеральнӧй кытшысь да кызь сизим вузысь сьылысьяс. Кык тур нин колис бӧрын. Квайтымын кык мортысь сӧмын дас куимыс петісны финалӧ. Жюриын Россияса шоу-бизнесысь нималана йӧз, на лыдын, шуам, Владимир Коробка, «Новая фабрика звёзд» уджтасын велӧдысь. Быд сьылысь петкӧдчӧ аслас стильын: эстрадасянь академическӧй вокалӧдз. Вермысьлысь нимсӧ тӧдмалам тарыт нин. Том артистъяскӧд аддзысьліс Татьяна Супрядкина.

— [7]

Тайӧ котыр конкурс вылӧ воис мӧдысь нин. Кык во сайын петлісны финалӧ. И ӧні виччысьӧны вермӧм.

Чингизхан Измайлов, Юграса государственнӧй университетысь студент:

— Ме велӧдча лингвистика факультетын. Некор эг сьывлы водзті. А инстаграмысь аддзӧмаӧсь менсьым петкӧдчӧм и корисны конкурс вылӧ.

Мадина Аулеханова, «Voice» котырӧн веськӧдлысь, Ханты-Мансийск:

— Том йӧз велӧдчӧны торъя факультетъяс вылын. Некод абу музыкант, но ӧтувтім найӧс и эм мыйӧн чуймӧдны ӧні.

Жюриыс колиc важся. Россияса композиторъяс, музыкантъяс, педагогъяс ӧтув конкурсантъяскӧд нуӧдасны мастер-классъяс, репетицияяс.

Дарья Карнаух, вокал кузя педагог.

— [23]

Жюри бӧръяс дас медбур сьылысьӧс, сэсся полуфинал. Медшӧр тыш лоас гала-концерт дырйи.

Алексей Полубояров, «Универвиденньӧ» проектлӧн медшӧр режиссёр.

— [19]

Сизим во чӧжӧн конкурс ёна сӧвмис. Сыктывкарсаысь сійӧ вуджис ставроссияса тшупӧдӧ. И ӧні видлалӧны юалӧм сійӧс вуджӧдӧм йылысь Россияса шӧр регионъясӧ. Но век жӧ «Универвиденньӧлы» подув пуктысьяс шуӧны: «Конкурслӧн аслыссикаслуныс буретш сыын, мый мунӧ сійӧ войвывса ылі да мича пельӧсын».

Татьяна Супрядкина, Ольга Коняева, Алексей Паршуков, «Юрган» телеканал, Сыктывкар.

Юнармиялӧн слёт

Емдін районса Зӧвсьӧрт посёлокын Призывник лунӧ чукӧртчылісны Юнармияӧ пырысьяс. Зӧвсьӧрт, Микунь да Айкатылаысь. Слёт котыртны вӧзйис Айму вӧсна ыджыд тышса ветеран Николай Акимович Рочев. Мӧвпсӧ ошкисны локальнӧй тышъясса ветеранъяс, военно-морскӧй флотса, ВДВ да пограничнӧй войскаяслӧн офицеръяс. Найӧ котыртлісны мастер-классъяс, петкӧдлісны тышкасян приёмъяс, велӧдісны чукӧртны оружйӧ, казьтылісны тышъяс. Медбӧрын юнармеечьяс да ветеранъяс ӧтвылысь мунісны мытшӧда визь пыр: разисны да чукӧртісны автомат, шыблалісны гранатаяс, казьтылісны армия йылысь шусьӧгъяс. Медбура петкӧдчис Микуньса медводдза школалӧн юнармеечьяслӧн ӧтрад.

Збой нывъяс

Аньяс костын боксысь Россияса кубоклӧн медбӧръя тышын Сыктывкарысь Виктория Крылова чегис кисӧ. Та дырйи сійӧ лоис мӧдӧн. Ӧні операция вӧчӧм бӧрын бурдӧдчӧ. Комиысь нӧшта ӧти петкӧдчысь, Елизавета Кудряшова, босьтіс бронза медаль. Ставнас воліс странаса кызь квайт регионысь квайтымын нёль спортсмен. Коми юркарлы тайӧ кубок вӧлі спортын ыджыд лоӧмторӧн. Котыртысьяслысь удж вылӧ донъяліс бокслӧн Россияса федерация. Светлана Некрасовалы водзӧ кыв.

Кӧть и петӧны тышкасьны, нывъяс весиг ринг водзын мичмӧдчӧны, ӧд налы пыр окота лоны мичаӧн, тайӧ пӧ отсалӧ чукӧртчыны. Ӧд бӧръя тышъяс водзын ставӧн майшасьӧны. Буретш асьтӧ кутны кужанлун пӧ медся ёна отсалӧ венны паныд петысьӧс. Миян спортсменъяслӧн финалӧ петігӧн вӧліны и содтӧд отсасьысьяс.

Елизавета Кудряшова, боксысь Россияса кубокын бронза босьтысь, Коми Республика:

— Трибунаяс зэв ёна отсалісны. Горзісны и. Семья и рӧдвуж волісны.

Медбӧръя тыш. Сьӧкта серти кӧкъямысдас ӧти килограммӧдз категория. Ринглӧн лӧз пельӧсын Сыктывкарысь Виктория Крылова, гӧрдын — Чукотка асшӧра кытшысь Мария Уракова. Медводдза раундын тышкасисны шыльыда, сэсся Крылова вуджис ӧтка кучкалӧмъяс вылӧ, но татшӧм ног эз отсав. Серияясӧн вачкалӧмъясыс буретш эз тырмыны да, суддяяс сетісны вермӧм Ураковалы. Вермас лоны, миянлысь спортсменӧс падмӧдіс важся доймылӧм, а коймӧд раундын Сыктывкарысь нывлӧн чегис киыс.

Мария Уракова, боксысь кубокын вермысь, Чукотка асшӧра кытш:

— Викакӧд ми аддзысям мӧдысь нин, да мӧдысь ме сійӧс верма. Зэв бур ныв, но вермӧ вынаджык. Менам сьӧктаыс неуна этшаджык, та понда зільджыка уджала. Ми дасьтысим сыкӧд ӧттшӧтш.

Талун аньяслысь бокс водзмӧстчӧмын сӧвмӧдӧны сӧмын Сыктывкар да Сосногорскын. Регионса спорт министерствоын мӧвпалӧны восьтыны секцияяс и мукӧд муниципалитетын. Россияса ӧнія кубок талы пӧ отсалас.

Николай Бережной, республикаса физкультура да спорт министр:

— Ми гӧгӧрвоам, мый он вермы сӧвмӧдны спорт сикас ӧтик-кык воӧн. Тайӧ сизим-кӧкъямыс во чӧжся удж. Но панны колӧ. Ми кутам отсавны бур спортсменъяслы, медым на вылӧ видзӧдісны мукӧд нывъяс.

Кубок сюрис Севастопольысь тышкасьысьлы. Елена Гапешинаӧс шуисны медбур спортсменӧн. Пасъям, тайӧ ордйысигӧн ёна видзӧдісны и кодӧс бӧрйыны странаса олимпийскӧй резервӧ.

Светлана Некрасова, Виктория Палкина, Олег Юшков, Олег Жуковскӧй, «Юрган» телеканал, Сыктывкар.

Аньяслӧн лига

«Арктик-Университет» команда ворссис Улыс Новгородысь «Скифлы» аньяслӧн хоккей лигалӧн матчын. Вӧліс ӧтпырысь кык аддзысьлӧм. Медводдзаыс помасис 5:2 тшӧтӧн. Кӧзяйкаяс дас коймӧдсянь дас витӧд минутаӧдз сюйисны миян нывъяслы куим гол. Кост бӧрын Ухтаса воротаӧ локтіс и нёльӧд мач. Та вылӧ миян команда вочавидзис кык голӧн. Медбӧрын «Скифлӧн» дас сизим арӧса Оксана Братищева сюйис и витӧд гол. Пасъям, тайӧ ворсысьыс вайис командаыслы ӧти ворсӧмын ӧтпырысь куим мач.

— [13]

Мӧд аддзысьлӧмын ухтаса нывъяслы вочавидзны эз удайтчы — 4:1. Найӧ весиг вежисны голкиперӧс поле вылын квайтӧд ворсысь вылӧ. Ӧні турнирлӧн табличаын «Арктик-Университет» квайтӧд тшупӧдын. Медбӧръя тшупӧд водзын.

☼ ☼ ☼

И та вылын ставыс. Аттьӧ видзӧдӧмысь. Казьтыштам, став петас ті пыр верманныд видзӧдны юрган.рф сайт вылысь либӧ Ростелекомлӧн IP-телевиденньӧ отсӧгӧн, «Управление просмотром» функция пыр. Аддзысям!

Пасйӧд

Текстуйтӧма 2017-12-16. Кулимса Саша.