Чисталёв Прометей Ионович

Чисталёв Прометей Ионович (1921-) - коми йӧзкостса шылад да музыка ворсанторъяс туялысь.

Чужис 1921ʼ февраль 27ʼ лунӧ Сыктывдін районса Нювчим посёлокын. Батьыс Чисталёв Иона Тимофеевич вӧлі йӧзӧс велӧдан юкӧнын уджалысь, сӧвет кадся медводдза коми поэтъясысь да литература критикъясысь ӧти, коді ассьыс гижӧдъяссӧ кырымавліс Жан Морӧс псевдонимӧн. Прометей ичӧтсянь колис батьтӧг, Иона Тимофеевич кувсис 1923 воын. Писӧ быдтіс мамыс Елизавета Александровна, кодӧс уна вося бур уджысь наградитӧма Ленин орденӧн. Ыджыд отсӧг сетіс и Прометейлӧн дядьыс — Вениамин Тимофеевич Чисталёв (Тима Вень).

1938 воын Прометей Чисталёв помаліс Нювчимса шӧр школа, а 1940 воын — Коми велӧдысьяс институтлысь математика юкӧн. Мыйкӧ дыра уджаліс Визинса школаын учительӧн, а сэсся квайт во чӧж вӧлі Сӧвет Армия радъясын. 1943 воын П. Чисталёв пырис Коммунист ютырӧ.

1946 восянь 1952 воӧдз Прометей Ионович велӧдіс Нювчимса шӧр школаын, вӧлі Сыктывдін районын школа инспекторӧн. Тайӧ жӧ воясас сійӧ заочнӧя велӧдчис Коми пединститутын. Институт помалӧм бӧрын первойсӧ уджаліс Сыктывкарса музыка велӧданінын преподавательӧн, сэсся сэні директорӧн. 1958 восянь велӧдчис Гнесинъяс нима Мӧскуаса музыка-педагогика институтлӧн композитор теория факультетын. Но висьӧм вӧсна велӧдчӧмсӧ лои эновтны.

1960 воын Прометей Ионович заводитӧ уджавны Наукаяс академиялӧн Коми филиалын научнӧй сотрудникӧн «музыкальнӧй фольклористика» специальносьт серти. Прометей Ионович ыджыд удж нуӧдіс коми йӧзкостса музыка да шылад ворсанторъяс чукӧртӧм да тӧдмалӧм кузя. Пӧшти быд во сійӧ ветлӧ фольклорист экспедицияясӧ и быд пӧрйӧ вайӧ выль и выль материалъяс. П. И. Чисталёв уджаліс орччӧн профессор А. К. Микушевкӧд. 60–70-ӧд воясӧ найӧ ӧтув дасьтісны да лэдзисны «Коми йӧзкостса сьыланкывъяс» куим тома небӧг. Сэтчӧ пырисны Эжваса да Сыктывса, Изьваса да Печӧраса, Емваса да Удораса сьыланкывъяс. «Коми йӧзкостса сьыланкывъяс» уджысь авторъяслы сетӧма В. А. Савин нима Коми АССР-са Канму премия.